與七十六歲「大名娛樂」老闆林建名傳緋聞，再傳出情傾對方孻仔林孝信的二十五歲何傲兒，「一家親」戀情原來都是煲水新聞。何傲兒的真命天子其實是西貢地產王子周子揚，二人在合作節目《扮嘢王》撻着；拍拖一星期，何傲兒已跟男友返屋企，見家長。
極速撻着
新鮮出爐的「兒子戀」曝光後，何傲兒聲言對跟爺爺輩的林建名傳緋聞終於鬆一口氣。真命天子水落石出，何傲兒公開大讚男友人好有上進心，但初次跟圈中人拍拖，對與周子揚的戀情極速浮面，亦感到相當壓力，加上近月來緋聞纏身，擔心對新戀情發展有影響。
據了解，周子揚跟何傲兒去年一同參加歌唱節目《星夢傳奇》後，開始保持聯絡，經常大班人搞聚會，個多月前，二人再合作暑期節目《Sunday扮嘢王》時，終於撻着行埋。
出入男家
「其實參加《星夢》嗰陣都已經有好感，大半年前， Hinson（周子揚）同 Jenny（鄭嘉穎舊愛徐靖雯）甩拖，多咗私人時間，經常約公司同事去屋企燒嘢食唱 K，就開始同 Lily熟絡，跟住兩個再合作《 Sunday扮嘢王》，見 Lily為咗同林建名傳緋聞好唔開心， Hinson係咁安慰佢，覺得有人明白同關心自己， Lily對 Hinson更加有好感，話着就着。
「不過兩個人喺班同事面前都好避忌，雖然一齊做節目，但冇試過同場，所以冇乜人察覺到佢哋拍拖，直至『車廂啜嘴』單新聞爆咗，大家先知道。其實佢哋正式拍拖只有一個星期左右，就連公司都未知。」二人身邊朋友透露。
未正式拍拖前，去過周子揚屋企唱 K燒嘢食的何傲兒，早已被周家兩老睇中。
「 Hinson爹哋見過 Lily好多次，對佢印象好好，覺得佢好斯文同有禮貌，而 Hinson亦喺何傲芝生日 party見過 Lily老豆，但只係打個招呼，冇正式介紹。」
拍拖檢點
本週一（七月二十八日）下午，周子揚到馬鞍山新港城商場買日用品，對和何傲兒拍拖，他大方回應。
壹：幾時開始拍拖？
周：其實我哋喺《星夢傳奇》時認識。
壹：佢有乜優點吸引你？
周：佢人品非常好、好孝順、上進，絕對唔係媒體之前講嘅拜金女。
壹：有冇問過佢同林建名嘅關係？
周：佢哋嘅交往我冇問過，但我個人接觸，佢係個人品好好嘅女仔。
壹：大家有冇見過雙方父母？
周：佢有見過我屋企人，都有食過飯，相處得好好。
壹：會係你長遠發展對象？
周：好呀好呀！我父母都好鍾意佢，因為佢好識去同人溝通，相處好重要。
壹：公司唔知你哋拍拖？
周：公司冇話唔俾拍拖，但喺公眾場合大家要小心啲、檢點啲。
壹：車廂激嘴新聞出街後，你同女友有冇溝通過？
周：有，大家會承認，希望大家喺公司各方面會有好嘅發展。
壹：你會寫首歌俾女友唱？
周：佢唱歌好好聽，睇吓將來有冇機會作首歌俾佢。
壹：會視佢為結婚對象？
周：其實長遠嘅嘢大家未知，呢一刻相處好好，如果將來真係 OK嘅，佢係一個好好嘅女仔。
趙哲妤：「佢搶我條仔！」
上星期五(25日)，西貢地王太子爺兼歌手周子揚主動搵前中國小姐趙哲妤及前亞姐顏子菲拍新歌《霧花》MV。劇情就講周子揚一腳踏兩船，所以被Uny掌摑。雖然當日Uny遲大到，周子揚即笑指她是否有公主病，而Uny亦不甘示弱還擊指他亦有王子病，但似是大耍花槍而已。事關周子揚全程都好照顧Uny，鏡頭後不時細聲講大聲笑，當顏子菲無到。據趙哲妤好友透露出：「周子揚追咗Uny好耐，因為Uny人靚又學歷高，最緊要Uny亦出身於小康之家，同周子揚都算門當戶對，不過Uny向來多狂風浪蝶，對周子揚只係有好感，所以佢哋似乎係好過朋友，但係又接近戀人嗰種曖昧關係囉。」
