多個團體今日發起遊行，抗議政府處理免費電視牌照黑箱作業，數以萬計市民迫爆政府總部。香港電視（HKTV）職工會初步估計12萬人參與遊行，不過，警方就指由「民間開放電視行動」發起，由銅鑼灣出發的遊行，高峰時有2萬人。至於由香港電視員工發起，從中環碼頭出發的遊行，高峰時有1800人。警方表示，鑑於聚集市民眾多，會考慮安排鄰近道路如立法會道及龍匯道。

香港電視總導演蘇萬聰表示：「政府唔解釋，我哋唔會走！佢哋唔畀我哋開台，我哋聽晚喺呢度開台！」

港視職工會主席楊志豪早前在台上發言，數度感觸落淚，稱「呢幾日我都好眼淺」。他表示，港視的員工充滿熱誠，但行會的一個決定，令他們死得不明不白，又說這是香港人的事，促政府交代，台下許多員工都大為感動，甚至一同落淚。

由港視配音部員工組成的「公義戰隊」，在公民廣場以話劇形式，諷刺政府及行會以保密為由，各項事情都不公開，日後市民連為何被補、為何爭取學位要「瞓街排通宵」等，都無法得知原因，抗議政府不發牌給港視又拒解釋。

今日在政總公民廣場，大部份香港電視的藝人都出席了。眾台前幕後輪流上台發言，有激昂也有低迴，結果，林嘉華、蒙嘉慧、張可頤、周家怡、陳安瑩、廖安麗等等等，都忍不住落淚。哀悼夢想被毀，努力付出卻變成徒然，更是哭政府施政的不公義。

蒙嘉慧、林嘉華、張可頤。


林嘉華

林嘉華

林嘉華

廖安麗

廖安麗

黃鳳琼

張可頤

姜文杰

張松枝轉行紮鐵：去到絕路就咁0架喇

因為香港電視不獲發牌，且有家庭負擔，不知前路如何的張松枝，曾向黎彼得透露為生計或考慮轉行做紮鐵工人。今日這個前無綫「御用二世祖」，今日表示:「心情一定唔好0架喇。」問其生計是否真成問題，他說:「問我唔發牌對生活有冇影響，咁一定有影響0架啦，冇咗份工。如果去到絕路，就一定係咁0架喇……或者轉行，諗吓之後生活係點，但暫時都仲可以嘅。」他又謂現仍在開工拍《Night Shift》，只拍了一半。至於會否返無綫或轉投nowTV甚至有線，張松枝斬釘截鐵謂:「暫時唔諗，因為仲有約在身。我仲有八個月約，有排諗，睇吓之後嘅情況同大趨勢係點。」家人是否支持？他說:「支持，一定支持，就算我轉嚟呢間公司，我都要開個家庭會議，絕對唔保密0架。」

張松枝與香港電視綜藝資訊及記錄片部製作總監鄧婉媚(右圖)等員工齊參與遊行。

陳國邦遊行無懼秋後算帳：我哋應該驚個政府多啲

「為了下一代，為了支持創意！媽媽今個星期日都要上街遊行了！」羅敏莊在微博上，這樣對女兒說。今天，羅敏莊不止一個人上街，還帶同女兒，及仍屬無綫人的丈夫陳國邦，一家三口加入香港電視大隊出發，遊行至政總。陳國邦一手撐著太陽傘為女兒遮蔭，羅敏莊則為父女撥扇，非常溫馨。

在一片無綫藝人噤聲的時代，陳國邦勇於向政府黑箱作業、不公義說不，令人動容。問他可擔心TVB秋後算帳？陳國邦謂:「我諗我驚個政府多過驚TVB。我覺得喺TVB唔需要咁多自我審查。有一次同主席食飯(梁乃鵬設慶功宴獎勵高收視劇集)，主席都話王生(王維基)都係一個佢欣賞嘅人，佢都唔忌諱講對手，我覺得我哋員工都唔需要咁忌諱，咁驚，我哋應該驚個政府多啲。」陳國邦表示因為事隔一年，只記得梁乃鵬曾表示:「王維基呢個人我都好欣賞。」但詳細內容已記不得:「我想講嘅係，我哋公司最高層，都唔忌諱去講呢樣嘢，咁我哋員工驚咩啫？」

