兩輯《衝上雲霄》縱相隔 10 年，但 Sam 哥魅力就像紅酒愈陳愈有味道，港女至 buy，《衝Ⅱ》一直高企的收視，吳鎮宇如上身般的神級演繹居功至偉。他「演戲演全套」，真的跑去考了飛行駕駛執照，認同飛機師的專注、專業、靈活執生的精神，均可套用於演戲以至做人處世的要求，才能達致雲外看新生趣的境界。
劇中人 Sam 哥唐亦琛，是香港第一個華人機長；吳鎮宇可能是繼王敏德之外，另一位識揸直升機的藝人。都說鎮宇對 Sam 哥一角情有獨鍾，除不諱言如有機會的話，也想續拍《衝上雲霄》第 3 輯；年前，演機師演上癮的他考獲直升機駕駛執照，還要是一 take 過搞掂。
給觀眾最靚的我
「男人的興趣多是想到天上飛，我揸直升機，take off、landing 等不像固定翼般出現咁多變數，會好玩啲。直升機得意在於看似懸浮在半空，其實機師是做了好多動作（他即場示範手腳如何協調）來好好控制它。而四肢協調就好考你個腦袋能否 concentrate，幾似打坐的方法。」難怪《衝》的演員常說休息時不敢打擾躲在一旁打坐的鎮宇。
「等埋位時瞓覺仲攰，打坐會更精神，只是我一直搵唔到一個好地方來打坐。相比揸直升機，潛水更似打坐，打坐不是『冇嘢』，但又不是『好郁』，要經過一個好『動』的過程中沉澱自己，是靜中帶動。」閒時愛看書自娛的鎮宇，對心理學頗有研究。「就如一個外表看似冇嘢的人，其實內心有好多盤算。演戲也是如此，你搵到個角色就夠了，毋須再計較他是做得對還是做錯了，我們本身也不會每天檢視自己。只要將自己變成那個角色，之後就可征服觀眾。」
征服觀眾除了講演技，在 Sam 哥∕吳鎮宇身上，還可看出一個「型」字甚為煞食，他在兩輯《衝》的「飛機頭」髮型，走前了 10 年，迄今仍受潮男追捧。「兩輯都是 TVB 找專人打理我的髮型，每個觀眾都鍾意睇最靚嘅嘢，我就畀他們睇最靚的外在及內在。上輯我也不是刻意扮型，只是不想似回鄉探親般拖喼，所以改為拎住個喼，仲要大家一齊拎住，我覺得可以由自己改變某些定律，玩吓啦。」
專 業
鎮宇口裏說的「玩」，潛台詞其實是專業，演員要進入角色有很多方法，他身兼自己的服裝指導可能是其一。「拍時裝劇，我鍾意幫自己角色買衫，如《古惑仔》的o靓坤、《無間道》系列的倪永孝，都是與 designer 一起買衫，上輯《衝》也如是，自己生意嘛，穿私伙衫又合身些，不斷拍、穿舊了更有人氣。」他卻澄清前陣子被眼尖的網民發現《衝Ⅱ》的深藍色風褸疑似是 97 年的《難兄難弟》戲服，他笑說只是衫有相似而已。
10 年前後的兩輯《衝》都能 hit 中觀眾，引起話題，戲路縱橫的鎮宇，既然是影帝級數，自然了解觀眾的口味。「觀眾睇劇口味從沒改變，電視就是照顧普羅大眾。有時演員愈聰明、愈有天份冇咩用，我闔埋眼就知道甚麼才會令套劇開頭好睇啲，如本來提議同夏晨多啲交流戲份，又或用多兩集講 Zoe 由生到死，而我做完頭兩集就消失 5 集，之後再出現，我覺得這樣會較震撼，但劇組唔想太 bad mood、不能帶出新角色，所以只安排兩場整蛋糕戲份給我，來交代 Zoe 離世前因後果。若按照報紙上被寫成的『吳鎮宇好躁底』形象，我係好應該『鏟』劇組點解只得兩場戲。恰好 Captain Cool 一出場就好吸引到觀眾，分散了他們的注意力，而唔覺得 Sam 開頭的戲份交代得不夠。」
