《衝上雲霄2》主題曲被批 林子祥還擊:我又唔係搶番嚟!

《衝II》主題曲遭狠批 阿Lam無奈:冇睇過批評,點解要介意?

「燃亮我意志,鼓起我勇氣,前面去再創傳奇……. 」

唔知大家接受咗由林子祥(阿Lam)主唱嘅《衝上雲霄II》主題曲未呢?陳奕迅(Eason)早前喺演唱會慶功宴講過,原來佢本人有份自薦唱《衝II》主題曲,可惜當時因為「四大」問題,結果都係不似預期,但Eason就覺得阿Lam呢首主題曲都幾好聽。

始終珠玉在前,Eason嘅《歲月如歌》確實深入民心,搞到阿Lam呢首主題曲惹起廣泛爭議,網民狠批首歌錯配咗,好有80年代Feel,仲話若果配喺古裝片或武打片,效果可能會更佳,可惜……..

咁Eason﹑阿Lam囝囝林德信﹑填詞人鄭國江及部份劇中演員,都先後回應過呢件事,咁身為《衝II》主題曲原唱者林子祥,又點睇外界爭議呢?阿Lam噚晚抱恙為《聲起:林子祥 X 香港節樂與節慶和聲》音樂會綵排,起初阿Lam避談,更有工作人員話:「唔准問有關《衝上》問題。」其實,有啲嘢始終要面對嘅!

綵排完一小時後,阿Lam再被追問有關《衝II》問題,佢終於開腔講喇,佢好無奈咁話:「我同鄭Sir(填詞人鄭國江)一樣唔想講,我冇上網,連Email、SMS都冇,唔知咁多事。我冇睇過批評,點解要介意?」


林子祥噚晚終於開腔回應《衝II》主題曲爭議。


阿Lam綵排完一小時後先肯開腔回應。


阿Lam話冇上網,所以唔知咁多事。

《衝II》主題曲不似預期 林子祥大平反:我又唔係搶番嚟!

繼續係林子祥(阿Lam)講《衝上雲霄II》主題曲,陳奕迅嗰首《歲月如歌》實在太深入民心,深入到啲網民喺網上留言話,寧願《衝II》用返呢首好過,有網民甚至DIY《衝II》主題曲MV,當然係配番Eason首歌啦,足見回憶總是美好的。

對於外界熱捧《歲月如歌》,阿Lam噚晚反問:「即係Eason嗰首?」阿Lam為自己首歌平反,佢話:「有人鍾意呢首,有人鍾意嗰首,我又唔係搶番嚟,係TVB安排搵我創作,佢哋叫我作曲,創作首歌就係咁簡單。」

咁係咪好介意被網民批評?阿Lam就話:「睇都冇睇,冇乜要介意,唔會理咁多嘢,尤其係創作歌手,只要寫感受,首歌交到畀TVB就得,藝人都係做番最有feel嘅嘢,唔會理咁多。」

雖然阿Lam都讚Eason嗰首係好歌,但佢似乎唔多想同Eason嗰首作比較,阿Lam話:「有好歌你鍾意聽,唔好歌唔鍾意聽,咁咪唔好聽,冇得比較,但始終係10年前嘅事,劇情又不同,兩件事都唔一樣,你哋覺得係唔係?」


阿Lam為自己所作的歌曲平反。


陳奕迅喺個唱演繹《歲月如歌》時,觸動人心。(資料圖片)


其實林子祥同陳奕迅合作無間。(資料圖片)