為咗打破悶局，近期無綫劇加插咗唔少重口味嘅鏡頭，引爆話題同吸引觀眾留意，好似最近嗰套《熟男有惑》入面就有唔少出位嘅造型同露肉鏡頭，前晚第13集《熟男有惑》最出位嘅鏡頭，要數到王君馨為單案去咗一個音樂劇面試場地搵湯子君（糖妹飾）傾和解，點知俾人識穿，Honey（王君馨飾）頂硬上扮參賽者，突然除咗件黑色大褸，露出貼身吊帶舞衣加淺粉紅色閃粉絲襪，場內播住《Flashdance》（勁舞）主題曲《What A Feeling》，團團肉嘅王君馨聞歌起舞，又轉又跳勁扭腰，跳躍凌空加翻滾，跳足兩分鐘，令在場嘅大叔（單立文飾）目定瞪口呆，仲即時作咗首歌。
■王君馨除咗件黑色大褸，展示貼身嘅舞衣，睇到豹哥目瞪口呆。電視圖片
大受好評
王君馨噚日接受電話訪問時，話着舞衫令佢睇落去好圓潤，佢話：「我記得喺聖誕節嗰日拍，啲衫真係唔易着，仲有條粉紅色絲襪，所以睇落去係肉地少少，不過好開心，呢集播咗出街後，收到好多朋友嘅message話我跳得好好。」本身有跳舞底子嘅王君馨話跳呢隻舞好大壓力，佢話：「我練咗好耐，我係咁拉住個排舞師，因為我要跳Flashdance，本身跳開拉丁同hip hop，再加上聖誕嗰日拍，個場仲book咗30人睇住我跳，好大壓力，我哋拍咗5個鐘，現場我就請晒所有人食朱古力，聖誕唔可以出去同朋友玩，都希望大家有個美好嘅回憶。」
【晒肉背】
【朝天腳】
【一字馬】
■本身有舞蹈底子嘅王君馨，喺呢場戲度大顯身手。電視圖片