自以為紅遍宇宙銀河系的「國際漿」G.E.M.（鄧紫棋），近日在香港開個唱掀起連番風波，其實她不僅被幕前的前輩後輩狠批，就連幕後一樣辣着！G.E.M.變臉神功出神入化，台前幕後群起攻之，眾叛親離！曾跟G.E.M.合作的星級排舞師High King直言：「永遠唔會再合作！人紅咗，成個人都變晒！」

自從去年參加內地節目《我是歌手2》後，G.E.M.紅遍內地，同時氣燄跟人氣一樣飆升，近日以國際巨星規格舉行個唱，限制傳媒採訪及觀眾不能帶非官方螢光棒入場，引起多位圈中人連番批評。其實她的囂張行為，同樣令不少幕後人大感不滿，身為容祖兒及陳奕迅等紅星御用的星級排舞師High King，2013年曾與G.E.M.的個唱合作，但有傳High King跟G.E.M.方面反目，自此永不合作！

High King接受訪問時坦言以「永不合作」來形容自己跟G.E.M.方面的關係，問到反目原因？他說：「因為有人變臉囉！（關錢銀事？）總之合作時明明講好我收5萬，之後有人叫我3萬蚊搞掂，所以我只係做完澳門同北京兩個站後，同佢講Bye Bye，之後我唔會再接。我慶幸自己走得夠快！」

經理人大吵大鬧

High King指G.E.M.的經理人張丹和G.E.M.在參加《我2》前，為人「好Nice、乜都話冇問題」，但《我2》之後就變臉：「可能人紅咗，成個人都變晒！有次張丹走上嚟我公司大吵大鬧，同我經理嘈，原因係張丹要求我唔可以接其他Artist嘅騷。但係我一年前已經畀人Book咗，照行規係唔能夠推，佢咁做係唔合理。呢件事之後，G.E.M.見到我即刻面左左，唔敢望我！」

High King表示跟張丹冇正面衝突，但在對方身上「獲益」良多：「佢教過我點樣營運舞蹈學校，我想問係咪應該畀番顧問費畀佢？我自問喺呢行廿年，都未遇過咁。容祖兒同陳奕迅咁紅，從來唔會傷害人，又合作得開心，唔似得佢哋咁！我都唔明點解會有呢啲Artist，我諗佢哋好睇小香港樂壇，叫佢唔好返嚟香港做啦！（如果佢哋再搵你合作？）再翻兜都唔會再接！有次有個廣告客上嚟傾合作，我一聽係G.E.M.，價都未問，即刻話唔接，寧願嗰十幾萬都唔賺！」

另外，曾為G.E.M.的2013年個唱擔任導演、現職nowTV導演阿花，有傳當年曾跟G.E.M.方面發生爭執，有人以粗口問候，最後不歡而散，阿花說：「係有合作過，跟佢哋學吓嘢。（你畀人鬧？）過咗去，我唔會再講。（係咪有人用粗口鬧你？）唉！呢啲嘢過咗去，OK啦！我唔方便講嘢！」

五場紅館個唱惹來大堆是非！當中購買價值1,880元VIP門票的觀眾，以為在後台可跟G.E.M.合照，但有指最後是跟G.E.M.的蠟像合照！而開騷期間有五分鐘小休，實情是G.E.M.緋聞男友Lupo的Solo時間。據知跟G.E.M.方面同樣鬧不快的主辦單位，至今未有表態，其實是敢怒不敢言，因該主辦單位之後仍要跟G.E.M.合作新加坡及美國兩站巡迴，故暫時息事寧人。

零粉絲恭候即黑面

不過，剛於周日（18日）完成個唱的G.E.M.懶理是非，繼續巨星風格，當晚全體工作人員在酒店舉行的慶功宴，苦等至凌晨一時半，才見G.E.M.施施然現身，驅車直達酒店時，竟儼如外國巨星來港般在卸貨區落車並即場落閘。直至凌晨3時半才開完慶功宴返回荃灣住所，G.E.M.見到酒店門外零粉絲，只有記者，即使面對鏡頭也照樣黑口黑面！

