陸駿光是誰？前無綫藝人，做過不少跑龍套，好似於《宮心計》飾演張國強手下奸角羅副將，大家應該對他的面容沒什麼印象，在TVB劇中，他的發揮亦不多。不過昨晚，陸駿光卻在政總發光發熱，佢被委派噚晚喺政總做一套港版《半澤直樹》嘅短劇，就係做主角半澤，原來除咗張松枝扮渡真利似，佢扮半澤一樣維妙維肖。

昨晚HKTV四位藝員就以《半澤直樹》造型，上演一套講發牌嘅短劇，由郭鋒、高俊文、張松枝及陸駿光主演，成套劇寸盡CY同蘇錦樑，首先扮CY同局長嘅奸角郭鋒同高俊文一邊就話:「就係你太進取，依家裁咗320人，完全係你商業決策錯誤!」「半澤」陸駿光之後就潤爆「CY」: 「你啲成員跳晒船啦!」張松枝就話: 「我哋呢一行就係最需要人才，而家搞到夢想冇晒!」之後高俊文扮蘇錦樑哽咽，全場市民歡呼。之後張松枝寸爆:「你唔係演員，做返你應該做嘅嘢就得啦!」

然後「半澤」話: 「做返啲大人物應該做嘅事，認錯!」全場亦一齊叫「認錯!」張松枝就爆Seed指住「CY」話「:「我哋香港人一出世就要爭床位買奶粉，讀幼稚園要瞓街瞓5日，有得讀書喇，就比你洗腦!(全場歡呼)我嘅人工只夠住板間房! 而家連免費電視，你都要搶走我嘅remote!交代!」然後全場一齊叫「交代!」最後「CY」同「蘇錦樑」就死死氣返入後台，觀眾企晒起身拍手!

4位演員後來出嚟講幾句，郭鋒話:「多謝市民拎水呀過嚟支持我哋，我一向做開反派嘅(全場笑)」張松枝就插嘴:「咁我呢?(全場又笑)我真係想講，做演員只係做返基本令市呢開心，亦希望政府做返自己基本，令市民開心。」

高俊文就話:「我…一向做高官嘅(全場笑)，今次做反派希望大家鐘意。」最後「半澤」陸駿光話:「其實我讀過演藝，點解一直冇同人講，我考時唔知係做話劇，我諗住做戲嘅啫，因為黃秋生喺入面，知道係話劇呢就好驚，之後就離開咗，噚晚收到個電話話要做話劇，諗過唔接，但點解最後會接呢，因為以後可能冇機會(眼泛淚光想喊)」全場大叫加油，場面令人感動。

早前HKTV拎唔到免費電視牌，陸駿光同HKTV有年半合約，仲剛向女友求婚，不過公司拎唔到牌，令佢計劃都可能告吹，佢當時受訪話:「我跟女友說，若找到更好的對象， 可以離開。」更表示或會考慮轉做的士司機或保安員。

造型幾可亂真