鄭嘉穎拒與佘詩曼拍《寒山潛龍》

拒拍阿佘激嬲曾姐 鄭嘉穎遭雪藏爭視帝無望

TVB台慶頒獎禮殺到,今年尤以視帝戰況最激烈,由兩屆視帝黎耀祥、鄭嘉穎跟無綫親生仔林峯「困獸鬥」。正當走進大直路時,鄭嘉穎因推劇得罪無綫製作部頭目曾勵珍先判「死刑」冇得玩。據知,原先曾姐屬意明年由嘉穎伙拍舊愛佘詩曼演古裝劇《寒山潛龍》,嘉穎飾演造型淫淫地的西門角色,可是向來執着的鄭嘉穎一聽到對手是阿佘時,抗拒到耍手擰頭,二話不說便推:「珍姐唔好喇,咪玩我啦!」完全冇轉彎餘地,搞到曾姐都好難落台,激到紮紮跳,有人更周圍同人講:「雪藏佢呀!」今年要蟬聯視帝?唔使旨意!採訪:方騫平

今年鄭嘉穎憑《拳王》角逐「最佳男主角」獎,當被問到對冧莊信心時?他淡淡然回應:「玩玩吓心態,因為年尾成日返咗大陸拍劇,唔好意思拉票,我反而睇好黎耀祥。」咁快認輸拱手讓獎?梗係聞到火羅味。事實上,上月初於TVB台慶前夕的節目巡禮上,雙料視帝兼親生仔鄭嘉穎以身在大陸拍劇為理由,沒有現身「晒冷騷」,最弔詭的是所公佈來年的新劇名單中,鄭嘉穎竟食白果,高清台只播映其演出的內地劇《步步驚心》和《葉問》。相反,後起之秀馬國明揹《On Call 36 小時2》及《寒山潛龍》兩個劇。

「其實馬明只係被安排拍《寒山潛龍》片段喺節目巡禮度播,仲未決定劇中演員人選,早喺半年前TVB兩大製作巨頭(曾勵珍、梁家樹)開始擬定明年製作大計時,就釘實明年返嚟還債嘅阿佘,佢咁受觀眾歡迎,梗係成為佢地嘅囊中物啦,梁家樹想佢夥拍黃子華;珍姐仲玩得大,構思佘詩曼配鄭嘉穎拍古裝劇《寒山潛龍》,點知鄭嘉穎唔要同舊愛合作,即時半帶笑講數對珍姐話:『唔係咁玩我呀?點拍呀?如果咁想搵阿佘,就搵其他演員啦,我唔拍啦。』見TVB小生又買少見少,嘉穎更加恃寵生驕,一唔鍾意就黑晒面,狂擺阿哥款,不過,諗都諗唔到,佢連出名惡嘅曾姐都敢得罪咁薑啫。呢件事搞到珍姐好冇面好嬲,因為嘉穎唔拍,連卡士都要改埋,家陣仲未諗到新人選。」

最近佘詩曼爆紅,連8年前跟馬德鐘拍落的倉底貨《驚艷一槍》都「出土」放在下午重播。不過,因為阿佘未接劇本,根本唔知道被舊愛「嫌棄」。被問到重返TVB拍劇,她說:「2013的事,2013先有決定、對手、劇本、日期,一切還未有決定,希望到時帶畀大家驚喜。」

馬國明亦蒙查查,他直認:「我唔知原先屬意鄭嘉穎喎,亦唔知有冇我份拍《寒山潛龍》㗎,我只係知道拍住片頭先,落實咗只有《On Call 36 小時2》,因為明年2月正式開工。」

拒拍阿佘激嬲曾姐 鄭嘉穎遭雪藏爭視帝無望