忽然1周 第829期
娛一叮
《怒火》添食再做佐治仔 林子善帶黑妹女友入屋
2011年06月17日
近排無綫熱播嘅《花花世界花家姐》同《怒火街頭》，令人稱「洪爺」嘅林子善彈起。 29歲的他， 13年前跟星爺搵食， 08年加入無綫大家庭，連續拍咗 12部電視劇，今年終於憑《怒》劇嘅佐治仔打響名堂。
《怒》劇上周最高收視 35點，林子善唔止成功入屋，就連 9月開拍嘅續集都有份。雖然林子善個樣似足古惑仔，早前仲被封溝女王，當街啜爆黑妹女友 Kary。但其實佢除咗夜晚喺夜場打碟做 DJ外，平時都好黐家。本周三晚（ 15日）林子善帶埋女友 Kary同父母一齊食齋，提早慶祝父親節，雖然同女友拍拖只係 3個月，但原來已一早入屋見埋家長。
舉家賀父親節
林子善帶黑妹女友去尖沙嘴齋舖會合屋企人提早慶祝父親節。記者上前影相，林子善與家人最初表現愕然，其後眾人大方任影。
林子善 98年憑星爺的《喜劇之王》「洪爺」一角響朵，其間不乏演出機會，至 08年簽約無綫，飾演《奸人堅》金錢豹一角開始嶄露頭角。上周播完大結局的《花花世界花家姐》和正在出街的《怒火街頭》，更突顯林子善正受無綫力捧，有網友笑指林子善為綠葉首選。
慳家宅男
林子善家住屯門咁遠，不過佢呢日冇揸車，搭小巴再轉巴士出九龍。
接女友收工
林子善女友 Kary喺新港中心的時裝店做 sales。本周三（ 15日） 7點放工，林子善早十分鐘到場接女友。
古惑仔變孝順仔
得到觀眾認同的林子善，即時成為記者追訪對象。早前有報道指林子善喜歡夜蒲和溝女，但本刊連日追訪，發現他的生活頗沉悶。上周六（ 11日）林子善在中環石板街的 DV8場內開工打碟，當時其黑妹女友 Kary都在場。林子善打碟時甚識搞氣氛，非常受歡迎。至凌晨 1時，林子善更為女友搞了個驚喜生日會，眾人玩至 4時許才散場。據知情人士透露，二人拍拖僅三個月，「子善同 Kary三個月前喺朋友飯局上認識，簡直係一拍即合。 Kary喺沈嘉偉旗下 I.T時裝店做 sales，佢好鍾意水上活動，所以曬到咁黑。 Kary同子善好夾，佢哋都係性格好爽直。」派對當晚，記者發現有不少打扮惹火的辣妹埋林子善身，不過他只閒聊幾句，便乖乖返回女友身邊，還不時為女友遞上飲品。
本周三（ 15日），林子善早上與父母及大哥大嫂到屯門寓所附近飲茶，晚上更帶埋女友 Kary到尖沙嘴和家人食齋，提早慶祝父親節。現場所見，林子善與家人相處融洽，更聽到他邊夾餸邊對林父說：「阿爸你食多啲啦！你成日唔喺香港，邊有呢啲好嘢食！」照顧完林父，林子善又夾餸俾林母，成餐飯最忙就係夾餸俾屋企人。
買樓養父母
林子善 06年購入屯門藍地豫豐花園，與父母同住，市值 270萬。
請家人飲茶
周三（ 15日），同日早上 11時，林子善一早起身去附近酒樓搵定位同屋企人飲茶。一家五口有講有笑，最後更由林子善埋單。
啜爆老竇
食飽飽，眾人準備各散東西，林子善當街當巷俾咗個 goodbye kiss老竇，其後佢同記者講：「我同屋企人好 close，阿爺同阿嫲我都照錫。」
《怒火》即開續集
林子善近年愈撈愈掂，除拍劇拍電影外， 06年開始自置物業，買入屯門豫豐花園 800呎單位，與家人同住。
據知剛播出的《怒火街頭》，由於口碑極好，最高收視達 35點，無綫已拍板於 9月開拍《怒火 2》，近日開始搵原班人馬藝員度期。
本周三（ 15日）記者致電林子善，對於近日成為大紅人，他說：「其實我喺無綫真係拍咗好多劇，依家出街個個都叫我佐治仔，我都幾開心 o架！除咗拍劇，我同幾個朋友仲開咗間公司，專做夜場生意。我哋會搵啲場返嚟搞 Party，自己打碟搞氣氛囉！依家逢星期二同星期六都要開工。（影到你同屋企人飲茶同食飯。）我唔開工都係家庭日。（係咪買咗樓同屋企人住？）我曾經試過好霉，搵到錢咪想屋企人住得舒服啲囉！阿哥結咗婚搬開咗， 800呎夠晒我同父母住啦。」
變身夜場 DJ
上周六（ 11日）晚上 12時，林子善在中環夜場 DV8變身 DJ打碟，佢打碟時認真又正經，坐在旁邊的黑妹女友 Kary看似非常欣賞男友。
生日驚喜
凌晨 1時，林子善突然捧住個生日蛋糕行向女友，原來這日是女友生日，林子善特意給她一個驚喜。
恩愛開香檳
林子善平時份人咁無厘頭，估唔到佢對女友 Kary咁細心，切完蛋糕，仲預備定香檳，唔怪得俾人封做溝女王啦！
舞池啜爆
兩人在舞池跳舞時， Kary小鳥依人，不時錫錫男友，林子善亦攬到女友實。
連拍 6套劇
由 13年前在《喜劇之王》做「洪爺」，到現在《怒火街頭》做律師佐治，林子善經歷過人生低潮。 3年前簽無綫部頭拍劇，林子善開始為人熟悉，近年更成為監製搶手貨，一年拍足 6套無綫劇冇停過，絕對係多產藝人。最近網上更有唔少人大讚林子善演技有進步。
2010年
《怒火街頭》
《花花世界花家姐》
《九江十二坊》（未播）
2011年
《飛虎》（未播）
《全家福祿壽》（未播）
《怒火街頭 2》（ 9月開拍）