觀眾提早離場 批評「唔值咁貴」

G.E.M.以國際巨星規格開個唱，真金白銀買飛睇騷的觀眾卻有話說，大多指票價貴得來不值外，開騷約個多小時，已見到有不少觀眾提早離場。

陳生：「我買498蚊都係坐山頂位，無論音響、Band同成個安排都唔好，張飛唔值呢個價，只值兩舊水！不過G.E.M.都好慘，佢叫極啲觀眾起身諗住搞氣氛，但都冇乜人理佢。總之唔值咁貴，如果唔係點會有咁多人睇睇吓早走！」

專程由深圳來港睇騷的女士：「今次係有人送飛先嚟睇，我唔知有太空手帶，但用完要交還都冇問題，好似啲3D戲院都要還番副3D眼鏡啦！」

犯太歲惹更多是非

G.E.M.多生事端，又寸又囂？堪輿學家陳子才指肖羊的G.E.M.犯太歲，今年是非「繼往開來」，事業運再旺上加旺：「今年係佢本命年，會是非不斷、人事不和。基本判斷到佢嘅是非喺今年入面不斷出現，甚至更多。佢性格比較剛強，口直心快，容易惹起誤會。其實佢工作機會喺2015年依然強勁，勢頭會延續至2016年嘅上半年。去到明年，佢嘅運勢會慢番落嚟，但『花無百日紅』，經過時間嘅洗滌同埋挫折係會變圓滑。」而單身G.E.M.的感情運則好壞參半，又甜又苦。

不滿被指抄襲 張靚穎 G.E.M.粉絲互罵

2005年參加《超級女聲》而人氣急升的內地歌手張靚穎，早前在內地節目《我是歌手》第三季中獻唱《餓狼傳說》後，被G.E.M.粉絲指她抄襲G.E.M.的曲髮及快歌歌路以炒作話題，紛紛在其微博圍攻及批評。張靚穎已多次說希望外間別作比較：「我來這裏只想唱歌！」但依然停不了兩派粉絲罵戰！之後，張靚穎在微博轉發自己2012年在深圳舉行個唱的視頻，曲線證明當年已有該造型並唱勁歌，怎料又被G.E.M. 粉絲指她心胸窄！

張靚穎的粉絲也不甘示弱，直斥G.E.M.抄襲張靚穎，並找出G.E.M.訪問時提過讀書時已很欣賞張靚穎的文章，認為G.E.M.才是抄襲者外，又指G.E.M.有見張靚穎在《我》獻唱後，小器得即時取消張靚穎的微博關注，G.E.M.的粉絲作出反擊，指G.E.M.從未在微博關注對方等。

直至本月十日，張靚穎在微博留言：「突然就決定了。今天起，微博會交給公司來打理。現在我只想專心做音樂，原本來參加的時候就不想搞複雜了。感謝！別瞎猜，我沒有任何的不開心，只是有一些覺得分心了。」即惹來外間揣測她是否不想繼續陷入罵戰，而近日張靚穎接受內地訪問，被問到與G.E.M.比較，她說：「我不希望大家再去放大，我來就是讓大家聽歌，鄧紫棋也是很優秀的歌手。」但仍然未能完全平息兩派粉絲的怒氣。

無盡火頭 前輩圍剿

「宇宙巨肺」G.E.M.個唱耍大牌，還將港媒拒諸門外，令不少樂壇前輩為之側目，「樂壇小巨肺」變成「樂壇火藥庫」。

肥媽寸博宣傳
曾勸勉G.E.M.不要再扮Whitney Houston（雲妮侯斯頓）的肥媽，當知道G.E.M.個唱安排如此「貼心」，即暗寸有人博宣傳：「可能係時興嘅宣傳手法，依家佢咪成功見報囉！不過佢喺歌手守則就唔成功喇！」

夏韶聲暗寸忘本
Rock友夏韶聲不平則鳴，寸G.E.M.上位後冇飲水思源：「有啲上位藝人會忘記冇下面班人（指記者）係上唔到去。呢個女仔幾純嘅，可能係佢經理人叫佢咁講啦！如果佢唱到上太空，就拎埋我隻碟上去囉！」