桀驁難馴的鎮宇，當然有其自己一套。「拍電視是一個奇怪行業，會不斷遇上不合理的劇情；拍肥皂劇要去感動觀眾就一定會用上死人塌樓、妻離子散等情節。例如 Sam 對着 Zoe 遺體一幕，被宣傳為叫觀眾拎定紙巾睇，但我不想太催淚，搞到好似 Sam 哭墳般崩潰，唔需要餵到觀眾咁白，我便叫導演 cut 短啲；他們更說要搭多個景拍多次，我就以身作則拍完就『撇』，哈哈。我一向都是如此演戲，就係當所有人都話得、一定要係咁做，我就偏偏做一些別人冇做過的事先好玩，成功失敗都是自己負責任。」他透露正參演一部內地劇：「我角色很貧嘴，把口唔停，工作人員說唔係好啱我做，我就說：『咁咪啱，唔啱我做就即係啱晒我做。』」
不改對白
近年遊走國內、香港，既拍電影又拍劇，鎮宇悟出一個鐵的定律：「凡是第一次寫劇本、第一次做導演的就唔好搞我，問他又唔知想點，他緊張個鏡頭仲多過我，我無謂再受這些苦。」執過導演筒、曾做棟篤笑的他，原來不是一個會改對白的演員。
「從第一輯《衝》開始，我就將自己變成劇中人（拍劇時他在微博發帖也是用了唐亦琛的身份），一瞓醒就係 Sam；第二輯沿用這方法，唔睇劇本只記分場，我寧願將時間來瞓覺好過，你睇我個樣已是攰到癲咗，入廠先記對白，因我記憶力比其他演員好嘛，哈哈。」
父親角色
鎮宇笑說這些年來遇上一個很特別的角色，就是「父親」，因他的兒子已將屆入讀小學之齡。「在囝囝身上最好玩的，就是睇番自己。點解他天生就係咁？會想到是自己遺傳了一些東西給他，我可以在他身上學番、搵番自己最原本的東西。當睇見他有些事是唔順眼的，就會諗自己是否要改；相反，他有時幾得意、幾癲、幾 enjoy，我就要 appreciate、要珍惜，因為這些都是好天真爛漫的感覺。我個仔幾好笑，他可以同自己玩一日，就好似我也可以自己一個人過一天，我細個時唔需要朋友。我成日都講，我做演員是入錯行，因為冇得自己同自己玩。」
鎮宇選擇安排兒子在香港接受教育，並已做好準備從旁指導他面對當下躁動的社會。「其實我一直都傳送一些幽默感給他，因為我是在好後來的時候，才明白暴力與非暴力這兩個口號都是不對的，因為非暴力只是將自己想發出來的暴力遏抑，其實人是可以好暴力，只是揀了非暴力。提倡非暴力，本身就有暴力的存在。而幽默是一個好唔同的境界，我長大後才懂得用幽默來面對世界，雖然我未必每次都做到好幽默，又或者令別人明白我唔係好幽默的幽默感，但我自己 enjoy、幽默到自己就夠了。」
悅讀˙憎簡體字
吳鎮宇愛以閱讀清空自己：「有日拎本《莊子》睇，真係愛不釋手，它是棟篤笑、相聲的始祖，所有的幽默感都在其中，它將這世界諷刺得太好笑，奇幻處係可以比我喜歡的日本作家芥川龍之介、夏目漱石更奇幻，所以買了《說文解字》一併睇，希望日後唔使睇註解，就能明白古文兼『嗒』到書的箇中意義。而文言文是可以放在好多地方上，如演戲便可以更簡潔。」
說起古文，鎮宇極度推崇正體字。「簡體字，望字而不能生義，正體字則不同，我會教兒子『男』字，就是在田內出力的人；『窮』就是一個人在洞穴生活，身體仲要彎到好似一把弓般，你話係咪好窮？既好玩，又可教小朋友學中文。」