不過當「兒子戀」爆光之後，趙哲妤才恍然大悟，口快快衝口而出說：「佢搶我條仔！」之後又改口笑指是拍MV中已經係有個顏子菲與她爭「男朋友」，現在又殺出另一個何傲兒。但在訪問中，Uny句句有弦外之音，更直指「車箱啜爆」事件有人擺明做宣傳，又暗寸何傲兒拜金，她直說：「我睇報先知佢哋呢單新聞，之前都無聽佢(周子揚)講過，因為佢之前同其他女藝人拍拖都會第一時間同我講，而且我知佢一向鐘意啲賢妻良母型，有鄰家女孩feel，亦唔鐘意女仔成日講錢，所以我估係宣傳博出位多啲。」被問到周子揚是否已追求她一段時間，她才笑笑口答：「我哋已經識咗好耐，因為大家之前都同期讀Master，放學之後佢就會約我一齊食飯，而我食店開幕嗰日佢都有嚟捧場，我哋雙方屋企人都知道對方係邊個，係青梅竹馬果種。」嘩，連家長都見埋，難怪趙哲妤知道何傲兒生擒周子揚會咁嬲嘅。
周子揚轟趙哲妤：「佢冇資格講我同傲兒」
昨日向周子揚求證與趙哲妤青梅竹馬一事，他直言與趙哲妤從來只是普通朋友，並說：「我哋只不過係識咗幾年，好奇怪同好突然佢會咁講，好似講到我好花心劈腿，傲兒又好拜金，唔係囉，我只係搵佢拍MV，其他唔係事實，希望佢尊重人哋，佢冇資格講我同傲兒，我又冇追過佢，亦都冇開始過，作為普通朋友，唔應該咁樣講人哋！」提到見家長，他續說：「梗係冇喇，只不過係佢想買樓，我哋做地產嘅，咪畀啲意見佢！」身在馬尼拉工作的趙哲妤，昨日亦透過WhatsApp回應此事，她否認與周子揚拍拖，並說：「我哋只係喺MV入面拍過拖，只係朋友，冇發展空間，唔明點解會有人咁寫！」
趙哲妤
年齡：26歲
三圍：33C、23、35 (勝)
身高：172cm (勝)
學歷：大學畢業於英國桑德蘭大學、工商管理榮譽學士、英國密德薩斯大學(新聞系榮譽學士)及香港公開大學應用英語語言學碩士生。 (勝)
經驗： Jelly Girls成員、「2010中國小姐大賽」季軍及香港區五料冠軍 (和)
何傲兒
年齡：25歲 (勝)
三圍：34C、 26、 36
身高：170cm
學歷：香港大學SPACE學院法律系（一年級）
經驗：07年參選香港小姐、拍劇集《畢打自己人》、《女人最痛》
翻版王力宏
今年 30歲的周子揚（ Hinson），父親周業德是西貢地王，在區內擁有多個商鋪，做地產生意起家。入行已八年的 Hinson， 18歲到美國音樂家學院 Musicians Institute L.A. Hollywood修讀音樂兩年，畢業後到台灣跟著名製作人陳子鴻學習幕後製作過程。 06年，簽約台灣環球唱片，有翻版王力宏之稱，不過未推出唱片已決定回流香港。
09年，唱作俱佳的他被華納唱片招攬成旗下歌手，先後推出過兩張 EP，但外界反應一般。 11年， Hinson加入無綫，成為旗下合約藝人。
新聞姊妹花
選美出身的何傲兒跟胞姐何傲芝近日頻頻有新聞。何傲芝被黃翠如介入，硬撬拍拖多年的蕭正楠，以致急瘦廿磅；何傲兒則被指遭父親反對，跟拍拖半年、從事金融業的男友 Wilson分手，回復單身的她，因為陪老闆睇陳慧嫻演唱會與林建名傳緋聞惹笑話。
此外，從事製衣業的父親何世根，被指一直希望兩個女嫁入豪門，去年被法庭申請破產的他，今年四月在高院被頒破產令前，向法庭申請嘗試自行還債。是非一籮。