王祖藍、李亞男真人騷娛賓
福祿壽開劇玩長短腳之戀
無綫扮嘢節目《荃加福祿壽》人氣爆燈，繼本月初搬上舞台開演唱會後，明年 3月又將拍成電視劇《福祿壽.com》。據悉，福祿壽繼勁玩自己人林峯後，今次新劇中連自己女友也不放過，正計劃安排王祖藍女友李亞男及李思捷的女友春卷（王寶寶）客串演出，實行擺埋另一半上枱放笑彈搶收視。
由汪明荃、王祖藍、阮兆祥與李思捷主持的無綫綜藝節目《荃加福祿壽》由年頭 hit到年尾，早前播映的《荃加福祿壽玩轉台慶》中，李思捷化身《摘星之旅》的劉松仁上演超級惡搞林峯的《澤駛之旅》，更一度成為網民熱話，令觀眾笑到噴飯。
有見福祿壽人氣爆燈，無綫決定明年 3月開拍一部由阿姐及福祿壽擔正的 20集搞笑劇，暫名《福祿壽.com》。據悉，新劇中除繼續玩寸林峯，將他主唱的歌曲《愛不疚》改編成搞笑版外，更會安排王祖藍女友李亞男，以及李思捷女友春卷助陣，實行連二人另一半也不放過。
無綫即將開拍扮嘢劇《福祿壽.com》，除繼續勁玩林峯外，更帶挈祖藍女友李亞男及李思捷女友春卷客串。設計圖片、設計對白
《荃加福祿壽》明年拍成電視劇，無綫有意加入祖藍女友李亞男和李思捷女友春卷大搞噱頭。資料圖片
盧覓雪演祥仔姊妹
王祖藍與李亞男，以及李思捷跟春卷在劇中有機會上演情侶檔真人騷。至於祥仔方面，則會邀請早前被指是祥仔「失散姊妹」的盧覓雪扮演祥仔的親姊妹，聯同梁靖琪和陳茵媺一起演出。
福祿壽新劇將以 60年代為故事背景，劇情講述本是女副幫辦的阿姐，接手亡夫偵探社的生意，由於當年阿姐舊部下因阿姐的錯失而犧牲性命，阿姐遂許下諾言照顧舊部屬兩名遺孤。偶然機會下，阿姐遇上因生活逼人而要扮女人跳舞搵食的王祖藍，以及做小販的阮兆祥，並發現二人原來是舊部下的遺孤，於是力邀二人到其偵探社工作，聯同本來是警察的李思捷一起扮鬼扮馬查案。
對於福祿壽新劇有意拉埋李亞男和春卷落水，監製關永忠昨日在電話中承認有此構思，他說：「我哋係有咁嘅構思，搵佢哋客串搞吓噱頭，令觀眾有啲想像空間，大家得啖笑。」是否繼續扮林峯？關永忠說：「我哋唔會特別聲明扮邊個，只係畀觀眾去意會。我想強調我哋絕對唔係挖苦任何人，只係攞嚟做 gimmick，同埋我哋都會好認真去做一個劇，唔係單單搞笑咁簡單。」
對於新劇有意邀李亞男客串，王祖藍昨在電話中表示不知情，他說：「我唔知喎！我好希望我哋兩個經濟獨立、事業獨立，但當然唔介意一齊合作啦，但都要睇吓乜嘢劇情，同個劇本講乜嘢嘅！」據悉福祿壽繼本月初在灣仔舉行演唱會後，明年 2月底又將進軍紅館開騷，不過阿姐因為明年 3月要與鄭少秋在紅館開演唱會，以及要演出粵劇，以致福祿壽演唱會 part 2被迫缺陣，對此祖藍說：「我聽聞係想出年 2月喺紅館做，但詳情要問番公司，我都唔係太清楚。」阮兆祥則說：「收到消息明年 3月中會開新劇，係查案小品，大約講阿姐本來係探員，後來離隊自立門戶，我哋三個就跟住阿姐查案。」
阮兆祥（左）跟盧覓雪如孖生姊妹，新劇也會安排二人演兄妹。
雖然福祿壽勁玩林峯 chok樣，但林峯未因此嬲怒。資料圖片
明年 2月紅館開騷
福祿壽計劃明年 2月在紅館開演唱會 part 2，但阿姐因與另一演唱會及粵劇撞期而未能參與。資料圖片
有指福祿壽在劇中將繼續扮嘢勁玩名人藝人，甚至較之前的演出還更過火出位，祥仔說：「我未有詳細去接觸，但絕對唔會，我哋一向都係開玩笑，唔係傷害人，劇集更加唔可以亂嚟，要認真處理，相信大家可以控制到場面。」對於有機會跟好友盧覓雪合作，祥仔說：「未收到消息，但如果真都好有趣。」另外，祥仔表示日內將會知道福祿壽演唱會 part 2可否明年 2月在紅館進行，而屆時因阿姐有雲頂登台工作在身，故只有他們三人演出。
話你知
扮嘢劇玩盡名人紅星
《荃加福祿壽》人氣爆燈，明年 3月更拍成劇集玩盡藝人。無綫和亞視以往均有開拍扮嘢劇，雖然胡鬧，但合晒師奶心水。
《娛樂插班生》（ 95年）
劇集 95年首播，未紅的黎耀祥撚聲扮羅文，令人印象深刻。其他演員梅小惠、江欣燕、林家棟等同樣演技一絕，劇集播出後熱爆全城。
《樂壇插班生》（ 97年）
原班人馬添食之作，梅小惠模仿 Sammi的 Nike眉及那句「好邪」，以及林家棟 chok樣扮歌神學友，依然為人津津樂道。
《娛樂反斗星》（ 01年）
由歐陽震華、鄧萃雯、苑瓊丹主演，劇集影射一眾名人包括謝霆鋒、王菲（圖）、洪朝豐等，平均收視有 30點，不過由於玩過火，當年寶詠琴曾入稟高院控告無綫誹謗，後對無綫撤銷控告。
《十六不搭喜趣來》（ 07年）
亞視製作的處境劇，由扮嘢鼻祖盧海鵬主演，劇集影射陳志雲、六嬸、陳方安生及葉劉淑儀等，啟播時贏得口碑，可惜有頭威冇尾陣，最後因收視太低（ 1點）而改時段播出。
鵬哥：思捷扮女人唔好笑
扮嘢鼻祖盧海鵬扮徐小鳳維肖維妙，他批評李思捷（右圖）扮女人太正經。資料圖片
無綫福祿壽靠扮嘢入屋，身為扮嘢鼻祖的盧海鵬直言有留意三位後輩演出，日前鵬哥在上環綵排舞台劇《才子亂點俏佳人》時，對於福祿壽的扮嘢才能，他評價說：「佢哋都係扮女人啫，唔扮女人都冇乜嘢睇。我覺得李思捷扮女人太正經，其實咁就唔好笑，要扮到似嗰個人，不如搵嗰個人嚟做，唔使扮啦，呢方面祥仔比較好。」
李思捷在《荃加福祿壽玩轉台慶》中扮「的士佬」，令被模仿的陳偉霆感不悅，鵬哥卻反問：「邊個嚟 o架？」當他得悉陳偉霆是蔡卓妍的男友時，才點頭表示略有印象。
勿人身攻擊
有藝人易嬲唔玩得，鵬哥說：「扮嘢呢，醜化就係要醜化 o架啦，但唔好人身攻擊。以前我扮羅文，羅文夠講到要告咯，不過佢都知玩吓啫！」