陳敏之嚇親森美老婆

新劇《法網狙擊》收視和口碑同樣不俗，其中初次拍劇的森美飾演的「波地Sir」和陳敏之飾演「艾美辰」這一對，出奇地合拍，更加備受好評。初哥森美日前接受本報訪問，坦言自己演技仍幼嫩，只希望大家忘記他平日嘅搞笑主持形象。森美最感激敏之猶如「阿媽」一樣照顧，敏之就解釋，因知道森美是怕醜仔，曾患抑鬱症的他真人性格比較被動，為了拍攝有好效果，唯有採取主動「冧」對方。由於兩人過份「合拍」，連森美老婆也被嚇親，竟然畀說話森美聽。撰文：杜淑霞　攝影：畢紹基

劇集出街後，森美高興連外甥也叫他「波地Sir」，但自知演技仍有進步空間，「凌晨3、4點拍廠景，睇見天華話喊就喊，我真係覺得自己好差，不過起碼大家無再當我係森美，算叫做過咗關。」森美說。

正能量治抑鬱症

在熒幕上，「波地Sir」和「艾美辰」相當合拍，原來現實中森美和敏之亦相當老友，敏之說：「我哋前年合拍福音電影《翻生奇兵》，我知道佢性格其實唔係做節目時咁活潑，反而係好被動、好怕醜，所以今次同佢做一對後，就決定要做主動，佢仲話幾年前患過抑鬱症！我就同佢講，我個人好多正能量，就用一個月時間醫番好你啦！o依家佢開朗咗好多，應該有啲效。」

面對敏之的熱情，森美就似乎唔多受落，「佢真係好照顧我，見我件戲服污糟咗，會捉埋我去同服裝間啲姐姐講，叫佢哋記住幫我洗衫，好似我阿媽咁。」森美話就話敏之「似阿媽」好似覺得煩，實情已被敏之的真情打動，他續說：「老婆知道我份人，真係好少同啲女仔熟絡，電話聯絡都好少，有日我話買啲嘢食畀敏之，老婆即刻話：『嘩！叫敏之呀！咁Friend呀！』佢唔係話呷醋，只係有啲嚇親啫！」

高Ling拍被姦戲覺值得

高Ling（高海寧）在《法》劇，飾演律政司實習生「KiKi」，性格堅強又上進，一洗以往只賣性感的花瓶形象，所以就算在劇中要熊抱梁烈唯，甚至被白健恩強姦，高Ling都覺得值得，「好多謝監製（文偉鴻）畀個咁有發揮嘅角色我。我唔覺得拍強姦戲要大露背或者熊抱戲係蝕底，亦唔覺得特別辛苦，反而小白怕整親我仲辛苦，我其實好開心可以嘗試唔同戲份，如果大家睇完同情我，咁我就成功啦！」

森美和敏之戲裏戲外都相當合拍，難怪連森美嫂都被嚇親。

森美和敏之合拍《翻生奇兵》時，森美替敏之的愛貓畫畫，因而建立友情。

下周必睇劇情

森美和敏之這對，一直只是好同事，下周森美將有所行動；而該劇出名貼近時事，一場白健恩向記者吐口水的戲份，亦似曾相識，大奸角陳煒亦宣告登場。

波地Sir（森美）扮停電趁機幫艾美辰（陳敏之）換燈膽，結果觸電暈倒，要美辰幫他人工呼吸。

龐世邦（白健恩）因被告強姦KiKi（高海寧）而成為傳媒追訪對象，他不滿更向在場記者吐口水洩憤。

向來急功近利不擇手段的龐鐵心（陳煒），為令洪震滔（郭政鴻）出手相助，刻意在男方面對前着泳衣色誘對方。

高Ling跟梁烈唯這一對本來只是實習同學，但唯唯發現女方苦學成材後，由欣賞變成暗戀，可惜高Ling慘被白健恩強姦，令兩人發展受阻。

KiKi（高海寧）為救朋友到龐世邦（白健恩）豪宅，離開時朋友發現電話留在屋內，KiKi單獨折返取回而慘被龐強姦。

Max（梁烈唯）跟一班實習生吃晚飯後突然鯁到，KiKi使出熊抱幫他急救，令Max大為感動，亦令其他男同學相當羡慕。

高Ling認為只要投入角色，親熱戲和強姦戲都不是太難拍。

高Ling坦言跟唯唯合作愉快，還會不時向對方請教演技。