過往八年，以時速180公里在公路上高速滑行的陳法拉，突然喊停！
當大家認為精算的陳法拉事業愛情兩得意，多年來力爭上游，爬上頂 ，重頭劇《衝上雲霄II》第一女主角已經手到拿來，封后在即，她卻偏偏要離開無綫娘家。
07年跟Neway大太子薛世恆悄悄地拍拖，多度傳出已婚消息，經過不少風雨，結果又靜悄悄的分手。31歲的陳法拉，絕對是反高潮。
表面上，雙失法拉看似危機重重，或許一切的結束，演化成更多的轉機，頑強的陳法拉其實自有分數。
撰文：楊潔雯
■陳法拉發現演出開始走下坡，到達樽頸位，毅然決定離開無綫往升學。攝影：陳慧安
不顧一切衝衝衝的陳法拉煞停，一反常態！
從不掩飾又不喜歡解釋，在離港到美國讀書前接受本報訪問，法拉訴說心事，她只是說着演戲的事，言語間卻不經意流露出，對人和事的種種失望和疲累。
去年法拉到歐洲旋風式拍《衝上雲霄II》外景，在密集的工作和陌生環境刺激下，不安夾雜負面情緒被拉扯到沸點，她終於崩潰，躲在酒店失控狂哭，法拉壓低聲線說：「第一日到英國，嗰時仲有時差，第二朝第一場就係我個人solo，講大堆對白，寫我去咗個好靚、有高山望住成個天空，好emotional，鎮宇係路人甲，點知去到係一個球場，跟住有啲大巴士，一個好演員唔應該俾呢啲嘢影響，要完全投入個角色，嗰日好凍，英國係零下，大家得兩件羽絨，兩個暖包，本應好浪漫，但係好凍，衫又好薄着裙，除衫震緊，根本講唔到對白，跟住仲要臨時改對白，導演有意見，鎮宇又有意見，我又想講番我背熟嗰段，咁多因素加埋，好迷惘，雖然喊到做好晒自己嘅嘢，返去諗有好多嘢我唔應該咁做，但係冇得後悔再重拍，第二日就走，咁我就攤喺英國間酒店，時差瞓唔着，又拎住個劇本讀，嗰吓個感覺出晒嚟，我就喺度喊，英國我有好多戲，由頭拍到尾，好唔夠瞓，晚晚返到去就係咁。」
■拍攝《衝上雲霄II》期間，法拉坦言難應付吳鎮宇經常爆肚。電視圖片
■在鏡頭前痛哭的法拉，鏡頭後亦情緒失控躲在酒店狂哭。電視圖片
難頂強烈不安
事業和感情同時失去方向的法拉，被層層叠的工作壓得透不過氣，「煞停」可能是唯一方法，她說：「特別係最近呢兩套劇《衝上雲霄II》同《傳愛事務所》，有好強烈感覺，覺得係行緊下坡路，到咗個樽頸位，覺得以前好似簡簡單單，一場office戲，喺度執吓文件，冇乜對白嘅戲，我做到亂晒龍，個心係亂嘅，我知唔得，要搵到個原因，《衝上雲霄II》又係好多即時問題，鎮宇又鍾意爆肚，好多嘢要現場去應付，同之前拍好唔同，我應付得幾辛苦吓，可能我係一個比較規範，一板一眼嘅讀書人，好多嘢唔識好靈活，去理解一樣嘢同做嘢比較公式化，所以唔係好識應付，個人太緊太攰，一邊拍一邊覺得咁樣會出事，直情唔知點做落去，又唔想求求其其講句對白，做埋個表情就收工，過唔到自己嗰關。」法拉生活失衡，加上過往缺乏基本訓練，大感不勝負荷：「一開始已經喺上面做高難度動作，鎮宇一開始訓練班，捱咗好多小角色，慢慢學起，我一嚟就好多戲，所以覺得好虛，呢一兩年係特別強烈，日日陪住我返工就係呢種不安。」
■07年法拉跟Neway大太子薛世恆拍拖，屢傳婚訊近日卻黯然分手。
進修回歸簡樸
再堅韌的橡筋，終日不停拉扯，結果只會更快斷，法拉喊停！回歸簡樸的校園生活，獨自到美國紐約修讀暑期課程，她說：「有機會成個暑假去放假去讀書，搵咗好多間學校同課程，經過好多面試，搞咗一輪終於去到間好想去嘅學校，可以住喺紐約市，又可以買嘢shopping，主要可以睇好多騷，每個周末有好多活動，好期待呢個學生生活，因為大學畢業已經九年，咁耐冇返校園生活，好難得！」
不過，法拉離港之前，被任達華爆料在餐廳約見王維基，之後又傳她向林建岳招手，她說：「讀完書未有任何打算，我想讀完一個summer term試吓先，如果鍾意嘅話，話唔定會繼續讀落去，學到嘅嘢即時用到，或者有其他好好嘅工作嚟搵我做，不妨一邊做嘢一邊深造，所以o依家未知，等我讀一段時間適應吓先喇！」
法拉在工作和感情上的缺失，得到反思，將一切視作學習教材，她說：「我o依家覺得做乜嘢都唔好一頭就舂落去，咁會好易失平衡，之前都有少少係咁，將所有嘢拉到咁緊，不知所措，我覺得o依家要學識多啲生活，多啲觀察生活，多啲體驗生活，多啲去同身邊人一齊，同屋企人一齊，令到我成長。」
化妝：Annie G Chan
髮型：Alex So P.O.P8
服裝：Roberto Cavalli
拍電影減負擔
■法拉指電影節奏慢，演員可以準備得更充足。
■法拉參與陳嘉上執導的鬼片《奇幻夜》，有意進軍電影界。劇照
法拉本是機會主義者，暫別前，她參與陳嘉上執導的鬼片《奇幻夜》，有意到電影界試水溫，她說：「拍電影當然希望喇！因為多咗自由度，電影我覺得係好唔同感受，電影對於我呢個階段係好好嘗試。」
法拉表示電影的節奏較慢，故事較濃縮，她說：「演員功夫可以做足啲，設計好晒先去演，演員負擔唔會咁重，我覺得電影係幾好媒體畀我去嘗試。加埋又有新鮮感，工作環境好緊要，成日對住同一個環境有時係會好麻木！新鮮感對演員係新衝擊，對我嚟講係好嘅！」