吳鎮宇 Sam哥魅力回歸

回憶總是最美好的。吳鎮宇10年前在《衝上雲霄》先與陳慧珊上演一段有緣無份的愛情,最後情歸當年仍屬新人的胡杏兒,這段感情曾幾何時觸動你我他。事隔10年,鎮宇回歸,不過身邊由胡杏兒改為陳法拉,能否再締造另一個美好回憶,仍有待下回分解。對於與杏兒這段不能延續的愛情故事,鎮宇說:「我幾鍾意喺Zoe離開,我哋懷念番一個人嘅浪漫感。」

撰文:何慧斯

吳鎮宇 Sam哥魅力回歸
■吳鎮宇因為觀眾和兒子,再度回歸機師行列,結果再度俘虜女人心。攝影:仇志德

吳鎮宇與兒子
■鎮宇坦言拍《衝II》令他最大的得益,是賺了與囝囝的相處時間。
微博圖片

最近網上經常出現一條選擇題:在無綫《衝上雲霄II》中,你會揀Sam哥定Cool魔?這問題答案的爭議性,相信可以媲美有雞先定有蛋先。不過事實可以證明,由吳鎮宇飾演久違了的Sam哥魅力依然,大家仍然記掛着深情專一的模樣。宣傳當日,鎮宇沒有梳上機師頭,還換了一個清爽的短髮,再架上一副黑框眼鏡,他解釋反正已經不再是那個髮型,倒不如索性剪短,總好過頭髮不長不短。

談到外界對吳鎮宇在《衝II》以悲劇人物先登場,直到他完成了Zoe臨死的承諾,梳上機師頭,回歸機師行列後,Sam哥瞬即成為大眾的焦點一事,鎮宇坦言事前並沒有刻意設計過,他說:「我哋又唔會分析個角色點樣做,埋位就做,喺戲劇嘅距離只係講三年左右嘅事,所以我只係緊張喺唔好變得10年後嘅感覺好強,佢哋話我上一輯做得老積咗,可能當年啲嘢行得快咗,好似髮型呀,嗰首歌呀,變咗好多嘢o依家睇番都唔會太舊。喺呢集可能啱啱好,本來想着番10年前啲衫,但係冇乜機會,因為季節唔啱,嗰陣係秋天,但係o依家法國係冬天,着少件都暈呀,所以想着番都唔得。」

乖仔推動出山拍劇

鎮宇續說:「其實啲編劇話本來寫得仲深啲,但係一路都睇唔到佢喺邊度可以出到,個人唔知點解咁開心,所以不如正路啲,用一個頹廢啲嘅look,等觀眾容易啲閱讀角色本身嘅心情。」

印象中鎮宇甚少參演續集,今次他罕有地重披機師制服,鎮宇坦言事前經過一番掙扎:「係呀,唔係好想拍續集,無謂喇,但係我拍親嗰啲都好想拍續集,好似《難兄難弟》,不過最後都冇續集。其實真係觀眾嘅壓力,真係有觀眾問我點解唔拍呀?猛叫我拍喇,拍喇,唔係我想拍就拍,本來係計劃拍青春版,直到拍完《Laughing Gor》之後,唔知點解又傾吓,見到咁多人講咪試吓囉。」

最終能夠打動鎮宇的心,其子實在功不可沒,他笑說:「對我最大嘅好處,其實係嗰半年可以留喺屋企同個仔玩,如果有劇集出街,BB喺電視見到爸爸出現,又會有一種好得意嘅感覺。呢段時間佢好鍾意睇電視,又會學人哋講嘢,不斷模仿啲對白。其實我試過帶佢返錄影廠睇我拍戲,因為唔係咁多時間可以畀到佢,電影又多數喺內地開工,俾佢睇到我工作環境嘅機會少咗好多,佢去到錄影廠覺得好奇怪同周圍望,好奇點解啲飛機飛唔到,啲人企晒喺度。」

吳鎮宇 Sam哥魅力回歸
■雖然鎮宇和張智霖生於不同年代,不過兩人在劇中的迴響很大,獲一致好評。劇照

吳鎮宇 Sam哥魅力回歸
■鎮宇坦言喜愛與Zoe的戲,感覺上是一個延續。《衝上雲霄》劇照

吳鎮宇 Sam哥魅力回歸
■鎮宇和陳法拉在新劇中,不知不覺擦出愛火。《衝上雲霄II》劇照

享受粉絲網上互動

這角色有否在演藝事業上對他有很大幫助?鎮宇坦白說:「真係冇乜,又冇乜登台搵真銀,只係多咗的女性同家庭主婦觀眾,對收入嚟講唔係好幫到手,但係自己真係拍得開心,因為當時係第一個做飛機師,係一個構思好新嘅電視劇,而且呢10年媒體好發達,可以翻睇,變咗唔同嘅年齡層,好似80後、90後睇完都覺得個感覺OK,迴響亦變得好大。如果10年前嗰啲,已經抱晒孫,仲邊得閒同你上網講嘢。」

