「二佬」福山雅治噚晚先出席完電影首映，今早就去到將軍澳電視廣播城宣傳，以及接受無綫訪問，行程緊湊。為隆重其事，無綫仲安排2012年港姐冠軍張名雅，以及最上鏡小姐岑杏賢充當禮儀小姐罰企迎賓，除有港姐接待之外，更送上鮮花及TV Buddy做禮物。

由於大會早已表示因時間關係，福山雅治將不接受傳媒採訪，故福山只現身大約五分鐘供傳媒拍照，而福山亦表現親民，不時露出笑容。

貴為港姐冠軍嘅張名雅被淪為「禮儀小姐」，佢話：「都應該㗎，佢咁遠嚟香港，我哋要比個warm welcome佢。」

佢更大讚對方有魅力：「好興奮，我都唔敢望佢，好有魅力，由入面散發出嚟，我有同佢講welcome to hong kong，佢都有答返我thank you。」

佢又話因為自己喺英國留學，所以故對佢唔太認識，但日前已上網睇番對方資料，佢話：「原來佢同我爸爸同月同日生。」

港姐張名雅及岑杏賢，變身禮儀小姐，迎接福山雅治。

（左）2012年港姐冠軍張名雅及最上鏡小姐岑杏賢

佢兩個仲獻花畀福山。

福山見到TV Buddy仲開心啲喎﹗

張名雅大讚福山雅治有魅力。