扮過功夫熊貓，又扮過本地樂壇天后容祖兒，仲扮過國際巨星Lady Gaga嘅肥妹小寶（細細粒陳嘉佳），唔靠個樣搵食，靠扮嘢可以人人拍爛手掌，加上最近大結局套《老表》做「周麗敏」開口埋口Vivienne，又同 Bob激咀搶晒鏡，細細粒唔再係二打六。
在TVB成功升呢，細細粒更努力減磅，結果成功搣咗30磅肥膏，更信心十足應雜誌要求，去同一場地學女神謝安琪着旗袍變sexy女人，真係交足戲！
A貨小寶陳嘉佳打橫瞓同一個場景，同一件旗袍，差不多甫士，不過今次就轉由細細粒演繹另類「女神」，好「 fresh」呀！
原裝Kay貴為高登女神，完美身材加天使面孔着起旗袍，打橫瞓喺長椅，真係想知張繼聰一日 24小時點過！ HMViss圖片
由細到大都係巨碼肥妹身形嘅細細粒，體重一直徘徊 200磅高危磅數，雖然身體未有響警號，但過肥始終對身體有影響，所以細細粒最近就立下決心減肥，仲轉食素菜，最終搣走 30磅肥膏，踏出瘦身第一步。
天生不是女神
細細粒扮嘢方面駕輕就熟，但今次扮高登女神謝安琪，仲要係索到核爆嘅旗袍噴血 look，細細粒就話：「自己同『女神』兩個字真係大纜都扯唔埋！」但仍勇於接受挑戰。
不過細細粒就算減咗 30磅，仍擔心會擠晒啲肥膏出來，嚇親人事小，傷自尊心先係問題，最後細細粒都成功穿上 sexy旗袍，發揮女神「 BB」味道。「雖然瘦咗，不過都係冇異性追我，我自己工作行先，唔心急拍拖。男朋友就只得一個要求，就係要真心對我同錫我。」冇拍過拖嘅 29歲細細粒，幾時先有初戀呀？
學媚態細細粒扮起 Kay，佢話眼神先係重點。
Kay呢招對鏡搽唇膏，性感爆晒燈！ HMViss圖片
細細粒雖然扮嘢經驗十足，不過今次要扮女神謝安琪，都唔敢怠慢，由化妝到旗袍到場地都一一跟到足，好認真！
《老表，你好hea！》中，細細粒真實初吻奉獻咗畀Bob飾演嘅郭寶，咀戲更拍足5個鐘，真係睇見都覺得飽。週日晚《老表，你好hea!》大結局，兩個又再一次係台上咀嘴，好大犧牲！
好勉強
因為身形有別，細細粒明知做唔到 Kay拗腰動作，都硬着頭皮盡量去嘗試，就算出來效果有出入，不過「敬業樂業」值得欣賞。
Kay呢個 S形動作睇落好易，但原來着住旗袍，身形差啲都做唔到， Kay果然係最索人妻。 HMViss圖片
扮嘢又上到位喎！
細細粒憑《 Sunday扮嘢王》打響名堂，節目出街後多咗好多商演活動，原來細細粒唔只演得，仲好「唱」得，分分鐘下年樂壇新人就係佢！
扮祖兒
細細粒喺《 Sunday扮嘢王》中，試過扮樂壇天后容祖兒，又唱又跳，對於二百磅身形嘅細細粒嚟講，真係少啲體力都唔掂。
扮 Gaga
細細粒扮嘢扮到出晒位，多咗唔少公司搵佢擔任表演嘉賓，之前登台試過扮國際天后 Lady Gaga添！
扮熊貓
細細粒唔只扮人有一手，就連扮卡通人物功夫熊貓都扮到勁似。
「一路扮開嘢！」
細細粒扮完高登女神謝安琪，轉頭就要扮萬綺雯喺《老表，你好 hea！》嘅靜雯 BB，一時溫柔一時就兇神惡煞，雖然難度增加，不過唔使着旗袍，簡單以恤衫牛仔褲加風褸出場，細細粒即刻「淨心BB」上身，仲好快就投入火爆齊靜雯的角色。對於扮完兩個唔同類型嘅人有咩感覺，細細粒就答：「自己一路都有扮開嘢，所以依家對於扮邊個都冇乜特別感覺啦！」
其實貪靚係其次，細細粒減肥為健康，佢仲成日都 keep住 check，好在 8月先 check過冇三高，但都係減定啦，話唔埋索過索 Kay都有機呀！
扮《老表》靜雯：冇異性追我！
唔使着旗袍，細細粒明顯表現較輕鬆，扮起「情敵」萬綺雯嘅齊靜雯角色入形入格，表情仲多份嬌柔添！
萬綺雯係《老表，你好 hea！》飾演齊靜雯角色，雖然外表斯文，不過只要戴上眼鏡，性格就會變得火爆，行為粗魯。電視圖片
萬綺雯喺《老表，你好 hea！》飾演的齊靜雯角色，擺明影射陳淨心，其後陳淨心喺微博出 post炮轟，仲話「低級趣味！」多謝你幫手宣傳喎！
P圖吧！美圖兵團
花姨眼火柴腳
參考宮雪花「美圖秀秀」嘅技術，記者幫細細粒張相執「靚」，大眼加上手腳都變幼晒，索呀！
細細粒平時都有鋪「美圖秀秀」癮，不過就冇花姨執得咁誇張，細細粒仲話只會執面而唔會執個身喎。
我冇化妝先會用「美圖秀秀」！