莊思明（ Lisa）和陳慧琳細佬陳司翰拍拖 3年間曾經情海翻波，雖然男方爛蒲愛溝女，但 Lisa始終不離不棄，視愛郎為終身對象。
有傳近日莊思明手、腳及心口出現幾撻明顯瘀傷，《愛．回家》演員同事紛紛慰問，莊思明亦同《愛》劇好友哭訴被人打傷手腳兼心口勁痛，但因怕事件曝光後，會牽涉男友陳司翰，遂要求《愛．回家》的同事保守秘密。
記者向莊思明求證被打一事，她就好維護男友：「用我自己去擔保佢嘅人格，唔想有啲傳聞影響咗佢聲譽囉！」不過家姐莊思敏就似乎知悉內情，「屋企嘢我梗係知……！」
陳司翰和莊思明曾承認拍拖，但在前年分手，上年翻撻後轉為地下情，但不時被傳媒影到 2人親密出遊，可惜當大家以為他們感情穩定時，原來又再分手。
週日（ 10日）陳司翰不肯談女友瘀傷，並全程木口木面不置可否，之後莊思明反口取消見記者回應事件。
莊思明同陳司翰 11年開始拍拖，二人關係斷斷續續，日前 27歲莊思明在微博 po了一張相片，展露大髀有一大撻明顯瘀傷，估計長達 3吋，她更寫道：「雖然很痛但不要緊，瘀傷會慢慢減退的，痛楚會慢慢消失的，路我還是要繼續走下去！」傷得最痛的，唔通係個心？
網上圖片
莊思明本月 1日在微博放上大髀瘀傷的照片，並感慨「痛楚會慢慢消失的，路我還是要繼續走下去！小明，你可以做到的！」似指瘀傷另有別情。
家姐知內情
屋企嘢我梗係知啦，不過我唔講得畀你聽！（真實對白）
一向敢言的莊思敏，對於細妹瘀傷，鮮有地封嘴。
被要求封口
據知部分《愛．回家》的長期戰友都知道真相，眼見 Lisa哭訴都想為她出頭。雖然莊思明跟陳司翰已第 N次分手，但莊思明擔心大家矛頭會直指 37歲男友陳司翰，兼影響再跟男方復合的機會，故要求所有人向外封口。
上週六（ 9日）記者致電 Lisa，言談間仍十分保護陳司翰。
F：《 FACE》 莊：莊思明
F：聽講你同陳司翰分咗手喎？
莊：嗯，私人問題唔想再答，總之我 ok。
F：佢最近對你係咪唔係幾好？聽講對你郁手郁腳喎！
莊：（遲疑兩秒）冇呀！
F：咁點解你周身瘀晒？
莊：因為我個人比較容易瘀啲，同埋我之前去玩（遊船河）又唔小心跌親，加上有一次我拍外景俾部攝影機撞咗落隻腳度，所以瘀咗好大撻。
F：遊船河點跌到咁傷？
莊：跣腳囉，我可能成身無端端週圍會有幾撻瘀咗咁囉！
F：其實你係咪唔想講司翰對你唔好咋？
莊：咁私人問題好早之前已經唔想講喇，公司都同我反映咗，唔想覺得我好似得呢樣嘢俾人講囉。
F：你會唔會嬲佢咁做？
莊：首先我澄清唔知點吹出嚟，但係我唔覺意整親啫，外景又受傷，自己上船玩又受傷啫。
F：你受傷司翰有冇陪你睇醫生？
莊：我冇睇醫生，連跌打都冇睇。
陳司翰則於 8月 5日發表微博稱：「看着一堆書信，反省到底有沒有給對方同等量的美好回憶，然後心虛不敢細看…」反省咩呢？心虛咩呢？網上圖片
莊思敏與細妹莊思明姊妹情深，但家姐不喜歡陳司翰爛蒲愛滾，一直反對細妹與他拍拖。《壹週刊》圖片
未夾口供
莊思明受傷幾乎全組《愛．回家》演員都知，但一律封口避談，不過口供唔一致，一啲話拍劇時受傷，一啲話遊船河跌親，真假自己判斷。
趙希洛：前日（上週四）見過佢，好正常吖，佢俾人打咩？冇聽過喎。
李霖恩：佢喺我哋面前好哋哋喎，佢話自己遊船河跌親，冇詳細問落去呀！
張達倫：返工有見佢（莊思明）隻腳瘀咗，佢拍劇撞到部機嘛，佢識保護自己?喇……同佢做同事咁耐都冇見過陳司翰接佢喎。
「身邊好多人都知！」
F：咁有冇話畀佢聽你整親？
莊：其實我身邊好多人都知道嘅，但我唔會特登講畀人聽，我身邊嘅人知道就會知道。
F：佢係你男朋友喎？
莊：我o依家都冇講過大家係咩關係，係囉，呢樣嘢我唔講架喇。我覺得有必要澄清，用我自己去擔保佢嘅人格，唔想有啲傳聞影響咗佢聲譽囉！
F：佢係咪成日返大陸，你哋好少見面？