相信因為這關係,向來只專注工作的鎮宇,竟然在微博與粉絲互動,他說:「平時我都唔慣post相,後來咪諗吓試吓用呢個人物嘅感覺嚟寫一個微博,測試吓大家對呢個人嘅感情,所以咪post吓佢啲劇照上去,我覺得其實係幫到吳鎮宇一個忙,我本身冇乜自己嘢可以分享,但係角色嘅點滴可以大家分享吓,再加上呢個角色係大家想知想睇,試用呢個人嘅心情去寫啲微博,試過之後個感覺都幾得意,只係唔知會唔會太過劇透,又唔知啲劇照可唔可以上傳,所以多數post啲有自己在內嘅劇照,又或者係一啲幕後花絮。」

多得夏晨鬧醒


■因為夏晨的出現,令Sam哥可以表達對Zoe的那份遺憾。

當年吳鎮宇的機師look迷倒不少女生,但最令大家感動的,當然是他深情又專一的模樣,當日他與陳慧珊的一段無疾而終的感情,的確令人感覺遺憾,後來與胡杏兒演的Zoe的一段情,又擦出意想不到的火花,到了今天,Sam哥身邊換上陳法拉,似乎又令人留下多一份遺憾。提到兩段感情,鎮宇說:「鍾意同Zoe嗰啲戲多啲,呢次幾乎係一個人演,感覺上係一種延續;同法拉嗰種唔係濃烈,反而到最後,大家不知不覺間產生咗一種愛情,好多嘢亦係順其自然發展出嚟。」

吳鎮宇 Sam哥魅力回歸
■鎮宇稱開拍前沒有刻意設計Sam哥這角色,一埋位便很自然地演。

宣洩感情

鎮宇更說:「其實係幾奇怪,同Zoe啲戲會嚟得特別好啲,真係未試過,好似有場戲夏晨(胡杏兒飾)話借3分鐘畀你,有乜嘢就同我個樣好似嘅Zoe講。呢場真係好得意,講完對唔住,發洩咗之後就醒咗,仲覺得有啲唔好意思,感覺好似真與假之間。」這是因為Zoe離世時,Sam哥並沒有在她身邊,於是令他的人生一直留有遺憾,最後夏晨此舉令Sam哥釋懷。

鎮宇再說:「仲有另一場講我放逐幾年後做番飛機師,梳番個飛機頭,由英國返到香港,見完工又同啲細佬妹喺個廳度傾完偈之後,返到房突然靜咗落嚟,係一個好惆悵嘅情緒,有啲人有問我點解,我覺得應該係咁樣,呢間屋冇住過,本來喺英國唔使面對咁多人,結果可能編審用咗呢個感覺,寫番我第一次着番制服,好多同Zoe有關嘅嘢,慢慢滲出嚟。我幾鍾意喺Zoe離開,我哋懷念番一個人嘅浪漫感。」

場地:富豪機場酒店
化妝:黃榮謙
髮型:Pius Yiu姚派(Pi4.com.hk)

Sam哥嫌小儀重口味

《衝上雲霄II》收視持續高企,前晚第9集平均收視32點,最高34點。這集輕鬆搞笑,吳鎮宇演的Sam哥不讓Cool魔(張智霖)專美,都有機會冧女仔。Sam哥被Holiday(陳法拉)捉去相睇,對象是小儀飾演一身女僕Look的婚姻介紹所老闆娘;其實小儀是幫人搞相睇,自己客串上陣。兩人對白、表情搞笑。Sam哥勸小儀衣著不要太重口味,還爆金句﹕「唔係個個都食咁鹹,好傷腎o架!」之後小儀扮睇恐怖片驚,蹺着Sam哥手臂。Sam哥即聲明﹕「睇恐怖片都得,但你驚時擒嗰邊,唔好擒我呢邊!」網民笑說Sam哥好風趣。

據知這次是Sam哥親自邀請小儀演出,之後劇情會講他們以朋友身份食飯,屆時Sam哥會以機師look現身。小儀昨在電話說:「今次真係好多謝鎮宇哥,監製話係鎮宇哥提議我做,連造型都夾好晒,結果由客串一集變成五集。」問她會否再有貓女打扮?她笑說:「唔會,但係Sam哥有一日會着得好有型咁約我,我預咗會俾網民鬧。」