吳鎮宇點醒陳法拉 高處未算高

縱橫影視圈三十多年的吳鎮宇，十年前憑《衝上雲霄》「Sam哥」一角深入民心，十年後在續集中遇上張智霖同場較勁，仍憑出色演技備受關注，片酬急升至逾千萬港元一部。雖然男主角齊齊彈出，但兩位女主角陳法拉及胡杏兒卻慘遭狠批，恨越級做影后的法拉更因眼淚唧極唔出遭網民狠批。曾與法拉傳不和的鎮宇，坦言有感對方演技未夠班，更大讚仍未躋身一線的胡定欣，擺明冇面畀！

無綫劇《衝上雲霄》相隔十年推出續集，原以為載譽歸來，可惜因林子祥的主題曲不對觀眾胃口，原有班底所剩無幾，即使吳鎮宇的「Sam哥」飛機頭有幾型，張智霖的「Cool魔」有幾靚仔、幾識冧女，都難免被網友枇評，難怪「Sam哥」在劇中感嘆：「有啲嘢係無可取代，亦毋須取代。」

被寸戲屎要讀戲劇

被網民插得最甘的是在《衝II》中和視后胡杏兒同樣孭飛極重的陳法拉！一心瞄準視后及影后目標進發的法拉，為求突破，第三集已急不及待喊苦喊忽玩煽情，可惜「成也風雲，敗也風雲」，原為Show Time的唧淚位，因為眼淚谷極唔出，惹來全城圍插，網民留言狠批法拉出道多年依然戲屎，直指她是《衝II》敗筆，力數她五宗罪：「欲哭無淚」、「Punk妝過濃」、「演技浮誇唔夠自然」、「咬字唔正」兼「同對手格格不入」，更諷剌她遠赴美國讓戲劇選擇正確。此外，還有網民將法拉飾演的「Holiday」一角跟葉璇當年在第一輯中飾演的「Zita」比較，結果無論外貌、演技及受歡迎程度，法拉都慘輸九條街，箭靶程度力壓「胡囧」胡杏兒，就連張智霖(Chilam)亦曾當面批評法拉性格及感情太過硬朗，欠缺女人應有的柔弱感。

「冇乜睇佢以往點喎！」

其實法拉自開拍《衝Ⅱ》以來已是非不絕，除了傳出她在法國拍外景期間日日遲到，辣㷫化妝師在微博不開名鬧爆外，亦有指因工作態度問題及扭計未肯現身宣傳，而惹來鎮宇及Chilam狠批唔夠專業，更揚言以後不想再跟她合作。雖然鎮宇事後否認不欲再與法拉合作之説，但接受本報專訪談及法拉時，他有感對方演技仍未夠班：「法拉要求比較高，好多嘢佢會抽離去睇，睇吓自己係咪已經最好。但其實冇話去到最好，因為我哋（指與Chilam)永遠比你更加好，哈！即係如果講實話，最好、唔係最好，難有一個界線，只不過我哋睇出嚟會好啲，因為我哋唔會Care咩係最好。」

他又指法拉太專注自己：「佢要放鬆啲，做電視一定要咁，要享受一氣呵成，可能女演員比較着重效果多。據聞好多演員都好Concerm自己嘅命運，我都會表達意見，但主要係角色性格，而唔係角色嘅命運。」更坦言與法拉合作之前，從來沒有留意過對方：「但同以往比有冇突破？我冇乜睇佢以往點喎！」

叫視后胡杏兒跟吳卓羲學嘢

對於法拉被指經常遲到，鎮宇答案充滿玄機，他説：「我好難答到，因為我哋個Rundown都未必On Schedule，冇理由因為一個唔On Schedule嘅Rundown而去Challenge。例如本來佢應該係九點（到），但去到十點先拍到佢，咁究竟佢應該十點返定九點半返？某啲已做到好好，九點半返到嚟，當然亦係遲咗半個鐘，因為Schedule係九點。當然你用呢啲方面去Judge(判斷），你就會煩啲囉！咁究竟有冇人停晒，真係去等某啲人呢？我諗冇發生過。」

