噚晚喺政府總部上演咗一場港版《半澤直樹》嘅短劇，當中四位演員演得出神入化，扮CY嘅郭鋒就大家都好熟悉，而張松枝喺《半澤直樹》推出之後已經畀一大班網民話佢似其中一個角色渡真利忍，所以大家都好熟悉。

但最為大家驚喜係扮演半澤直樹嘅陸駿光，一開始大家都唔係好知陸駿光係邊個，但一見到佢個樣就會認得佢，因為佢喺無綫都演出過好多劇，好似《烈火雄心III》、《女拳》、《飛虎》同《潛行狙擊》都會喺主角附近見到佢，雖然唔知佢係邊個，但係就一定會見過佢。而今次佢扮演半澤直樹畀網民大讚話佢好似半澤，更有網民話：「識做戲既冇得在HKTV繼續做，唔識做戲果d就在TVB做足三線劇。」今次四位演員真係上哂位，證明知人善用，唔使靠後台，有一個好角色，好嘅演員就會有發揮。

而另一位可能冇其他三位演員咁搶眼，扮演局長嘅高俊文，佢同陸駿光都一樣，講名你唔知佢係邊個，但係一睇到樣你就會記得佢。佢今次做局長都做得好出色，佢亦講笑自己做開高官，經過咗噚晚，相信大家都對四位演員印象深咗好多。

現年36歲嘅陸駿光，於第十八期演藝學院畢業後加盟無綫，喺無綫投閒置散咗9年，在即將摘取無綫服務十年金牌仔之前，毅然決定投身香港電視，並得到家人同未婚妻嘅支持。陸駿光話：「以前覺得唔被尊重，無綫經理人同做幕後嗰班，唔係好理我哋，行過當見你唔到；其次係人工問題，我走嗰時，只係兩年前，都只係有7千蚊月薪，仲要每兩年續簽，試過幾個月硬食7千蚊，冇生活架！屋企睇電視睇碟，約朋友打籃球！」

無前途又無錢途，陸駿光經常被女飛，卻被誤以前花心，所以成日換畫：「有啲嘢講唔到俾人聽，成日俾人以為好多外遇，依家個女朋友好好，拍咗一年零10個月，今年6月有一次去旅行我喺飛機上面求婚，當時佢喺飛機上面廁所暈咗，返嚟面青口唇白，嗰刻我好想以後都照顧佢，就同佢求婚，佢即場答應，本來計劃咗要結婚，但依家情況，我哋擱置咗結婚計劃。」

陸駿光前晚政總外演出《半澤》，之前一晚半夜先至收到劇本，佢話：「我無睇過《半澤直樹》，係拍完劇收工先睇吓，我知道好大迴響，以前喺無綫係無呢啲機會，就算有好角色，監製想搵你做，都會俾人中途攔截。」

陸駿光喺無綫拍過咁多劇，都冇咩人記得佢，一晚半澤直樹就令人印象深刻，証明努力係有回報，亦証明只要有適合角色，好多演員都可以發光發亮。