陳國邦表示今日放假，毋須請假遊行，而蘇玉華本來想來，但因為開，未能出席。但陳國邦重申未有主動邀約任何無綫藝人出席:「我覺得，做嘅係個人決定。我有信心，我唔尷尬我唔會驚啫，咁可能有啲人有啲擔憂，我唔想令佢哋左右為難。老實講可能個心想嚟，又有啲擔憂，雖然未必係真實，但有啲時候有啲擔憂好難講。」

陳國邦帶埋羅敏莊及囡囡齊齊參加遊行，抗議不公。

行會不可破先例？陳國邦怒轟：梁振英夠冇先例做特首啦

陳國邦續謂:「今日嚟時都聽到新聞話，因為行會有保密協議 ，唔可以因為咁而打破先例，我哋嘅歷史就係要不停打破先例0架啦，唔通梁振英以前冇先例、佢就唔可以做特首？佢上場(之前)，又話改革又要創新，咁呢啲都一定要打破先例0架啦，點解你上前之後又話因為冇先例所以唔可以公開呢？」

至於另一遊行理由，就是陳國邦覺得政府以集體保密制為由，將之視為尚方寶劍，以後甚麼也可以放上行會討論，這就可以避過向公眾交代。陳國邦表示:「噚日電影公會都有講，依家唔係邊個出唔出牌嘅問題，甚至頭先都有記者問我係咪要發牌，我話唔係呀，就算王生都唔係話要……我依家唔係出嚟遊行、要政府發牌俾HKTV，係要政府話俾公眾知點解，原因，佢真係衰到連莫須有都冇。」

劉玉翠發言：我煮餸唔用雞汁o架 sorry

前無綫藝人、後轉投港視的劉玉翠第一個上台發言，她說:「我喺買餸嗰陣聽到呢個消息，我爭啲想帶兩棵蔥嚟。」又打趣謂師奶(即她本人)都來遊行。此時有人遞上一支雞汁給她，她望了一望便推開:「我煮餸唔用雞汁o架，sorry，我好natural o架。」全場即掌聲雷動。

大情大聖的劉玉翠，還哭了出來。

她上台時說:「我有啲緊張，其實我係一個師奶嚟0架咋，師奶都要遊行呀，你見過未？」發表完「雞汁論」，劉玉翠續說:「經過呢件，事，我更加肯定自己嘅追求。我依然會繼續發夢，我依然會為理想堅持。我好肯定，呢件事令我壯大咗。我喺王生(王維基)嘅訓練底下，個人好騰雞，我係冇一日唔喊，雖然依家我喊，但我覺得自己係一個好堅強嘅喊，好肯定嘅喊。我冇氣餒，經過呢件事，亦都希望大家唔好氣餒，繼續努力，繼續發夢，係冇問題0架。我只係有啲難過，有啲傷心，點解變成咁樣。我好痛心，我唔偉大，我唔係為全香港人，我為嘅係我屋企人、為我下一代，為我自己嘅夢，我可以做啲咩？」說時劉玉翠忍不住又哭了出來。

劉玉翠紅眼眼，忍著淚，續說:「我愛我屋企人，我愛香港人。」並握拳肯定地說:「我愛我自己!就已經夠喇!繼續發夢，一齊陪我儍呀！多謝你哋!」

林文龍質問蘇錦樑：你係咪男人嚟0架？

林文龍於台上發言，他表示之前一直沒哭過，但今天終於忍不住。他更公開斥責商務及經濟發展局局長蘇錦樑:「佢話決定要公開公平公正，我睇唔到，咁矛盾都講得出」， 並質疑道:「你係咪男人嚟o架？男人做嘢要有承擔o架。」又囑蘇錦樑如果還有半點良知，麻煩交代清楚。

林文龍於台上表示，他從事此行業已經26年，去過不同電視台，但從未試過有一間，能有如此有熱誠的同事及老闆。他謂:「原本我冇諗住上台講嘢，長長短短嘅日子，我離開每一間公司，我從來未流過一滴眼淚，但前日，我忍唔住喊咗。我喊，唔係單單因為唔捨得，而係我唔知道，香港仲有冇明天，我唔知我哋香港市民仲需唔需要我哋做戲，需唔需認真。」

林文龍又說:「我覺得好過份，首次我哋今日呢個集會，係同政治無關嘅，係咪？我哋只係希望，我哋專心、認真，拍好我哋HKTV嘅電視!因為王生(王維基)同我哋HKTV 700幾個員工，我哋都好認真，對香港創意工業有希望，希望可以為香港做啲嘢。我哋希望做得好。我哋邊度做得唔好，你話俾我哋聽，我哋改。」

