有錢有面，林峯年初獲無綫頒贈「亞太區最受歡迎香港男歌星獎」後，接連開戲開劇，忙到甩轆，前日下午於西環街頭為新劇《花花世界花家姐》外景期間，更有專人貼身侍候，不過，最精采的，莫過於可以當眾享受佘詩曼，整個人瞓身壓在對方身上不特止，還得戚頭枕佘胸，可憐阿佘硬食無聲出！

在《花》劇演二世祖的林峯，鏡頭前後皆有人服侍，當日所見，導演要求飾演智障女的佘詩曼躺在街上，讓路過的林峯撲前急救Check心跳，最終被阿佘誤以為色狼而反擊。縱使現場圍觀者眾，林峯依然大無畏，瞓在阿佘身上兼箝到實，之後更索性整個頭伏在阿佘胸口，場面超激。

刻意保持距離

導演連拍兩Take都唔收貨，原本與阿佘說笑的林峯發現記者鏡頭，即上前追問記者：「做咩影我？」當聽到記者解釋他當紅及工作所需，林峯才轉身走開。

有記者在場林峯再埋位就顯得煞有介事，不再像前一刻般箝實阿佘，用手撐起身體與阿佘保持一寸距離，免有肌膚之親。為盡快收工，林峯急說：「你打落嚟啦，唔係我會做唔到反應畀你！」被林大少當眾「訓話」，阿佘即大力扑濕林峯額頭，痛得他面容扭曲。

※阿佘在新劇中飾演智障女，誤當好心林峯作色狼。

※林峯與阿佘拍劇，奉旨瞓身壓住對方，睇得出前者演得非常落力。

※劇情需要林峯為阿佘check心跳，男方在眾目睽睽之下，當阿佘心口做枕頭，雖然女方硬食無聲出，但拍畢後，阿佘一臉尷尬。