郭少芸出名玩得夠放，人人埋身都可以攬頭攬頸，結果被傳對大隻仔羅天宇嗒糖，44歲對25歲，當事人僅以「天方夜譚」來回應。事實上，郭少芸又真係對嫩口男情有獨鍾，早前見她拖着嫩版陳國邦歎High Tea睇戲直落，全程笑到鬼咁冧，又爭住科水埋單，豪氣十足。採訪：譚壹致

在無綫撈足20年閒角，郭少芸最近食住花旦小生荒上位，在處境劇《愛‧回家》飾演孻姑姐備受讚賞，一年孭三劇的她早前被指搭上花o靚羅天宇時，一度笑到收唔到聲，以「天方夜譚」來否定緋聞。

型男出招o氹

拍劇做閒搵唔到幾多，在飲食界拼搏多年的她先後開設西餐「Match too」及台菜「小台北」，每月生意額過百萬，難怪有豪宅揸手兼名車代步。

日前，記者見郭少芸拖着留二撇雞、貌似陳國邦的型男到圓方拍拖，high tea期間，男方諗盡計o氹她開心，談心時更手舞足蹈，兩人hea至傍晚才到戲院揀戲睇，適逢周末假期，即場位爆滿，兩人只好改睇午夜場，幾粒鐘無聊無嘢做，郭少芸即當柴可夫接載男友到灣仔杜老誌食潮菜，全程由郭富婆埋單，型男則繞埋手笑笑口，好受落。

據悉，郭少芸這位二撇雞型男名叫文傑，姊弟戀發展只有半年，但郭少芸已急不及待帶他見朋友，早前更約埋好姊妹佘詩曼茶敍過目。

郭少芸拖嫩男新歡出巡，先High Tea，後食飯，再睇戲，44歲對25歲姊弟戀，完全冇問題。

二人撐完枱腳，郭少芸負責埋單，玩得開心有咩所謂。

二人High Tea 到傍晚時份，再轉場買戲飛。


這位嫩男叫文傑，早前郭少芸更約埋好姊妹佘詩曼齊齊茶敍過目。