《吸血新世紀》瘋魔全球，98年萬綺雯套《我和殭屍有個約會》講到現在，證明殭屍片種收得。據知TVB下年將會開拍一套殭屍片《殭》，還找來高登女神37歲的謝安琪（Kay）主演，更重本去到荷蘭拍外景。
為隆重其事，TVB於11月的節目巡禮，人妻Kay還會做頭炮表演嘉賓兼宣布做女一，據知人妻Kay今次拍劇全靠老公推薦。不過張繼聰就好謙說：「阿Kay係一位實力的表演者，她不用任何人推薦。」
TVB因為世界盃蝕錢，搞到要裁走兒童組50人，而今年節目巡禮亦受影響，唔會再好似以前咁洗錢，整個蚊型騷了事，講真啲劇集離不開幾位小生花旦，今次最爆就係搵到謝安琪拍劇。
女神Kay網上人氣不用懷疑，由佢孭飛嘅劇集，應該會吸引大批巴打睇TVB。
據知謝安琪下年將拍一套殭屍片暫名《殭》，劇中仲會做索殭屍，聽講撮合Kay佔領TVB做女一，原來係老公張繼聰向監製陳維冠推薦，如今Kay答應拍劇，在11月的縮皮巡禮中，TVB更安排Kay有個人騷兼宣布拍劇，好尊重咁款！
雖然今次張繼聰帶挈老婆拍劇，但佢就說：「拍劇呢啲你自己問佢啦，阿Kay係一位實力嘅表演者，佢唔使任何人推薦。如果有人搵佢拍劇，係佢自己本事，唔關我事。佢工作嘅事你問番我老婆啦！我唔知喎！（會唔會夫妻檔一齊做？）！唔想夫妻檔囉！我覺得唔好睇喎！同埋我哋一直好少講公事，如果一齊拍劇，我覺得好怪囉。」巴打都未必想睇你兩夫婦幕前耍花槍喎。
謝安琪下年拍《殭》暫定為陳維冠（左）監製；而佢監製嘅作品《4個女仔3個 Bar》男一咁啱就係張繼聰（右）。
拍過電影
雖然謝安琪唱歌為主，但近年都開始進軍電影。除咗同張家輝、任達華拍過《大追捕》外，上年亦拍過電影《末日派對》戲中同劉浩龍談情。
進軍內地
謝安琪原來仲拍過套電影《敦煌傳奇》，o依家仲簽咗國內經理人公司華誼兄弟，應該北上發展多機會。
經理人承認拍TVB劇
唱而優則演的謝安琪孭飛為無綫拍劇，處女作題材是超時空科幻片，Kay經理人夏森美昨日承認此事：「其實珍姐（曾勵珍）一直想撮合呢件事，奈何之前時間未配合到，但幾個月前終於傾好，大家都好鍾意個劇本，Kay會喺11月4日嘅節目巡禮交代詳情。」
縮皮巡禮
以前TVB節目巡禮，例牌晒冷，尤其劇集預告一定扮大製作，播足半個鐘。但今年有傳余詠珊、曾勵珍兩位阿姐不和，劇集預告將會轉形式，唔會再有預告片，改為以相取代。皮已縮，但無綫廣告費當然繼續加啦。
《搞鬼辦公室》
原先由蔡少芬孭飛，但因為題材講鬼辭演（張太係基督徒，另一個張太謝安琪又接《殭》嘅？），最後由田蕊妮頂上，男主角陳豪。
《大太監續集》
《大太監》收得，TVB慣例做到爛先收啦，所以自然有續集，太監五虎原版人馬。
《當鐵馬遇上戰車》
小生走得就走，造就袁偉豪上位。第一次擔正，拍唐詩詠、蔡思貝。