鄧紫棋(GEM)對香港樂壇頒獎禮的看法 4分鐘短片寸商台

鄧紫棋(G.E.M.)近日表明唔會出席1月1號商台叱咤頒獎禮,擺明唔妥玩杯葛,商台DJ Donald噚日就回應話﹕「如果商台唔支持G.E.M.,佢點會有冠軍歌?」、「有好多人都需要支持,最重要係佢應該問番自己,fans點解唔投票畀自己。」少爺占更加直接叫G.E.M.「過主」﹕「每個頒獎禮都係遊樂場嘅遊戲,如果唔啱就唔好去嗰遊樂場嘞!」

今日G.E.M.喺YouTube發表片段,叫做「G.E.M. 對香港頒獎禮的看法」,成條片都係講佢對已變質嘅頒獎禮一啲睇法。片長近四分鐘,句句到肉,更播出商台頒獎禮片段,擺明反擊商台。G.E.M劈頭一句就話,就算佢冇得獎,但如果台上領獎嘅,都係提供good quality音樂質素嘅人,G.E.M話佢會心悅誠服。但依家佢選擇唔去,連台下冇獎嗰個都唔做,何解?條片講晒。

總之,一個字,真係好勇。

鄧紫棋(G.E.M.)
G.E.M.特登拍條4分鐘嘅片,講佢對樂壇頒獎禮睇法。完全不修飾不掩飾,對正各大頒獎禮死穴插落去。

精句如下﹕
「一個頒獎禮嘅存在,佢有佢存在嘅責任。佢嘅責任就係介紹俾大家知,咩叫好音樂,更加有責任令觀眾接觸到更好嘅音樂。」

「想做一個一年度event係冇問題,想搞到一個盛事、好多人嚟參與,係冇問題嘅。你一定忠於自己做緊嗰樣嘢。」(播出商台叱咤畫面)

「佢表達緊嘅嗰個message,同佢實質做嘅嗰樣嘢,唔一致嘅時候,咁樣就係唔公平。如果你嘅言行唔一致嘅時候,我唔知應該尊重邊一樣先至啱。因為你誤導觀眾。嗰件事明明係咁,但你實質做嘅事係另一套。」

G.E.M講到明,好清楚自己做緊乜嘢,好清楚自己嘅方向。相信佢亦好清楚知道,講咗呢番心底話之後嘅後果……後果咪就係,fans大力拍掌讚好話support囉﹗

鄧紫棋(G.E.M.)
講緊有頒獎禮「想搞個一年度event」時,播出商台叱咤畫面。
鄧紫棋(G.E.M.)
仲出埋呢個…指向性甚明確。
鄧紫棋(G.E.M.)
G.E.M心聲

【G.E.M.杯葛商台】藍奕邦叫G.E.M 飲水思源學謙虛
2012-12-31 00:43:03

G.E.M.噚日(星期日)拍咗條成四分鐘嘅片,寸爆商台吒咤頒獎禮。Fans讚佢勇,亦有人質疑,既然G.E.M.講到樂壇頒獎禮必須重視音樂嘅quality,要實至名歸,咁點解佢當日又出席新城勁爆頒獎禮一齊分豬肉。咁又係喎。

憤怒中年黃貫中一見到G.E.M.呢條片,即like爆,更於微博轉發,並寫道﹕「假公平不如真霸道,我來轉!」但亦有世叔伯覺得21歲嘅G.E.M.太自大自我,好似唱作人藍奕邦咁,就喺微博用兩大段文字,袋錢入G.E.M.袋。藍奕邦仲自稱藍uncle,寫道﹕

「小妹妹,既然你覺得香港的頒獎禮比以往少了意義,你又何必勞思動眾為你覺得沒有意義的東西拍一條如此good quality的短片呢?口說不在意,難道心底還在意?G.E.M.,你很幸福,有很多歌迷,也很有才華,若你的音樂真夠good quality,自然會超越制度吧!用花來拍片的時間寫多一首歌吧!還有,切記兩字:謙虛。」

未完,仲有﹕「還有,藍uncle等了八年才得到他們的第一隻冠軍歌。我也是默默耕耘,毫無怨言。你應同嗎,做音樂,就是for your own satisfaction and for the fans, 既然你都知道網絡可凌駕有媒體直達群眾,就專心做好自己吧!噢!你記得人家08年給過你新力軍獎嗎?記住:感恩!飲水思源!」

藍uncle明知網絡威力咁大,但公開喺微博掟個彎話G.E.M.唔飲水思源唔感恩唔謙虛,咁……點算呀﹗


藍奕邦﹕「切記兩字:謙虛﹗記住:感恩!飲水思源!」G.E.M.受教麼?

藍奕邦微博

藍奕邦微博(續)

網民質疑,既然G.E.M.咁不滿頒獎禮,點解明知新城勁爆係太公分豬肉,但佢又去攞獎喎﹗

咁啱得咁橋,新城頒獎禮上,藍Uncle就係坐喺G.E.M身後。