銅鑼灣出巡變篋神
樂瞳拖兩男企街追劇

高登女神樂瞳前晚拖着白色行李篋，與 K4成員黃得生和朱敏瀚現身銅鑼灣，女神變篋神，幸有同行猛男輪流護花。眾人本想追看有份主演的劇集《點解阿 Sir係阿 Sir》，糖水店為免客人賴着阻住做生意，拒轉台施逐客令，他們只得埋單企門外看免費電視。

樂瞳憑無綫劇集《點解阿 Sir係阿 Sir》彈出成為高登女神，聲稱沒有拍拖的她，感情生活非常神秘，前晚她一拖二出巡銅鑼灣，原來兩男正是同劇 K4成員黃得生（ Dickson）和朱敏瀚（ Brian），一行三人還會合《點》劇另一女學生蔣家旻一齊吃晚飯，為了追看劇集，他們竟不介意企街打電視釘。

有英國血統的朱敏瀚前晚做樂瞳的觀音兵，替她推篋。

身為女神的樂瞳為追看有份演的《點解阿 Sir係阿 Sir》，不介意站在糖水店外。

因為合作拍劇令樂瞳與朱敏瀚、黃得生和蔣家旻成為老友。

晚飯後嘆糖水

身為宅男女神的樂瞳前晚化身「篋神」，推着一個白色行李篋現身鬧巿，幸好身邊有 Dickson及 Brian輪流護花，替女神推篋，不過雖然他們一行四人在銅鑼灣時代廣場前坐下吹水，但卻沒被途人認出。一行人其後到了駱克道一間食肆吃晚飯，直至 9時半，正值有份主演的《點》劇開播，他們即轉場到附近糖水店食甜品，順便追《點》劇，可是吃了不夠半小時便離開，埋單後反而站在糖水店門口追劇，其間有 fans認出樂瞳，上前要求與女神合照，她都十分樂意。
記者昨日致電樂瞳，她說：「我哋噚日做完嘢咪約食飯，順便一齊睇《點》劇，咁啱糖水店有電視，但店員就唔肯轉台，佢話我哋掛住睇電視阻住做生意，埋咗單喺門口見播緊《點》劇，我哋咪企喺度睇囉。」

壯男輪流侍候

現場所見，女神變篋神，樂瞳笑言幸得同行猛男相助，她說：「我借咗啲衫影完相，咪碌個篋去還。因為試過孭住個袋好重，搞到膊頭爆晒微絲血管，咁着小背心影相唔靚，我咪改推篋。」 Dickson及 Brian爭住獻殷勤，可怕傳緋聞？樂瞳說：「我同佢哋係好兄弟， Brian得 18歲，我當佢細佬，不過佢好乖幫我拖篋， Dickson都有輪流，但佢懶啲。」
此外，對於廣管局日前接獲 14宗有關《點》劇內容涉及打架和不良行為的投訴，樂瞳說：「預咗，有啲劇情幾踩界，但我哋遲啲會變番好學生。」

陳豪卧底寫錯英文字

陳豪撰寫卧底日誌時錯誤將「 brake」串成「 break」，貽笑大方。　電視圖片

陳豪在無綫劇《點解阿 Sir係阿 Sir》中扮演卧底探員，扮教師深入校園攞料。他口才叻、捉賊叻、媾 Miss叻，但英文卻認真不濟。

brake變 break

事緣前晚播出的一集中，交代陳豪要寫卧底日誌，但他居然將「我要踩 brake（迫力）」誤寫成「我要踩 break（小休）」如此低級的錯誤，莫講為人師表，相信連中學生也不會犯。陳豪的同袍吳卓羲當年以「賣飛佛」揚名，或許要請他惡補一下英文。