冷笑話

(以下爛gag純屬虛構,設計對白,與真實人物、團體一概無關。)

2013-06-01 更新:

山聰改過

山聰:「落小姐,求你俾我返TVB開工啦。」
落小姐:「哼!你會唔會拍拍吓劇同超雲復合唔返工㗎?!」
山聰:「我發誓一定唔會!」
落小姐:「咁有信心?」
山聰:「唏,我依家改媾超蓮吖嘛!」

城醒後悔

城醒:「慧慧豬,你再係咁肥落去都唔係辦法。」
芸慧:「你開頭又話鍾意人哋豐滿嘅。」
城醒雙手抱頭:「唉,我估唔到影響原來咁嚴重!」
芸慧:「咩影響呀?!」
城醒:「載住你,架林寶堅尼起步慢咗十分一秒呀!」

詩韻釣龜

詩韻搭上富二代:「嘩,原來你屋企開珠寶店㗎?」
富二代:「係呀,任你揀一件首飾啦。」
詩韻:「好嘢!我要呢隻八卡鑽戒。」
富二代:「唔好意思,呢隻我老竇預留咗送俾范冰冰。」
詩韻:「哦,咁要呢條藍寶石頸鏈啦。」
富二代:「唔好意思,呢條鏈我老竇預留咗送俾林志玲。」
詩韻:「搞錯呀,你老竇幾號電話?」
富二代:「你想鬧我老竇呀?」
詩韻:「黐線,我想媾佢呀!」

安琪妙問

安琪:「老公,你演TVB劇幾錢集?」
繼聰:「六百蚊。」
安琪:「每集拍幾耐?」
繼聰:「如果NG得多要拍兩日。」
安琪:「嘩,咁咪仲奀過做實Q!」
繼聰搔頭道:「唔會啩,做實Q我好少NG嘅。」

千語呼冤

千語:「峯哥哥,啲人成日話我掠你水,真冤枉呀!」
淋峯:「BB唔好嬲,哥哥錫番。」
千語嘆道:「冇用㗎!我好痛苦呀,我唔想再含冤受屈喇!」
淋峯:「吓!你想分手呀?」
千語搖頭:「我想罪有應得呀!」

黛林苦衷

麗緹:「黛林,七年情玩完,有冇唔捨得呀?」
黛林:「冇,其實我都唔係咁鍾意坐跑車、睇跑馬同打邊爐,真係唔適應香港人嘅文化!」
麗緹:「咁點解要忍受七年呀?」
黛林:「住滿七年可以做香港人吖嘛。」

金枝之死

塵豪:「點解金枝二收視咁差㗎?」
萃雯:「唉,啲C9話喺廚房洗完碗出嚟已經跟唔到啲劇情喇。」
塵豪:「吓?我哋已經加插咗劇情導讀咯喎。」
萃雯:「就係要睇劇情導讀,洗唔切碗囉!」

千語無言

淋峯:「BB,我買咗架車送俾你,你估吓係咩車?」
千語:「好嘢!係咪超級跑車?」
淋峯搖頭:「唔係。」
千語:「咁梗係豪華房車嘞!」
淋峯搖頭:「都唔係。」
千語:「吓,怕且係七人車啩。」
「唔係呀。」
淋峯拍掌道:「係最啱BB嘅BB車呀!」
千語:「……。」