葉麗儀嘲冇規矩
即將開演唱會的殿堂級歌手葉麗儀，對於G.E.M.不將港媒放在眼內，亦暗寸對方唔跟規矩：「佢公司有佢嘅政策，但我哋老一輩就唔會咁囉！（畀忠告佢？）佢咁成功，唔使畀忠告佢啦！」

任由張丹擺布　國際 G.E.M.八年約綁死

有本事辣㷫全港傳媒，國際 G.E.M.（鄧紫棋）絕對是奇葩。打從靠湖南衞視節目《我是歌手2》在內地爆紅，經理人張丹便將 G.E.M.當正巨星，就算做宣傳，亦跟足國際級影星做法，只肯坐在台上接受文字與電子傳媒訪問，排場勁過劉德華。
過去一年， G.E.M.在內地狂吸金，就算五場紅館個唱，她亦只顧集中火力討好內地粉絲，演唱會廿二首歌，當中廣東歌得六首。
G.E.M.香港開騷，但卻拒絕本地平面傳媒採訪，即使有個別電子傳媒獲許入場，也要在指定位置採訪，不可超越採訪區。
對港媒落晒閘，但對內地傳媒則另有態度，包機票酒店，豪華優待。因為怕港媒寫衰 G.E.M.的張丹，對如此大細超安排更振振有詞：「我哋關係係要大家做得好，唔係我哋要喺你哋（傳媒）面前乞嘢。」

G.E.M.搞到今日咁嘅情況，有指大部分原因都是她的經理人張丹一手造成。

是非纏身， G.E.M.也曾向身邊人抱怨身不由己，因為和張丹還有八年長約，只能與經理人坐同一條船。
「同傳媒關係搞到咁， G.E.M.都估唔到，亦唔知點算。好似唔俾觀眾帶熒光棒，要大家買條二百八十蚊嘅爛鬼熒光手帶、又唔俾香港記者採訪，全部都係張丹嘅意思，仲有之前接 job一定要有黑人保鑣、私人飛機接送呢啲， G.E.M.都係事後先知。其實佢同經理人成日都有拗撬，但次次都係 G.E.M.喊住收科，好似前年喺香港開騷，兩個直情喺後台吵大鑊，當時 G.E.M.好想走，甚至自己敲過其他公司門，但張丹有優先權續約，冇走得咁易。
「後來張丹成功搭到路俾 G.E.M.參加《我是歌手 2》，幫佢打入內地賺到唔少，所以 G.E.M.先至肯加監。今次張丹擺明車馬同香港傳媒開拖， G.E.M.都唔敢出聲，因為仲有八年約，嘈完都走唔到。所以佢喺網誌寫話『除了音樂，我甚麼都不在意。』都係叫自己唔好理咁多。」知情者說。
其實香港傳媒也不太在意任何人， G.E.M.大可放心。

是非精

G.E.M.在內地走紅後，要求愈來愈國際級，是非亦同她賺落袋的人仔成正比，滾滾而來。

國際級要求
酬勞 upgrade到國際級價錢，待遇一樣升晒呢，要求所有個唱、商演主辦單位，提供頭等機票或私人飛機、酒店套房及六個黑人保鑣跟身。

扮大牌
《新城勁爆頒獎禮 2014》為遷就 G.E.M.從澳門趕返香港攞獎，將頒獎禮拖延至凌晨 12時半才完結，去慶功宴遲到四十五分鐘的她，訛稱因為搭船而非搭直升機才會遲到，事後卻被揭發她其實約了粉絲在灣仔派曲奇餅，卻要大會等她到場，才開始慶功宴，講大話扮大牌。

語無倫次
去年 10月， G.E.M.在接受專訪時指「香港的樂壇已去到一個不如徹底毀滅它，重新來過的階段。不是說否認廣東話音樂的成就，而是不能再想 10年前流行什麼，然後再複製一次。」引來樂迷不滿，指她自以為樂壇救世主。