早前鍾欣桐（阿嬌）與韓籍男友K先生的異國戀宣佈玩完，治療情傷中的她唯有寄情宣傳新國語大碟。豈料同公司的泳兒突然加把嘴公開評論「嬌K戀」，多口爆：「佢有好多追求者！唔使介紹筍盤畀佢。」泳兒過度「關心」，阿嬌似乎唔多領情，一臉愕然重複講了多次：「我同佢唔熟！」語畢，還緊張地追問公司同事：「佢無嗱嗱點會咁講？最搞笑係，我同佢唔熟！我真係冇人追，而且我唔想拍拖住，未來兩年我要專心工作，唔好追我！」在訪問中，阿嬌更親身剖白分手真相，今次泳兒意外地觸碰到阿嬌的神經線，好心做壞事！

32歲戀愛大過天的鍾欣桐，去年11月爆出暗交韓國男友「K先生」權寧一（Tyler），火速發展到同居生活。只可惜「嬌K戀」保存期只得10個月，即宣佈「分訊」。經歷愛情重傷，阿嬌幾經艱辛開始重新振作。hurt爆的阿嬌心如止水，誓言：「呢兩年都唔會諗拍拖，想趁呢兩年學吓大提琴、跳舞，同埋想學外語，韓語、日語、英語，增值自己！我決定咗嘅事就會好堅持，拍唔拍拖呢啲嘢可以自己去控制，真係想追我嘅人等吓啦。其實一個人生活唔係冇好處，有更多私人空間就可以更加了解到自己。」

「我冇人追」

但對泳兒早前出席保良局活動時，公開評論「嬌K戀」玩完，更帶笑爆阿嬌多追求者，唔憂冇人追，她比阿嬌需要筍盤多啲等等言論，阿嬌有點不悅：「佢無嗱嗱點會咁講？最搞笑係，我同佢唔熟咯！」阿嬌仲急急澄清道：「我真係冇人追，日日都要做嘢，飛來飛去，身邊嘅都係工作人員，有時瞓醒都唔知去咗邊度！」 前緋聞男友陳冠希（Edison）就話不知道「嬌K戀分訊」，亦冇機會慰問失戀嬌，前度開口抽水，阿嬌唔多Like：「我唔想回應佢嘅事，唔係嬲佢，而係唔需要回應啫！」 「生活方式唔同」

感情事，局外人又真係不方便插嘴，訪問中阿嬌親自剖白跟K先生玩完的真正「死因」：「我同佢生活根本唔一樣，具體講，我係宅女，佢就好高調；我鍾意留喺屋企，佢就要求我出去玩，唔單只生活方式唔一樣，大家性格根本就唔同。」情路崎嶇，檢討過去失敗原因，她說：「以前細路女，有脾氣，小小事就會嬲，覺得男仔係要o氹女仔，呢方面唔會去妥協，亦唔會好好珍惜每段感情，而且水瓶座嘅人好天馬行空，隨心所欲，人哋講乜，我偏偏唔會咁做，o依家自己真係變咗好多，會識得去體諒同埋遷就人，唔再硬頸，唯一冇變過，係我從來冇貪過要靚仔！」

寄情工作

單身重新上路，阿嬌一心寄情工作，上月她推出首張國語大碟《桐花》，寓意自己像中國南部海岸特產桐花一樣，生長能力非常堅強，第一首主打情歌《慣性冬眠》，歌詞「一朝被蛇咬，十年怕草繩」道盡情傷之痛。另跟過氣「緋聞男友」吳克羣為她創作的合唱歌《回家以後》，寫出她的心聲，最希望回家卸下「武裝」，獲得最愛擁抱及安慰：「我會結婚生BB，希望將來搵到個嘅孝順、又日日o氹得佢好開心，冇負能量嘅真命天子！」

剛失戀又要忙宣傳新碟的阿嬌，需要兩年時間先敢再拍拖。