年度男神邊個威得過周柏豪?入手百萬Benz、處男紅館騷圓滿舉行、攞埋Yahoo年度最佳男歌手大獎,唱歌名利雙收轉戰影壇一樣順風順水,《小姐誘心》、《販賣愛》、《四非》三部電影排住隊等上畫。最惹人妒忌係套套男主角、套套有床戲,所以咪男神囉!
下月15日上映的《小姐誘心》,柏豪行運行到落腳趾尾,有得同劉心悠BB做夫妻,仲有得同天王城城都like嘅嫩模Kabby搞外遇!戲中小三Kabby仲爆拍事前準備功夫:「當正佢係動作戲咁拍,事先要拉筋驚搞到抽筋!」
「拍之前,真係得一個字,驚!因為柏豪係男神嚟,好多 fans,我驚佢哋會憎我,又驚佢哋會打我,真係冒住生命危險!我都係第一次拍咁激情嘅激吻戲,我哋淨係場咀戲都拍咗成三、四分鐘!所以我拍之前都特登去咗拉筋,因為我驚俾佢搞到抽筋,呢啲場口直情係動作戲一樣,事前要做足準備功夫。加埋都係拍咗三、四個 take就收貨,又唔使清場,算係好順利,咁導演同監製有帶住我哋,我同柏豪事前又有溝通嘛,大家都係專業演員,柏豪又要係我前輩,都唔使我教啦!我覺得呢套戲都係搞笑同幽默多,又唔覺得感覺色情喎,所以我唔怕會賣弄色情同定咗型!」咁又係, Kabby喺星爺套《美人魚》都冇咁搏喎!