日本型男福山雅治今晚抵港，為港、日同步上映的電影《神探伽俐略2：真夏之方程式》宣傳。佢聽日將會出席記招同首映禮，先係下午三點現身天際100香港觀景台出席記招；之後到晚上7點，就去海運大廈露天廣場出席首映禮，霸位趁早喇!!

講番今次福山雅治來港，因為係第一次公開來港，吸引咗逾400粉絲接機，以中女居多。今晚約8點半由十幾名工作人員陪同下步出機場，秩序尚算良好，粉絲們亦有自製橫額迎接偶像。

因為粉絲眾多，機管局保安同工作人員俾福山走VIP通道，隨行除有10多名工作人員外，更有12個保安護駕，警方亦有協助。福山雖然行VIP通道，但上車之前，都好識做咁停低俾傳媒影相，又揮手打招呼，更用廣東話講「大家好」。

福山雅治話，見到咁多粉絲接佢，覺得好感動，上車前更向粉絲揮手答謝。日本富士電視台亦有派員來港採訪。最後，福山與工作人員分別坐三架七人車離開。

福山雅治……伽利略，你可唔可以唔好咁靚仔？

由VIP通道出嚟嗰吓，全場尖叫。

福山雅治用廣東話同fans講:「大家好!」

衝呀﹗

非常親民嘅福山雅治，主動行埋去做訪問。

笑得好甜呀!!!

又係嗰句…笑得好甜呀!!!

能夠做到佢身邊嘅翻譯就好喇!!

抵王子飯店嘆京菜

型男福山雅治今日嚟到香港，準備出席聽日《真夏方程式》記者會同首映禮。因為今次係首度公開來港，故就連日本富士電視台都有派員來港採訪。

福山雅治同工作人員分別坐三架七人車，離開機場。至晚上9點幾，一行人抵達尖沙嘴1881 Heritage嘅王子飯店晚飯。該店以京菜聞名。保鑣亦有隨行護送，不過只有數人、包括翻譯陪福山雅治入內用膳。

福山雅治依家仲喺王子飯店食緊嘢呀！