「魔童」王維基銳意大搞第三間免費電視台香港電視，可是政府遲遲未發牌開台無期，即使去年向無綫和亞視進行大挖角，撬走黃日華、艾威和夏雨等一班實力派藝人，但製作劇集無期播出，藝人曝光大減。部份無綫叛將陸續約滿港視，無綫雖歡迎他們回巢，但無綫內部已有一張永不錄用的黑名單。曾口臭怒轟無綫的叛將如黃日華及艾威等全部上榜，秦沛因有指摘過無綫，都在黑名單之列。
電訊魔童王維基09年以城市電訊名義向政府申請免費電視牌照，前年更不惜大灑銀彈高薪向無綫和亞視大舉挖角，一度撬走無綫部份花旦小生，甚至甘草和綠葉王，王維基去年公佈把城電正式改名為香港電視，雖然政府遲遲未發出牌照，但香港電視仍不斷製作劇集，為開台做好準備，早前更在網上播出片花，以精采劇集造勢敦促政府早日批出牌照。過去一年，過檔香港電視的藝人雖有劇拍有糧出，可是曝光率偏低，知名度驟減，影響搵外快機會。據知首批跳槽香港電視的藝人將於今年10月陸續約滿，他們有意另覓路向。
■黃日華和艾威等叛將曾唱衰無綫，有指他們已被列入黑名單，反而余慕蓮和丁主惠好來好去，獲歡迎回巢。
設計圖片及對白
艾威：都會唔開心
當日離開無綫的叛將中有不少資深演員，包括艾威、夏雨、黃日華和盧海鵬等，他們曾先後向傳媒炮轟無綫不公，數臭娘家無良，欺壓員工。據悉這批叛將已被TVB列入黑名單，即使將來想回巢都永不錄用，相對一些當日為求財而跳槽的藝人，他們跟無綫關係未致惡劣，所以再叩門都有商量餘地。剛約滿港視的余慕蓮和早前拍港視劇受傷、有過不愉快經歷的綠葉丁主惠，昨日異口同聲欲重返娘家無綫。另據悉雖然秦沛並非簽約港視，但因他也曾為兒子姜文杰狂轟無綫，所以也在黑名單內。
曾指摘無綫的艾威獲悉被列黑名單，未能吃回頭草，他昨日在電話中說：「我當日說話係針對舊老闆，無綫o依家都換咗新老闆啦，大家錯覺，我其實好自由可幫TVB拍嘢，佢哋隨時可搵我。俾任何人列入黑名單都會唔開心，不論邊間公司，邊個機構同黨派。」
■黃日華（右）加盟王維基旗下的港視，曾多次炮轟無綫，故被列入回巢黑名單。資料圖片
■樂易玲（左）曾表示歡迎藝員回巢，近日約滿港視的余慕蓮有興趣重返無綫。資料圖片
余慕蓮：想做靚女
76歲的余慕蓮去年簽約香港電視一年，效力期間雖有參演劇集，但香港電視一直未獲發牌，以致她拍的劇仍未播映，余慕蓮當日離開無綫其實不滿每次只做配角，未能過足戲癮。已回復自由身的余慕蓮可想回巢？她昨日在電話中說：「我度度都想簽，有嘢撈實撈。我年紀唔細，唔簽長約啦，想畀自己自由啲。邊間叫我拍嘢都得，好想佢哋畀我做靚女。」
將於9月約滿港視的無綫前甘草丁主惠，早前為港視劇集《我阿媽係黑玫瑰》開工時，跟扮演黑玫瑰的惠英紅有對手戲，但丁主惠卻不獲安排替身，所以拍攝一場推撞鏡頭受傷，導致後背肌肉拉傷，一度需戴上頸箍。合約僅餘一個多月的丁主惠昨日在電話中說：「因為今次經歷，都係返娘家好，TVB對我好好，之前唔係專登走，係偶然。對我嚟講，TVB畀我返梗係返，主要係我對演戲有興趣，希望佢哋再畀機會。」是否覺得無綫比香港電視更好？丁主惠說：「我喺TVB未發生過咁嘅事，好難比較，但喺TVB嘅時間我係好滿足。」
■綠葉丁主惠過檔港視後參演劇集時受傷，陰影令即將約滿的她走夾唔唞。
資料圖片
陳安瑩：我未夠鐘
先後為港視拍過《第二人生》、《警界線》和《三面形醫》等劇集的陳安瑩，她獲悉有部份藝人將於今年10月約滿，她前日在電話中說：「知道10月有批藝員會約滿，我開緊《導火新聞線》唔覺氣氛有異，大家亦冇再講發牌嘅事。」旗下藝員可有對前景存憂慮？陳安瑩說：「冇聽到，我明年中至約滿，每個人有自己心意，唔排除有人覺得冇前景想返無綫。」問陳安瑩會轉軚叩無綫門嗎？她笑說：「我未夠鐘敲門喎。」可有聽過無綫即使歡迎舊將回巢，但私下都有黑名單？她說：「我唔清楚喎，我係第一批過檔藝員，唔知無綫仲會唔會搵我，約滿時睇吓其他人點先，總之o依家喺度工作好舒服。」
對於被指爆逃亡潮，香港電視發言人鄭小姐昨日回應：「我哋陸續同藝人傾新合約，冇聽過有人話要走，但始終商業機構，有入有出先健康。」無綫外事部副總監曾醒明昨日也說：「我哋大門隨時歡迎有潛質藝人加入或愛回家，較早前有高層都提及。」
話你知：無綫叛將反骨語錄
夏雨
王維基的香港電視遲遲未獲發牌，令不少跳槽藝人心思思想重返無綫，但不少藝員離巢後均曾寸爆無綫，故被列入黑名單。
黃日華
曾在微博轟無綫「totally very bad」，因他不滿劇集《刑警》不受重視，他又寸無綫刻薄，拍攝時間太長，試過捱到肝炎都只得18日休息，當年談續約，5年才每年加薪500元。
盧海鵬
曾爆粗炮轟在無綫拍劇的日子艱苦，他說：「實捱壞咗！我年紀大嘛，入去時乜都應承、乜都話好，成日等咪衰囉，有時等到尾都係摸和（冇工開），啲細胞日日死啲，咁就死?喇。好鬼辛苦，×家鏟！」
艾威
曾在微博怒轟無綫高層李寶安口口聲聲說公平，但卻要求藝人還騷的合約條例不人道。艾威回想在無綫跑龍套的日子，亦自嘲：「直情黐線，黐住2、3線，3、4線；4、5線。」
夏雨
直斥無綫人工低，他說：「作為新人，的士佬會賺得仲多錢，好多人返內地拍劇幾十萬一部，聽到我想搵窿捐……TVB對員工嘅苛刻與吝嗇，係我喺王維基決定辦免費電視台後先至改觀。」
姜文杰
自爆六、七年前加入無綫時騷價只得750元，每年只加50元，寸無綫刻薄。姜文杰曾以經理人身份，陪妹妹姜麗文現身王維基的聖誕派對，被無綫雪藏，其父秦沛即炮轟無綫小器。
資料來源：《蘋果》資料室