2016年港姐冠軍馮盈盈主持清談節目《#後生仔傾吓偈》，經常發表兩性關係言論，本月10日播出第178集的《#後生仔傾吓偈》中，盈盈和麥明詩討論「港姐嫁有錢人」的話題，陸浩明先勾起話題說：「如果男仔入贅就畀人話食軟飯。」馮盈盈即說：「如果我哋嫁畀有錢人，就畀人話睇死佢啦！想吊金龜啦！係雞，係公廁！」麥明詩說：「畀人話選港姐就係為咗咁咋嘛！」

對於言論引起爭議，馮盈盈今日解釋：「其實睇番個節目，我係話如果女仔嫁個有錢人，就會有人話我哋『點點點點點點……』我哋係轉述番，有時喺網上或坊間有啲好偏頗、好不實嘅意見及批評，總有人喺茶餘飯後食花生，畀一啲佢哋好主觀，純粹佢哋嘅諗法擺喺女仔身上。有時坊間對我哋啲女仔或女藝人，係用兩把尺嘅標準去衡量，咁其實對我哋女藝人及出名啲嘅港姐，甚至對我哋女性嚟講都係好唔尊重同唔公平，因為女仔其實有權利去選擇自己幸福。呢啲字眼真係網民成日講，其實睇節目覺得太過火，咁網民用呢啲字眼攻擊其他人都係咪太過火呢？喺網上話人冇問題，拎上節目講就有問題？！如節目上要收歛啲，可能之後再審視吓，用字再溫和啲、忍晦啲，今次引起大家討論，都可以睇吓電視呎度可以去到邊，係幾有價值同意義嘅討論。」麥明詩亦說：「其實只係複述，唔講呢兩個詞彙就講唔到呢件事。其實咁形容女仔都係唔好，來源其實係來自佢哋（網民）。」