立法會今日討論是否引用權力及特權法，索取政府審批免費電視發牌的相關文件。一批港視藝人好似艾威、張松枝、陸駿光等今日亦重返政總公民廣場支持集會。

今日下午一點左右，佢哋同近二百名港視員工拉住近四萬五千名市民簽名嘅黑布橫額，一同圍繞政府總部行一圈。黃日華同女兒黃芷晴亦有現身，不過黃日華表示剛脫牙故不能多講，只係話﹕「純粹支持！」

對於政府日前拋出「六頁紙」聲明解釋發牌理據，但冇實質資料，艾威直斥冇意義，佢話﹕「只係列張表格你睇，好似驗車紙，無意義嘅！」「港版半澤」陸駿光就話﹕「好重覆同唔合理，又唔俾王生(王維基)公開一啲保密嘢，好唔公平。」問佢哋有冇睇噚晚無綫嘅《東張西望》？艾威寸嘴話﹕「佢哋呢排收視應該唔錯，佢哋所謂嘅事實，唔係事實之全部，上到法庭發誓都要講事實全部啦！」不過，陸駿光自言唔想開電視﹕「所以冇睇。」

有指王維基打算喺三至六個月內轉型或結束港視，問到可擔心前途？陸駿光話﹕「冇，呢刻好重要，冇諗其他嘢，今晚預計留到十一、二點。」而張松枝同港視仍有八個月合約，佢話﹕「搞埋呢件事先，我做咩都得，但覺得香港前途重要啲。如果佢繼續咁搞，咩都佢話事，下一代唔知點？！」問『佢』係指邊個？佢就話﹕「呢啲大家都知，唔講，陣間話唔俾我做香港人呀！」

問到有冇信心特權法會通過？張松枝話﹕「一半一半，我哋盡力呼籲。」之前有議員表示支持發港視牌只屬一小撮人，艾威即刻話﹕「叫啲議員出嚟比吓邊邊人多，呢個世界咩人都有，我哋享受緊言論自由，佢哋身在福中不知福。」

問可有列入樂易玲黑名單中？艾威笑言﹕「應該冇，之前同佢見面都有打招呼。但唔使打『愛回家』熱線，我有高層電話可以直接打。加上除咗港視外，我仲有幫nowTV、有線同港台做嘢，如果無綫或亞視搵我都會開。」而郭鋒、王青、李雨陽同陳曼娜等人亦陸續到場。

今日一班港視員工重回政總，亦呼籲市民今晚坐爆政總。

「港版半澤」陸駿光表示未有擔心前途。

黃日華同囡囡黃芷晴繼續撐。

港視員工真正做到689參選時嘅口號:「齊心」。

咁多簽名，這就是民意。

張松枝應該想不到，自己迫住走上參與社會運動。

王青亦然

噚晚有冇睇《東張》?艾威寸TVB近期收視應該幾好。