黎姿聞《金枝慾孽》是非速閃 鄧萃雯查經慰藉

黎姿與鄧萃雯04年齊憑《金枝慾孽》爭視后,最終「如妃」雯女大熱倒灶,「玉瑩小主」黎姿封后。事過境遷,雯女仍在圈中浮沉,近日更因爆《金枝慾孽貳》飛紙仔是非纏身,而08年下嫁富商馬廷強退出娛圈育有三女的黎姿則相夫教女。少奶奶黎姿前日下午4時半,到灣仔會展舉行的佳士得展覽睇名畫,見她對國畫家林風眠每幅估價逾百萬元的作品《秋林》、《蘆葦》甚感興趣。問喜歡那一幅?她說︰「好多都鍾意。」提到雯女是非,她謂沒有留意。 上周四下午3時,被指遭無綫封殺的雯女約李司棋等到九龍塘查經(聖經)慰藉心靈,晚上8時才離開。李司棋指雯女心情不俗︰「我哋查經講到受攻擊唔好難受,為公義就企得穩。」

黎姿
■黎姿前日喺灣仔睇畫,講到名畫就笑笑口,講起是非就即閃!

無綫重頭劇《金枝慾孽貳》收視插水,「如妃」鄧萃雯炮轟冇劇本要飛紙仔,俾編審周旭明同黃德斌暗寸佢「跳船」,是非仲精采過劇情,令觀眾更加懷念當年嘅《金枝慾孽》!有份拍第一輯扮玉瑩小主嘅黎姿,前日下晝4點半,現身灣仔會展舉行嘅佳士得展覽睇名畫。

做咗少奶奶嘅黎姿一身名牌,佢對國畫家林風眠每幅估價逾百萬嘅作品《秋林》、《仕女》同《蘆葦》都好有興趣,駐足睇咗一輪,離開時記者問佢鍾意邊幅畫?佢笑容滿面話:「好多都鍾意。」不過問到佢拍《金》劇有冇飛紙仔?黎姿唔想牽涉是非,只係避答:「唔知。」提到雯女同周旭明鬧交,黎姿就話:「冇留意。」再問佢有冇睇《金枝貳》?佢乜都唔答就急急腳走人!

黎姿
■黎姿入場睇名畫,同個friend有傾有講。

黎姿同雯女當年合作《金枝慾孽》,成為經典。資料圖片
■黎姿同雯女當年合作《金枝慾孽》,成為經典。資料圖片

李司棋撐心情OK

至於畀舊戰友群插及傳被無綫封殺嘅雯女,上周四約咗李司棋、喬宏太太小金子、88年亞姐冠軍樂蓓等去九龍塘查經以慰心靈,久未露面嘅小金子行動不便,要助行器輔助。查經及飯敍後,雯女喺晚上8點幾離開。記者日前致電李司棋,佢話雯女心情唔錯:「我仲問雯女係咪拍拖?所以咁多記者跟佢,佢話因為工作啲嘢。我哋查經嗰段咁啱話:『即使受攻擊,唔好難受,只要係為公義同正義,就會企得穩。』我亦唔信無綫高層會講封殺呢啲說話。」

採訪、攝影:李志明、馬建華、吳耀輝

鄧萃雯查經慰藉
■雯女打扮低調,想認出佢都有難度。

李司棋(左)扶住小金子,十分細心。
■司棋姐(左)扶住小金子,十分細心。