古惑仔變古惑佬 演唱會出招冧老婆

鄭伊健、陳小春、謝天華、錢嘉樂同林曉峰由當年嘅古惑仔,變到今日嘅個個結晒婚嘅古惑佬。噚晚就舉行咗第一場《歲月友情演唱會》。

五個古惑佬趁住演唱會大向自己嘅老婆示愛,好似新婚嘅鄭伊健,喺《全城效應》嘅前奏到不停咁唱蒙嘉慧嘅英文名「YoYo」。陳小春唱《相依為命》嘅時候,另外四位就唱「丁丁」,搞到應采兒冧到爆,小春仲要加多句「I Love You」,全場即刻起哄。謝天華唱《你的愛》嗰時,四位就和音唱「Love Tina」。而林曉峰太太康子妮就喺當擔任和音,林曉峰仲好深情咁望住老婆唱《撲火》,四位仲和音唱康子妮嘅英文名「Lilly」。

到錢嘉樂嗰時,佢去到鋼琴到準備,林曉峰就講笑話:「佢始終係武打巨星,要用拳頭彈琴。」之後嘉樂自彈自唱一曲《同一秒》送畀老婆湯盈盈,仲話:「0依首歌對我好有意義,係結婚嗰日一個好朋友唱畀我聽。我練咗幾個月,希望今晚唱來送畀我嘅另一半!」


四位老婆嚟到支持自己古惑老公。

台上五個古惑佬又唱又跳,台下四位老婆就好開心咁喺觀眾席到自拍。

小春向應采兒講「I Love You」。

「 大佬B」吳志雄同屋企人一齊嚟睇。

四位老婆喺觀眾席到冧樣盡露。

林曉峰老婆康子妮幫手做和音,所以喺觀眾上面。

但林曉峰都有向住老婆大唱冧歌。

錢嘉樂就上演一場自彈自唱冧老婆。

謝天華都係向老婆唱冧歌。

鄭伊健就係咁喺前奏到係咁唱蒙嘉慧嘅英文名「YoYo」。

伊健大打出手 險仆親

鄭伊健、陳小春、謝天華、錢嘉樂同林曉峰,五個古惑佬除咗喺個演唱會到向老婆示愛之外,仲唱返當年《古惑仔》嘅經典金曲,好似《戰無不勝》、《我話事》等等,之後五個仲齊齊食雪茄噴煙,好有古惑仔嘅感覺。伊健更大展身手,嚇到台下嘅老婆蒙嘉慧「O」晒嘴。

錢嘉樂第一次做演唱會,成晚同觀眾Chok樣唱歌,完全唔記得晒後面嘅四位隊友,好搞笑。講到識咗20年先第一次合作開騷,鄭伊健就話受到草蜢嘅影響,仲話「古惑仔」都可以搞個組合開個唱。而約滿無綫嘅天華就話係因為失業先會咁,之後另外四個就問天華係唔係想過檔王維基度,錢嘉樂就話:「佢想去政總多啲。」之後天華就話:「今日唔講呢啲。」

唱到《消失的光陰》嗰陣,佢哋五個喺冇用安全帶嘅情況之下,坐住一個巨型燈牌升到成兩米高,降落嗰陣伊健仲唔小心跣腳跌咗一跌,好在冇事。


草蜢都有嚟到支持。

錢嘉樂個樣好似以前拍《古惑仔》嗰陣咁凶狠。

五個一齊食住雪茄噴煙,係唔係表達當年《古惑仔》食煙仔,今時今日就食雪茄呢?

錢嘉樂唱到忘晒形,唔記得另外四位喺後面。

五個坐咗喺離地兩米嘅燈牌上面。

伊健落地嘅時候差啲仆低。

好在最後冇事。

謝天華就勁歌熱舞。

伊健先轉個女仔。

之後到伊健畀人轉。

最後仲畀人用木箱打。

古惑仔浩南哥 抱女玉腿當武器

睇完相都唔夠喉,咁點會得咁少?好似伊健英雄救美以一敵百,仲以女方一雙玉腿當武器,大展旋風掃堂腿功架,令人擊節讚賞;伊健仲要俾壞人掟落木箱,成個「撻生魚」咁,睇到觀眾席嘅蒙嘉慧O晒嘴。

唔少得當然係舞王謝天華表演佢最拿手嘅舞步,同埋林曉峰露點打鼓晒紋身……sorry,其實佢係著咗件肉色衫0架,但粒「釘」就係真嘅。


真係好白好白呀


死咗??


man to man!型!

林曉峰露點?肉色衫嚟0架。


呢幾位古惑佬太太真係…


錢嘉樂彈琴?

謝天華舞王再現!


呢兩位fans,反應好極端。


見到呢身打扮,都覺得好熱。

都係咁樣舒服啲


林曉峰靚老婆康子妮

險象環生