胡定欣欠機會發圍

談到網民另一狠插目標、早前盛傳不和的胡杏兒，鎮宇雖然認為對方演技有進步，但卻提點她生活態度出事，應向吳卓羲學習：「我覺得佢要再學會放鬆啲，好似卓羲咁！我覺得有時喺呢行，女仔對事業上嘅要求係高過男仔，要嘅嘢係嚟得快啲，因為年齡會成為佢一個壓力。佢十年前都係比較緊張，依家壓力反而嚟自自己想再好啲，但有壓力，會睇唔清楚其他嘢，變咗達唔到想要改變自己嘅效果。改變唔係話你肯嘗試咩唔同角色，係你肯嘗試改變自己生活上某啲睇法或態度。」相反對仍未躋身一線的胡定欣，鎮宇則讚不絕口：「我覺得胡定欣值得去表揚，佢啲戲幾好，只係爭咗創作人畀機會佢，佢需要一啲更爆嘅嘢，例如一個更好嘅角色。」

不滿編劇唔認真

就連十年前合作時遭鎮宇狠批冇做功課兼遊魂的吳卓羲，鎮宇不但認為他有比杏兒優勝之處，就連自己都有比不上卓羲的地方：「佢待人處事叻咗，當然戲都有進步，其實《衝II》嘅角色係適合佢性格嘅，但有啲角色就未必適合佢去演，但無綫又想畀好多唔同角色佢試吓，但我覺得佢開始變得能屈能伸，愈來愈適合做呢行，因為佢唔係夾硬壓抑自己，反而我都唔係好適合做呢行。」向來不平則鳴的鎮宇，被問及後輩有否做功課時，竞衝口拋出一句：「連我都冇做晒功課，因為冇功課可以做。通常啲劇本係當日或前兩日先有，但對我哋都冇影響。」

除了暗示無綫「飛紙仔」外，曾狂鬧PA的他還暗寸編劇處事未夠認真，令他對角色變化大感不解，演繹時未能得心應手：「Sam哥係好專一嘅人，但去到最後，點解可以忘記對前妻嘅心結，同法拉開花結果呢？我見佢哋（編劇）都費事寫，我有問佢哋點解可以同法拉喺埋一齊？但佢哋話冇乜點解，咁我就再追問即係點做？係邊一場要交代。」

湊仔論冇譜 聚少離多冇所謂

緊張合作演員表現的吳鎮宇，對於囝囝則抱開放態度。雖然他近年主力北上拍劇搵真銀，少了時間陪囝囝，但他認為沒有問題：「冇辦法，男人係要做嘢，我父母當年都唔係畀咁多時間。每個人有自己崗位，佢條命係咁（指阿爸少喺身邊），如果出生喺內地，冇兄弟姊妹之餘，父母都係要返工搵食o架！一年可以有幾多時間（有人陪）？」他直指即使身在香港，可以真正與囝囝相處的時間亦是寥寥可數，對增進父子情幫助不大：「我同你講真，個仔只係瞓覺嗰陣知我瞓咗喺佢隔籬o架啫！佢朝早七點起身返學，跟住返嚟屋企，都唔知食唔食到飯，佢返嚟，我一係出街，一係忙住做自己嘢，然後佢坐一陣又要出去補習，九點瞓覺。最多係夜晚見一陣，但呢一陣見同唔見，分別唔大囉！」就連接送兒子返學放學，鎮宇亦因為要配合低調作風而選擇放棄：「無謂畀人哋做文章嘛！」

出名錫仔錫到燶的鎮宇，自言不會刻意親子，更以妙論比喻父子情：「嗰啲人有幾何見到明星？咪又係一世咁追住明星嘅愛！就係咁簡單，由佢自由發展，點解要強求同人哋嘅生活一樣呢？幾多天王巨星單親家庭呀！我依家又唔係單親家庭，只不過係爸爸要去做其他嘢，我諗唔應該有個譜（規範點樣去親子）喺度。」

