張敬軒辭演《老表.你好嘢!2》

譚詠麟﹑李克勤﹑許志安﹑衛蘭﹑梁漢文﹑張敬軒﹑王菀之(Ivana)﹑鄭俊弘﹑羅鈞滿﹑巫啟賢及應屆港姐冠軍陳凱琳等,噚晚喺紅館出席無綫慈善騷《星光熠熠耀保良》,之前因四大唱片公司版稅風波而絕迹無綫四年嘅軒仔,噚晚亮相無綫節目,仲同穿透視裝嘅Ivana合唱,軒仔笑言Ivana直情賣大包,打斜都有嘢睇喎。軒仔話四年來冇參加過無綫騷,開頭有啲緊張,不過同老拍檔Ivana合作多時,有晒默契。

之前有傳無綫劇《老表.你好嘢!2》,會搵軒仔演出,不過軒仔噚晚就話推咗唔拍,因為佢一早應承咗黃秋生演舞台劇,所以驚拍攝時會撞正綵排,所以只好婉拒演電視劇,軒仔坦言都話可惜,錯過好機會,佢話都希望同Ivana﹑王祖藍同張繼聰拍劇,唯有寄望下次。

而Ivana對於性感打扮就謙稱「好小事」,佢做足防走光措施,講到軒仔亮相無綫,Ivana都話開心,又話佢心目中唱得最好男歌手之一。

張敬軒同王菀之合作多時,兩人默契十足。
張敬軒同王菀之合作多時,兩人默契十足。
出爐港姐冠軍陳凱琳
出爐港姐冠軍陳凱琳

一班青春歌手載歌載舞。

王菀之性感登場

近日備受是非困擾的鄧紫棋,落力演出。

同太極樂隊Jam歌。

巫啟賢同徒弟鄭俊弘同台演出。

衛蘭及許志安合唱

譚詠麟因為出席保良騷,所以未能抽身捧契仔關楚耀場。

李克勤一身紅色打扮,甚為搶眼。