可惜，事實上卻是沒有人告訴他們:「但冇人話俾我哋聽，我哋點改呀？我哋點解會變得死得不明不白？呢個局長(蘇錦樑)就出嚟講，話成個過程都係公開公平公正，我睇唔到點樣公開公平公正。然之後，佢同我哋講，話因為行會需要保密機制，唔可以公開。咁前後矛盾嘅嘢都講得出口？呢個究竟係乜嘢人？局長？700萬市民需唔需要一個交代？有冇搞錯？你係咪男人嚟0架？男人做嘢，係咪應該有承擔？」

「呢間公司有好多好有熱誠嘅年輕人，台前幕後都有，佢哋只係缺乏咗啲經驗。」林文龍說。香港人願給他們實踐增加實戰經驗，但政府卻硬生生扼殺了。

林文龍又以答應女兒乖到樂園玩，作比喻說：「就好似，我應承咗個女，我話如果佢聽話，我帶佢去樂園玩；最後個女係好乖喇，我竟然唔帶佢去。理由？唔講得，因為我同佢阿媽有保密機制。」

蒙嘉慧歎合作短命： 我同HKTV合作咗7日咋

蒙嘉慧今日到政總集會，與一眾台前幕後在公民廣場靜坐，靜心聆聽每人發言，期間更拿著紙巾，似是拭淚。她說:「我今日嚟，係因為我係一個市民，我用相信政府嘅心態，如果佢話需要循序漸進，咁我當佢係需要聽民意，所以我想行出嚟俾香港政府知道，我都想有多啲選擇。我唔知用乜嘢渠道，咁我惟有用我雙腳行出嚟。」

蒙嘉慧表示今次是她首次出席抗爭活動，不知道原來要坐地下，所以穿了一條緊身牛仔褲。她又表示好希望香港每一個行業、每一個電視台，每個人都可以有進步空間:「我相信我快過王維基，佢喺亞視12日(離職)，我同香港電視合作咗7日咋。宣佈嗰日我仲開緊工，但大家心態都好係做好佢唔好諗，但我都想知道我同呢間電視台合作，點解會有呢個結果，你俾我知，我會覺得抵啲。」她又自言沒有後悔，並說:「我都係TVB嘅血嚟0架，但唔係話我想TVB好就想其他衰0架嘛，而係開放市場，增加競爭力，而唔係邊一個電視台要死。我相信市場會做主導。」

盛傳香港電視賠60萬給她(因其主演劇集《天網》腰斬)，蒙嘉慧表示一直給予空間香港電視，而且對方根本沒有違約，她如今只關心員工去向:「冇人保證一間電視台係咪會成功，但你唔俾佢上擂台打仗，唔俾佢出賽，件事會更加唔甘心。」她又引用王維基曾說給媽媽播出15分鐘《警界線》，但媽媽說看不下去，蒙嘉慧自言十分正常，因為這正體現了提供多個選擇給大家，而不是獨霸市場。

王維基回應12萬人上街聲明全文

港視主席王維基晚上發表聲明回應，表示會堅持到底，又呼籲港人團結。

以下是香港電視主席王維基以個人名義發出的聲明全文：

十二萬人的呼喚，怎不令人動容。今天大家站出來，不是單為有無電視選擇的問題。大家關心的是，香港當權者有否尊重香港人的意願、香港是否一個依法依制度的特區。

希望，經過今天，大家能明白，香港上下要團結。為香港，不要被一少撮極端思維份子所分化。我們要努力維持香港的公義和法治。

我謹代表公司和同事，多謝關心和支持我們的朋友。我們永不放棄，堅持到底。

王維基

(全文完)

香港電視明晚政總「開台」

港視工會指今晚有50至60人留守政總，擬明晚8時再次集會，若未獲政府回應，集會將無限期持續。香港電視戲劇組總導演劉順安指，他們是自發留在政總現場，和香港電視無關，而會每晚做節目給參加的市民欣賞，讓他們「上街睇電視」，亦會播出一些今日所拍的員工片段，和公眾分享員工所想。他們表示，這是公民抗命式長期抗爭，若不獲回應，將每日持續下去不會停止。他們稱，不能讓香港電視死得不明不白，要求政府解釋並發牌予香港電視，而在周二(22日)行政會議召開後，若沒有回音，他們會再考慮是否把行動升級。