嫣然天使基金慈善晚宴 7歲李嫣畫作百萬成交

【菲鵬慈善晚宴】 千嬅露背蹺實丁生

王菲、李亞鵬成立嘅「嫣然天使基金會」,今晚喺香港洲際酒店舉行慈善晚宴,楊千嬅同老公丁子高拍拖出席,一身黑色晚裝嘅千嬅,高貴典雅,蹺實丁生雙雙現身,幸福滿瀉。

千嬅坦言做咗媽咪之後,明白到小朋友嘅重要,故大讚王菲:「佢創立基金,好大功德,佢興建醫院,內地好多人有病,負擔唔到,所以我真心支持,幫到更多人。」

千嬅又謂曾有人建議佢搞慈善基金,但千嬅話唔想假手於人,免賬目不清而告吹。總之依家佢一有時間就做善事,同樣都係做好事。


千嬅同丁生一齊出席王菲夫婦做搞手嘅慈善晚宴,恩愛做善事。

趙薇讚李嫣有藝術細胞

王菲閨中密友趙薇今晚盛裝出席「嫣然天使基金會」,菲鵬愛女李嫣素有畫畫天份,問趙薇會唔會競投李嫣畫作?趙薇就話:「會看看,看過作品,很有天份、藝術細胞,她將會是藝術家。」

至於王菲同前夫竇唯所生嘅女兒竇靖童,趙薇亦大讚對方遺傳咗王菲唱歌天份;咁佢囡囡小四月又點?趙薇就讚女兒都有表演天份,將來比唔比佢加入娛樂圈?趙薇話持開放態度!

另外,近日屢傳趙薇同陳坤友情不再,趙薇今日否認同陳坤不和,仲話:「沒事、沒事。」並強調係炒作新聞。此外,趙薇今日偶遇周潤發,兩人仲親密貼面嘟嘴合照。之前兩人喺《姨媽的後現代生活 》合作過,依家再度重遇,影一張點夠呀?


趙薇否認同陳坤不和。

王菲嘉玲當眾「開拖」爭企位

王菲身為主人家,一身黑色旗袍亮相,密實高雅;至於死黨劉嘉玲,今晚就揀咗穿上粉紅襯黑嘅大露背晚裝示人,唔止銀包毫不吝惜,艷光一樣任睇唔嬲。不過搞笑嘅係,王菲、李亞鵬同劉嘉玲影合照時,三個大人好似玩爭凳仔遊戲咁,爭企位……唔係爭企中間,而係爭唔企中間。最後主人家爭輸咗,三人行合照,一張李亞鵬企中間,一張王菲企中間。

王菲同嘉玲情同好姊妹,friend到爆,已經去到唔計較、乜都share嘅階段。就連老公隻手——李亞鵬隻手,王菲都可以同嘉玲share。只見嘉玲拖住鵬鵬隻手影相,鵬鵬伸手想拖番王菲隻手,點知王菲就包住自己對手,唔俾老公拖,畫面好搞笑。

身為基金創辦人,鵬鵬話,希望今次在港成立窗口,可跟國際醫療、公益機構發展合作,得到搵到更多支持。問到會否投李嫣的熊貓畫,鵬鵬笑言:「我會第一個舉手,還是讓別人投吧。」隻身赴會嘅劉嘉玲被問及早前在康城失落影后,佢表示並無失望,且感成績已超預期。

王菲李亞鵬慈善晚宴 7歲李嫣畫作百萬成交
嘉玲同王菲呢對好姊妹,何事拉拉扯扯?

王菲李亞鵬慈善晚宴 7歲李嫣畫作百萬成交
王菲今晚唔玩潮look,改以端莊示人。


嘉玲背後乾坤


前面一樣性感迷人

王菲李亞鵬慈善晚宴 7歲李嫣畫作百萬成交
嘉玲蹺實鵬鵬,鵬鵬想拖王菲,但王菲就…

黃奕5吋事業線撐場

王菲同李亞鵬因為愛女李嫣天生兔脣,所以夫婦特別成立嫣然天使基金會,幫助有需要嘅小孩,去年更喺北京興建嫣然天使兒童醫院,為慶祝成立一周年,大會今日喺尖沙嘴洲際酒店舉行慈善晚宴,一向喺圈中人緣甚好的王菲,獲好友撐場,劉嘉玲、那英、趙薇、關之琳、楊千嬅、鍾鎮濤同陳奕迅夫婦等到場支持,吸引過百傳媒採訪。

