《法外風雲》王浩信激變「兜巴信」 被謝雪心怒摑23巴

今集嘅《法外風雲》可以話係「一個『兜巴信』傳奇」嘅誕生,話說今集講王浩信上去鍾景輝嘅律師樓搞搞震,鍾景輝事後同謝雪心爆晒王浩信啲衰嘢出嚟,心姐忍唔住教訓王浩信,連續摑咗王浩信塊面23巴,真係「巴巴有力」咁狠狠打落去,咁仲唔止喎,心姐摑完佢塊面,再喺佢身上打咗13下,前前後後王浩信畀心姐打咗36下,真係令王浩信激變「兜巴信」。

其實王浩信被摑早有前科,好似去年喺《名媛望族》入面,已經被劉松仁連環怒摑13巴,嗰陣王浩信又係演不孝子角色,今次《法外風雲》又一樣。而有網民就話,無綫塑造嘅角色真係做開有條路呀,好似王浩信咁,俾人摑開嘅就繼續畀人摑;而宣萱次次拍劇都被綁架;石天欣就喺《仁心解碼II》及《巨輪》都有被姦戲份。

另外,今集《法外風雲》又出現咗無綫劇常見劇情,就係「煮個麵你食」,今集鍾景輝原本想煮個麵食,但後尾拎咗塊餅乾,正當想食之際,陳法拉就出現喇,佢見到鍾景輝想食餅乾,就即刻阻止佢,然後就話:「煮個麵你食啦!」唉,差少少就可以唔使煮麵,但都打唔破呢個食麵嘅命運。

《法外風雲》王浩信激變「兜巴信」 被謝雪心怒摑23巴
今集王浩信畀心姐加埋總共打咗36下,當中有23下係摑面。
《法外風雲》王浩信激變「兜巴信」 被謝雪心怒摑23巴
心姐禁不住怒火,要教訓王浩信。(電視截圖)

最直接係一巴星落佢塊面。(電視截圖)

繼續打。(電視截圖)

再打多幾下。(電視截圖)

之後打佢背脊。(電視截圖)

餘怒未消再打。(電視截圖)

鍾景輝原本想食餅乾。(電視截圖)

點知遭陳法拉阻止。(電視截圖)

「煮個麵你食啦!」噢,又係食麵呀﹗米粉或烏冬得唔得呀?(電視截圖)

之前王浩信都畀劉松仁連摑13巴。