莊：我真係唔清楚喎。我係想保護番啲我絕對關心同埋痛錫嘅人，係事實我已經講咗出嚟。
翌日陳司翰於半山永安閣住所步出，走到停車場，但對记者提問一律不開口回答，問到知否 Lisa最近手腳嚴重瘀傷時依然漠不關心，全程目無表情，駕車離開。
至週日晚上 Lisa則突然主動聯絡記者，相約星期一早上在將軍澳電視城門外見面回應事件，但司翰拒絕回應記者後， Lisa又突然反口取消見面澄清，並 WhatsApp留言表示：「其實我只想保護他，沒有其他回應了，謝謝！」
陳司翰和莊思明於 11年拍拖一年多後分手，之後離離合合，但男方溝女史極多， Lisa家姐莊思敏曾極力反對但阻止唔到。週一（ 11日）本刊致電莊思敏，問及細妹瘀傷真相，她唉了一聲後回答：「屋企嘢我梗係知啦，但（原因）唔講得畀你聽。」家姐都管唔到咁多， Lisa自己小心啲啦！
搵姊妹哭訴
前年因為莊思明頂唔順男友陳司翰花弗而第一次分手，分手後 Lisa終日以淚洗面，同朋友聚餐都忍唔住喊出嚟，更喊到眼睛發炎要睇醫生。
花心
司翰曾多次被發現暗拖女伴出街，前年同馬來西亞籍女模吳孟璇在台北睇戲斷正。
爛蒲
陳司翰爛蒲出晒名，而且兩杯落肚更加玩得癲， 10年他參加清洪契仔巫翊鳴夜店的狂野派對，被指與辣妹玩得激烈。
好打得
陳司翰涉對女友郁手有前科， 03年他被影到在跑馬地疑對拍拖 5年的台模女友 Jacqueline動粗，家姐陳慧琳追問後向傳媒表示：「發生呢啲事好唔好意思，佢仲同我講咗聲對唔住。」事後陳司翰幾乎絕迹香港娛樂圈，近年轉戰內地拍劇，叫搵到兩餐。
四招防家暴
雖然話打者愛也啫，但係俾人打都要識擋識反抗嘛，唔係瘀晒傷晒點見人呀？下面還拖四招各姊妹跟住學冇死！
第一招：學泰拳
學定一招半式，例如o依家咁興學泰拳，俾人打都冇咁傷兼有仇報吖。但萬一對方識詠春、自由搏擊、空手道、如來神掌或者係葉問，咁我勸你報警。
第二招：養惡狗
養番隻狼狗或者鬥牛，記住要自己訓練，有乜事叫隻狗幫你擋駕還擊，對方連狗都打就告佢虐畜。
第三招：跳艷舞
夫妻鬥氣係好傷感情，不如準備定件情趣內衣，一嗌交即刻着起跳番 part扭扭舞，挑番起老公嘅情趣，大家 Happy Together好過打打殺殺啦。
第四招：喪練跑
為堅持罵不還口，打不還手嘅原則，最好係走！平時長跑練習定，一來對健康好，二來俾人打可以走為上着，下咗啖氣再傾過囉！
莊思明向陳司翰先生道歉
今午莊思明再於微博撰文澄清，並對陳司翰公開道歉。莊思明寫道：「對於日前出現的不實報道本人已經澄清，報道內容全屬虛構，希望各位不要再作胡亂猜測！失實報道麻煩了我家人，朋友和同事，就此我非常抱歉！並且我對陳司翰先生道歉，事件令他受到騷擾！謝謝！」至於一直未有回應嘅陳司翰，就於微博打破沉默，寫道：「就媒體近日對本人之虛構報道，深表憤概。在此聲明，倘若有關媒體就事件繼續抹黑捏造，斷章取義，為求利益不擇手段，對本人及他人造成滋擾，本人將保留法律追究權利！保持沉默，是不想再受利用，並不代表坐視不理！娛樂媒體籍法制漏洞，濫用新聞自由，致使藝人被侵犯至此！線民請自重，想清楚再評論！」
對於胞弟再捲入「家暴」新聞，作為姊姊的陳慧琳也有所保留，她表示：「一段感情，雙方最清楚，我不知道甚麼事，不便批評。自己都是看報道才知道。」Kelly直言不會因此事致電弟弟了解整件事，她說：「他三十幾歲人，懂承擔責任。」問到父母是否為此感到擔心？她明言：「一定會。但他這麼大了，聽不聽父母說就不知道，他有判斷力。」問到Kelly是否相信此傳聞？Kelly坦言:「不想去相信。」但之後又指：「我信（莊）思明說的。」曾見過思明一次的Kelly對她讚口不絕：「在家見過一次，她很好，很乖，斯文，又漂亮又長得高，家裡條件好又有修養，是一個好女生。」