自認加料Sell底褲 方力申狂操變爆肌男

又一個肌男胸降娛樂圈!現年34歲的方力申經4個月地獄訓練,成功搣脂激減30磅肥肉,操出41吋胸肌和6嚿腹肌,剝剩一條底褲拍廣告,超激凸的「小小方」浮誇到爆,方力申大方承認有裝假狗:「軟嘢硬嘢都攝吓!」得戚的小方揚言不介意接拍露股戲為藝術犧牲。

前飛魚王子方力申曾代表香港參加2000年奧林匹克運動會,退役後火速加入娛樂圈做歌手,近年轉戰內地拍劇賺人仔的他,最近以過百萬人仔酬勞接拍內地品牌底褲廣告,由於要剝衫僅着底褲示人,小方由今年元旦開始苦練身材,跟轉行做健身教練的杜德智操弗,小方昨日接受電話訪問說:「自己一直有做開運動,由以前一星期三日變日日做,可能以前係運動員,更加事半功倍,由最肥169.5磅減到139.5磅,胸肌有41吋。」

自認加料Sell底褲 方力申狂操變爆肌男
■小方經過4個月操弗成功減去30磅,變身性感爆肌筋肉男。

汗水換腹肌

然而,廣告相中的小方有點硬膠,身形線條更疑似造假,尤其是「小小方」超浮誇,小方坦言:「呢啲後期製作裝吓假狗,攝吓墊吓,軟嘢硬嘢都攝吓,但攝乜唔講得,係商業秘密。」問裝大了幾個size?他笑說:「大咗半個度啦,真係唔知。」小方承認有執相:「平常人影相都美圖秀秀,好在有拍片證明,唔怕畀人話身形唔係堅,終於明白男仔點解有腹肌鍾意自拍,因為用汗水換返嚟,梗係要show off。」

剝剩底褲拍廣告有否尷尬?他說:「唔尷尬,可能內褲好似泳褲好貼身,現場幫我整衫嘅女仔得23、4歲,佢攞嘢畀我攝,自己轉身變魔術。」問是否想挑戰碧咸的底褲廣告?小方說:「梗係冇,挑戰自己,呢個係好機會,希望有突破接多啲唔同戲,但性愛場面暫時過唔到自己,剝褲見八月十五都OK。」

自認加料Sell底褲 方力申狂操變爆肌男
■小方今年元旦體重達169.5磅,拿着當日報紙做證展開瘦身大行動。


■小方以7位數接拍底褲廣告,「小小方」浮誇激凸,他坦承有裝假狗。

節食斷六親

小方用4個月激減30磅,他公開地獄減肥秘笈:「多數做單槓、引體上升、sit up,亦同泰拳朋友跑步打拳踢腳,從來冇諗過可以有腹肌,去奧運嗰段時間都冇,我諗自己係游得最快但身材最唔好,因為食得多。」小方指最後階段的節食過程最重要,這期間他就斷六親:「同家人飲茶只係飲水,睇到腹肌線條出晒嚟,最後塊面凹得滯過咗龍,有段時間冇食飯仲變排骨仔,廣告出嚟都覺自己過瘦。」

自認加料Sell底褲 方力申狂操變爆肌男
■年逾50歲的杜德智身形fit爆,難怪小方請他做健身教練。

自認加料Sell底褲 方力申狂操變爆肌男
■小方接受健身教練杜德智特訓,操出胸肌和腹肌。

節食減肥更令小方脾氣變得暴躁,他說:「烚嘢唔好地方係脾氣暴躁,媽咪成日引誘我食嘢.自己發脾氣,阿媽受咗我好多氣。」問女友鄧麗欣有冇讚他弗了?小方說:「有,佢話早就應該咁。」女友很滿意你身材?小方說:「但佢見唔到,嗰段時間佢喺內地拍嘢,自己更加專心節食,仲可以多啲時間做運動,拍廣告嗰日佢返嚟探班,都嚇一跳以為我病咗。」

拍完廣告後小方放縱飲食,8日後反彈16磅,他說:「夏天會再keep,估唔到人生可以做到咁樣,希望可以keep住鼓勵大家做運動。」

操肌秘笈:兩星期地獄餐單

早餐
4條烚雞柳、西蘭花/椰菜花、4-6隻蛋白

午、晚餐
4條烚雞柳、西蘭花/椰菜花、4-6隻蛋白、一碗飯或2個番薯

小食
西芹、紅蘿蔔

運動
一星期三日跟杜德智健身,兩日打泰拳,兩日自己做運動

三日健身
操肌(一粒鐘)+跑步(50分鐘)
方力申跟健身教練杜德智狂操單槓引體上升、雙槓(dips)、sit up、風火輪等器材,場地沒受限制,有時在杜德智的studio,有時在維園做運動。

兩日泰拳
打泰拳(一粒鐘)+跑步(50分鐘)

Stephy誘破戒失敗

方力申成功搣甩30磅肥肉變肌男,女友鄧麗欣(Stephy)勁讚毅力驚人,昨身在橫店拍電影的Stephy接受電話訪問說:「我都好佩服佢,對自己好嚴謹,忍得口冇犯規,點誘惑佢都唔會破戒。」問是否很滿意男友身形?Stephy甜笑說:「佢一早應該咁keep啦,o依家咁興,不過佢之前太瘦,o依家反彈咗,希望夏天佢keep番。」

問Stephy會否嫌男友渾身肌肉太硬,她說:「o依家咁樣好適中,唔好似健美先生就太over,o依家佢咁樣好好,肌肉結實咗,見到佢fit咗,都激勵我要做運動保持狀態,大家一齊去跑步。」Stephy不介意男友拍底褲廣告,更笑言最緊要拍得靚。