熊黛林（Lynn）自兩年前和郭富城分手後，感情一直無著落，直到早前終於遇到新男友郭可頌，高調大讚男友。郭可頌是郭可盈胞弟，從商的他非常有錢，絕對是筍盤，不過Lynn想做郭太都不易，據知郭可盈對兩人的戀情不大贊成，因她有感名模多找有錢人照顧，擔心Lynn非真心對胞弟。加上郭可頌剛跟前妻離婚就跟Lynn一起，令人懷疑Lynn是小三，所以人前人後都藐爆Lynn！早前郭家食團年飯，郭可頌並未帶同Lynn見家長，恨嫁Lynn想入門？似乎還有大段距離！

Lynn早前宣佈跟郭可頌正式拍拖，心情超靚的她，在人前大讚男友，又表示跟男友的拍拖生活好簡單，行街、睇戲、shopping有男友陪，言談似是寸爆同前度城城拍拖偷偷摸摸感不開心。雖然Lynn已有新男友，而且處於熱戀期，Lynn應該心情超靚才是。但日前見到她一個人獨自行街時，神情彷彿，似有煩腦。

愁容掃貨

當日Lynn一身型格打扮現身中環，著上大褸、貼身長褲，還載上黑超，打扮不算搶眼，但由於她的model身高令她鶴立雞群，所以沿路被不少路人認出。Lynn當時手拿著一個紙袋，似是剛剛Shopping完。不過，買到心頭好的Lynn並沒有因此而心情靚，全程面上無笑容的她神情呆滯，一副若有所思的樣子，行路時動作緩慢，面對路人迎面對她指指點點，也沒有理會。只是慢步到停車場取車。Lynn行到停車場取車離開時，脫下了黑超後只見化淡妝的她一臉愁容，完全沒有「戀愛中的女人」的光彩。本刊記者趁她離去前上前問她跟男友一家關係如何，她看一看記者後默不作聲，一言不發驅車離開，明顯避忌。

現年已經34歲的Lynn，投放了多年時間在城城身上，也未能開花結果，最後自動「棄城」。希望生小朋友的Lynn，跟郭可頌拍拖後，眼見男方條件好又細心，所以希望早點箍實男友成家立室，拍拖不久已帶男友見家長。不過郭可頌就似乎不想Lynn太快「入屋」，年廿八當日，記者發現郭家一家人到褔臨門食團年飯，卻未見郭可頌帶同Lynn出席，雖然記者向他提及Lynn也甜笑，但被問到有否帶Lynn見家長時，只拋下一句：「多謝大家關心。」而記者上前再問郭可盈對熊黛林感覺如何，她就沒有回答，拖著女兒箭步離開福臨門，明顯不欲多談。

據Lynn身邊人透露，Lynn和男友感情穩定，但知男友家姐郭可盈不太喜歡，讓她大感壓力。「郭可頌舊年先離婚，過咗冇幾耐就高調同Lynn拍拖，好多人都懷疑Lynn係小三。郭可頌打理家族生意，作風低調，就算家姐以前係TVB當紅花旦，郭可頌都好少見報，但同Lynn一齊後成日上報。而且行內有唔少model都恨嫁有錢人，種種事加埋，郭可盈對Lynn感覺唔好，藐爆Lynn，私下同身邊人講唔想同Lynn做一家人。呢行好細，說話傳番去Lynn耳中，Lynn當然唔開心啦！」知情者說。

難得找到真愛，Lynn卻入門有阻滯，嫁人願望又再落空，難怪熱戀中都愁爆無心機啦！看來Lynn想感情開花結果，要諗諗計點o氹掂郭可盈喇！