影帝論影帝 黃秋生讚轉數快 1秒入戲

好戲之人黃秋生與張家輝，曾與吳鎮宇在電影《黑白道》及《放·逐》中，互較演技，三人在《黑白道》中，更是鼎足而立式的較量。

秋生對於鎮宇這位跟他一樣被封為圈中「躁底王」的老友，他説：「我知好多人講《衝上雲霄Ⅱ》，但我呢排忙緊做舞台劇，邊有時間睇電視？不過，鎮宇呢個人做戲係你估唔到，轉數好快，佢係一秒入戲，呢頭同你玩緊，嗰頭就入戲，直頭傾都唔使傾，同佢合作，你永遠唔使擔心！」不平則嗎的他更笑説：「同鎮宇合作我最舒服，因為每次我想鬧人之際，佢已經出咗聲鬧，根本唔使我出聲！」

至於家輝對於鎮宇評《衝II》兩位女主角陳法拉及胡杏兒不懂放鬆，應該向吳卓羲多多學習，家輝笑説：「鎮宇都唔係幾識放鬆咋喎！做事都唔算圓滑，如果唔係就唔會有當年『麵包舖事件』啦！」剛由外地返港的他稱稍後會追睇《衝II》捧老友場，順道拆解鎮宇為何相隔十年，仍能帶起飛機頭熱潮，他更不忘拿鎮宇來開玩笑：「個劇入面坐佢揸嘅飛機嗰啲人好嘢，吳鎮宇揸嘅飛機都夠膽坐？你話唔係勇係咩呀？」

火爆惹官非

直腸直肚的吳鎮宇十分惹火，不止一次因與人起爭執要鬧上法庭或賠錢。

麵包店事件

2010年1月，吳鎮宇載太太王麗萍到九龍城買麵包時，因太太對職員描地揚起灰塵不滿，惹來店內男顧客微言而起爭執，原在店外等候的鎮宇得悉後即衝入店內護妻，混亂中男顧客與吳太齊齊跌倒地上，男顧客報稱被鎮宇用手叉頸及掌摑，亊件驚動警方，最後鬧上法庭，鎮宇最終承認襲擊引致他人受傷罪名，被判罰款他萬元。

愛犬咬死狗

2009年4月，吳鎮宇飼養的秋田犬突然狂性大發，咬死鄰居所養的約瑟爹利犬，更將獵物叼回家中，事後鎮宇太太親自向鄰居道歉兼賠錢。

欠裝修尾數

鎮宇於2004年以二千多萬買入西貢豪宅，於2006年因拖欠百多萬元裝修尾數被裝修公司入稟追討，不過鎮宇反指裝修質素欠佳而向對方索償。2009年4月，鎮宇被判敗訴，除要付清裝修尾數外，還要兼付原告一方的訟費。

Sam哥效應 三千萬Easy執

「Sam哥」吳鎮宇的《衝上雲霄》成為觀眾心目中的經典劇，相隔10年的《衝II》，不只令他人氣再次彈起，也令他工作排山倒海接踵而來。據知，貴為影帝級的鎮宇片酬已躍升至千萬港元，認真唔嘢小！

電視藝員訓練班出身的鎮宇，由跑龍套角色做起，及後演出劇集《蓋世豪俠》、《公私三文治》及《卡拉屋企》等才為人熟悉，後來參演《難兄難弟》模仿謝賢，演出生鬼，人氣急升。不過此後他轉戰影壇，1999年憑電影《爆裂刑警》成為香港電影評論學會的「最佳男主角」，再憑電影《鎗火》成為第37屆台灣金馬獎影帝，風頭一時無兩！有了一部爆紅電視劇，加上影帝名銜，鎮宇開始開拓內地市場，由於要兼顧電影及內地工作，故甚少演出本地劇。他在 內地叫價屬一線演員，數年間賺了不知多少桶金，不過向來不擅投資的他較愛揸現金，未有買磚頭保值，多年來一直住在西貢君爵堡獨立屋，代步亦只是普通的七人車及家庭車，價錢只需數十萬元，贯徹低調作風。

近日鎭宇承接《衝II》氣勢身價升幅不少，片酬逾千萬，據知他已接下三部片約，估計有三千萬落袋，加上鎮宇經理人收到不少邀請他工作的電話，有商演及廣吿等酬勞相當可觀，奈何已有三部片約在手，檔期方面也需作出調配，未知能否順利接Job，不過估勿論結果如何，「Sam哥」角色已為鎮宇至少帶來三千萬進帳。