洪永城勁似崔建邦 唐詩詠偷情式熱戀

熱戀扮唔熟、拍拖扮分手、明明註咗冊就話「結婚一定會通知大家」,睇得多娛樂新聞,唔好話俾我知你仲信藝人把口!最近大話王又多一個洪永城,上年暑假開始同唐詩詠傳緋聞,爆響口話想追女方。你以為佢誠實?實情拍拖三個月、電視城內一早通晒天!

既然開咗個頭,惟有一個大話再冚另一個大話,上週女朋友一場嚟到洪家鯉景灣,明明係送上門撐枱腳,洪永城都因為怕被記者撞破,急 call朋友做大茄,一餐飯各自臨時臨急一個街頭一個街尾分開食。這麼遠那麼近,真係有情趣啲?

撞破送上門 急call救兵 洪永城唐詩詠偷情式熱戀
出席活動公開對唐詩詠有好感
當晚(上月 27日),洪永城返回鯉景灣後發現記者,令原先約會女友大計冇望,速速轉 plan,兩人同時 call救兵做「分頭食」大龍鳳。

明顯情侶通常都係俾人踢爆在先,冇得唔認在後。有辦你睇,黃翠如同蕭正楠公開戀情後不知幾恩愛,仲唔多唔少幫到套定情大台劇收視。相反好兄弟洪永城就鍾意化簡為繁,明明去年八月已經傳拍拖、踏入熱戀期,日前至懶誠實公布要出力追求,把口 delay過事實成季!

撞破送上門 急call救兵 洪永城唐詩詠偷情式熱戀
扮睇餐牌
洪永城活動後先到鯉景灣蘇豪東,研究各餐廳餐牌之際,才發現記者蹤影。
撞破送上門 急call救兵 洪永城唐詩詠偷情式熱戀
誇張召friend
嗰頭洪永城有男性友人應召陪食,呢頭遲十分鐘到鯉景灣的唐詩詠,亦惟有硬着頭皮坐入一間泰式餐廳,仲作勢揮手叫女友人陪食,誇張又假。
撞破送上門 急call救兵 洪永城唐詩詠偷情式熱戀
本來專攻西餐廳的洪永城,突然轉 plan,直入光猛日式飯堂內,一入座就一輪嘴似用手機通風報信兼 call同性友人救駕。
撞破送上門 急call救兵 洪永城唐詩詠偷情式熱戀
入座後一樣係忙打電話急召友人,十分鐘後女性友人到着,拍拖撐枱腳變 she she聚會。

大龍鳳

撞破送上門 急call救兵 洪永城唐詩詠偷情式熱戀
公開追求多約會多見面,反而借傳媒表白後,洪永城日日單身行動,唔敢約女友。

無論係追緊人定拍緊拖,約食餐飯仔又有幾閒。上週二( 27日),洪永城活動後返回鯉景灣住所,在樓下蘇豪東各式餐廳門口逐間研究餐牌,明顯係篩選餐廳約女朋友食餐好嘢。不過警覺性高過人、又怕戀情見光死,睇睇下西班牙菜、意大利菜,途中卻發現記者影蹤,最終走入日本餐廳,一坐低唔睇菜牌先,第一時間又打電話又寫短訊。

十分鐘後,男性友人應召出現,二十分鐘後,唐詩詠亦都現身。又話追求中、又話好朋友,邊個好朋友會經過食店連招呼都唔打個?家住將軍澳清水灣半島飛撲到鯉景灣,不過臨門一腳又係急 call應召女性友人,轉 plan走去食泰菜。為乜搞到一餐飯要食到一個街頭一個街尾?真係呢對情侶先至明。

經過扮睇唔到

家住將軍澳的唐詩詠近月經常被目睹在鯉景灣出入,而洪永城正住在蘇豪東餐廳區附近的鯉景灣。相隔 20分鐘、晚飯時間出現在鯉景灣蘇豪東,不過一個食泰菜一個食和食,相隔僅僅三個鋪位。

愛的印記

一時話想追、一時又改口了解中,無論點講都好,洪永城係唔肯講事實。其實二人早於去年 8月已經傳撻着,到 11月正式行埋,仲有人證有物證添!

無綫姐仔小生開工例必一人一張摺椅跟身,唐詩詠把獨一無二的「蜘蛛俠」摺椅轉借男友洪永城使用,被《張保仔》工作人員現場踢爆。

單身多年的唐詩詠去年九月罕有地在網上晒收花,有指盒心型禮盒裝鮮花,係洪永城由香港空運到上海,給在當地拍攝《梟雄》的唐詩詠。

撈亂櫈

其實去年初拍《載得有情人》首次合作情侶,已經有傳 31歲洪永城放棄林夏薇,轉冧 33歲唐詩詠,八月仲被拍到同遊赤柱。

九月劇集出街、為宣傳日見夜見,兩人愈行愈埋;到十一月《張保仔》拍得如火如荼,更俾服裝阿姐發現冇份拍套劇,陪住洪永城開工的竟然係唐詩詠張御用摺椅。工作人員轉述洪永城死撐:「邊係啫!啲櫈張張都一樣!」可惜唔夠服裝阿姐眼利又企硬:「冇可能!呢張明明係唐詩詠嗰張!」自此洪永城與唐詩詠的情侶關係即成電視城熱話。


大龍鳳飯局後,洪永城在寓所附近接受記者訪問,繼續笑騎騎死撐:「佢梗係好女仔,但係我哋無拍拖。」

據悉唐詩詠一向係千嬅粉絲, 26號晚千嬅演唱會,洪永城就帶埋女友一齊睇拍拖睇騷,還齊齊入後台合照集郵。

唐詩詠有新歡,舊愛崔建邦亦一樣有新女,早前本刊便發現戴住口罩的崔建邦跟嫩模女友陳嘉莉拍拖!對於唐詩詠有新戀情,崔說:「如果係真當然恭喜,我都想佢開心。」

「儲 3000 like就公開」

緋聞一早開始傳、戀情又先行在大台見光,照計有幾個月適應期,公布戀情一啲無難度。勢估唔到洪永城唔等拍拖相曝光、本刊記者早前曾當面提問,洪例牌回應答:「唔係拍拖……佢去咗馬來西亞嘛!(你又知得咁清楚?)佢當然係好女仔啦,我哋係好朋友嚟!」

至上週二( 27日)見記者再先行自爆,不過唔係爆戀情:「我哋有共同話題、又一樣鍾意食嘢,我對佢有二、三百個 like,儲到二、三千個 like就公開。」呢頭表白完嗰頭有記者電話訪問佢即改口:「美麗的誤會呀,我係話大家了解中、唔係發展中!」即係點?去下停下,又再倒後退幾步,洪永城啲步伐好難捉摸喎!

揭洪永城嗒「唐」之謎

崔建邦同洪永城,一個曾經被唐詩詠愛到難捨難離,一個令女方諗起都冧,原因可能係…

洪永城主持過多個旅遊節目,包括有線娛樂台《活得很滋味》同無綫《走過乜乜大地》系列;而崔建邦就都算得上係《勁歌頒獎禮》御用司儀。

除了說話冧到人,原來唱歌一樣得,早前洪永城同唐詩詠接受商台訪問時,就大展歌喉冧女神;而Amigo唱功都有返咁上下。不過最能夠令唐詩詠開綠燈俾洪永城嘅原因,竟然係眼細細、面型有少少包嘅洪永城,某幾個角度望落去,竟然似似地Amigo?洪永城唔會變「愛的替身」吧?

洪永城崔建邦

視頻:點唐詩詠召救兵 洪永城自編西灣河「偷食」騷