「鍾欣桐」，即係阿嬌；咁「鍾欣潼」呢？都係阿嬌。今日阿嬌忽然於微博宣佈改名，佢寫道：「你沒有看錯，我是改了名字啦。」再加個哈哈笑。網民嘖嘖稱奇，點解好好地又要改？不過，相信睇過阿嬌近年事業發展，都知道其實真係講唔上「好好地」……

今次已經係阿嬌第四度改名，包括：

1.出世:原名叫「鍾狄珊」
2.兩歲嗰陣:改名「鍾嘉勵」
3.入英皇:改名叫「鍾欣桐」
4.今日:改名叫「鍾欣潼」。

唔通個「桐」字唔利阿嬌？睇番歷史，當年英皇安排佢同蔡卓妍(阿Sa)組成Twins，英皇仲將兩人個名交俾命理師傅夾八字兼改名，最後只有阿嬌要改名。當時區仲德師傅就話，阿嬌本命屬土，要多啲火，而個「桐」字就係屬火；仲批阿嬌夫妻位屬金，會洩氣，愛情依賴性強，被動派，而且對感情亦付出多。另一玄學家李丞責就話原名「嘉勵」都幾好，但「欣桐」就更加名成利就，依家改再，「潼」字係水，冇「火」，咁點算呢？

其實阿嬌多年來發展，都同風水命理離不開關係，包括改名，同埋單飛。之前已講過，08年阿嬌爆出「閃卡」事件，多番求見白龍王，望能指點迷津，最後白龍王話佢知，復出不是不可以，但要一個人。於是，Twins就分開發展了。但係呢，網上亦有「高人」話，改名應盡量避開字形結構含「夭」嘅字，如「嬌」、「笑」之類。「夭」字點解唔使講啦，「高人」話改此名做事容易半途而廢，其吉、凶作用力比較大，起伏亦大。咁講法，阿嬌係咪應該改咗個「嬌」字先呢？

32歲嘅阿嬌四度改名，會唔會密咗啲？

鍾欣桐微博

英皇高層霍汶希（Mani）稱，阿嬌早幾個月前已計劃改名，她較喜歡「潼」字，發音又跟「桐」不變，但她的唱片《桐花》用了「桐」字，故延至現在才改名。Mani又指阿嬌覺得今年自己有大改變，想有新開始與感覺，也希望有新轉變，同命理無關，是她自己查字典找的，之前想過用『彤』字，不過最後覺得『潼』字特別點、靚點，給人有開心感覺。對於新名引起粉絲不滿，Mani表示今次改名是阿嬌個人決定，公司會尊重她意願。嬌媽亦同意愛女改新名，故心動不如行動，阿嬌將會連同身份證原名一併改為鍾欣潼。

玄學家麥玲玲表示阿嬌的新舊名卦數也很好，由於她的本命「土」多，故要加木疏土，但「桐」字帶來桃花較多而感情亦糾纏。阿嬌今年32歲，這兩年轉大運，五行中她需要的「木」減少，並要加添「水」，故「潼」字更合適。新名字有助她掙錢更多，又旺「另一半」是厚家底的人，而她的感情與婚姻運也更穩定；但新名字可能影響阿嬌較情緒化。