李思捷郭晉安單立文曹永廉 4熟男出股惑

李思捷、郭晉安(安仔)、單立文(豹哥)、曹永廉(阿廉)主演的無綫新劇《熟男有惑》被轟涉抄襲張東健主演的韓劇《紳士的品格》,四位大男人懶理批評,你有你轟,我有我死撐,齊齊睇好《熟》劇掂梗!並自爆大結局會出「股」惑,齊齊露股掀高潮,李思捷自豪不需用替身,曹永廉卻自卑說:「見到佢,我好唔開心,佢啲毛好長!」

《熟男有惑》開播不久即接投訴,被指抄韓劇《紳士的品格》之餘,又被投訴劇情影射韓國人氣組合「少女時代」,投訴接到手軟。劇中四個大男人李思捷、郭晉安、單立文及曹永廉卻視投訴冇到,李思捷對《熟》劇信心十足,一口咬定:「收視掂梗!」如果萬一唔掂呢?思捷、安仔與永廉即刻瞪大雙眼,三隻手指着豹哥,咬牙切齒說:「唔得;就賴豹哥!得;就係我哋四個功勞!」擺明隨時卸膊。

四個男人兩個墟

如果說三個女人一個墟,他們四個男人應該是兩個墟,他們預告最後一集將會齊齊露股,他們疑幻似真說:「真係㗎,你唔信呀?我哋真係露晒㗎!」記者笑問邊位需要用替身?李思捷自豪地搶答:「我使乜用替身呀!」阿廉卻耷晒頭:「我見到佢(李思捷)……好唔開心,佢啲毛原來好長!(腳毛)」豹哥則蠱惑地哈哈大笑:「睇到佢哋,我嗰度都縮晒(肚腩)……。」豹哥拍拍自己的豬腩肉,搖頭歎息:「佢哋三位都冇肚腩,唉...」李思捷突然坦白自爆:「其實我都縮咗……腩。」安仔、阿廉同豹哥即嘩哈哈的捧腹大笑,鬧他:「衰仔出蠱惑。」

安仔有冇後悔結婚?

安仔、阿廉與豹哥同是有家室之人,尤以安仔與阿廉拍劇時行埋就講湊仔經,老婆經,問思捷可有搞到他心郁郁也想成家立室?思捷認真地說:「想㗎!」阿廉在旁催他:「係就快啲喇!」思捷胸有成竹似的爽快答:「5、6年後喇。」豈料安仔突然一臉認真似是以過來人身份,提醒思捷:「你要諗清楚至好喎!」大家又再巴喇巴喇的追問安仔係咪後悔結婚、生仔,又話要即刻打畀安仔老婆歐倩怡,吵到拆天。

該劇可消減大家怨氣

他們表示好難得四人一齊拍劇,第一次行埋合作,安仔同阿廉都依依不捨說:「煞科時唔捨得㗎,大家玩到好開心,好似四個大細路,最鍾意聽豹哥吹水講媾女。」豹哥開心說:「呢部係好開心嘅劇,香港怨氣太重,希望呢部劇可以消減大家怨氣,而且想帶出一個訊息,香港其實有好多機會,睇吓你自己有冇把握。」思捷自稱冇怨氣,豹哥即吹水笑說:「我都冇怨氣,因為我鍾意養寵物,狐狸精喇、雞喇……我都鍾意,不過,佢哋個個都唔講呢啲,冇人陪我吹水,冇癮!」。

李思捷郭晉安單立文曹永廉 4熟男出股惑