而年頭生咗個B女嘅內地女星黃奕,單拖到場,著住全黑衫嘅佢,晒5吋事業線震撼全場,見佢好醒神,不過就生B後身形真係發福唔少。

另外,黃伊汶亦單拖赴會,佢透露自己有份嘅手錶品牌連續第二年捐錶作拍賣,今次捐贈價值六十萬蛇年錶,希望比去年籌得嘅百幾萬有更好成績。另談度前男友余文樂同吳雨霏拍拖?黃伊汶笑言:「祝福佢條尾!我睇到新聞都咁同佢講,for fun,同佢一直係好朋友。」佢又透露男友陳國坤已向佢求婚,但自己仍未有結婚衝動,所以未答應。

而曾寶儀以超Deep V藍色連身裙單拖現身,晒3吋事業線,大賣性感。


左起﹕黃伊汶、黃奕、曾寶儀,三位都以藍黑盛裝現身。

關之琳否認婚訊

大美人關芝琳以黑色西裝褸配黑色皮褲、中門大開Deep V上陣,有型得嚟亦不失性感,關之琳透露獲朋友邀請,佢笑言投唔起拍賣品,所以捐款比較實際。有消息指佢已同台灣富商陳泰銘結婚,關之琳就否認:「一定唔係!有好消息一定同大家講,o依家一定唔係!」


關之琳、陳奕迅同太太齊撐。

7歲李嫣畫作 100萬成交

晚宴上,第一件拍賣品,係李嫣作品「熊貓與小鳥」,李亞鵬上台介紹:「她那所學校邀請捐款幫助四川,那天晚上女兒發夢,變成小鳥救助熊貓,自己還加題字:『感謝支持嫣然基金』。過去一年,女兒作品在世界各地籌得超過200萬人民幣,我不覺得女兒有藝術天份,而是大家善心大。」

此外,晚宴主持曾寶儀表示父親曾志偉本想來晚宴,但因為佢今晚要錄影《獎門人》嚟唔到,但志偉話要做第一個出價嘅人,所以曾寶儀代老竇出價港幣10萬競投李嫣幅畫,之後由女善長、有「牛央」之稱嘅「股神」劉央出價100萬投得,李亞鵬話:「大家可以一點一點叫價才有樂趣,作為爸爸好滿意這個成績。」此外,黃伊汶捐出嘅鑽石手錶,開價60萬,最後由善長以100萬投得。

李嫣作品「熊貓與小鳥」,最後由「女股神」劉央以一百萬投得。
李嫣作品「熊貓與小鳥」,最後由「女股神」劉央以一百萬投得。

李嫣作畫圖
李嫣作畫圖。

台上發言冇人理 趙薇發火

「嫣然天使基金會」今晚喺香港洲際酒店舉行慈善晚宴,那英、賭王四太梁安琪、向華盛夫婦、任賢齊、鍾鎮濤、范姜、張玉珊、劉嘉玲、趙薇、關之琳、楊千嬅及陳奕迅夫婦等出席。場內舉行晚宴。適逢今日仲係菲鵬幼女李嫣7歲生日,李亞鵬致詞時話:「每張枱都有一枝蠟燭,希望大家一齊唱生日歌。」司儀曾寶儀即說:「希望大家唱生日快樂給嫣然天使會和嫣兒。」

曾寶儀又透露,有人捐100萬,贊助陳奕迅(Eason)唱歌;而趙薇獲委任成為「2013嫣然之星」。趙薇上台講感受時,台下一片熱鬧,嘈到聽唔到佢把聲,趙薇即大咳兩聲,然後話:「說話的人太多太嘈,請將專注力放在台上。」現場即鴉雀無聲,趙薇續說:「希望基金力量越來越大,令更多人受到幫助。」

另,王敏德大女王曼喜被本報拍得當街吸煙攬仔相,今晚王氏夫婦都有出席,王敏德直言唔鍾意女兒抽煙,馬詩慧則謂:「吸煙同毒品冇分別,佢應承會戒。之前有叫過佢檢點啲,但好難改變佢生活。」


嫵媚趙薇


「2013嫣然之星」趙薇抬腮,靜靜欣賞。


王菲同戰友陳家瑛


鍾鎮濤、王敏德


王菲與密友兼好姊妹那英。


大美人關之琳與劉嘉玲。


左起﹕向太陳嵐、梁安琪、陳奕迅夫婦。


張玉珊與那英