日劇《半澤直樹》在香港掀起熱潮，男主角半澤直樹力抗銀行霸權，半澤金句「以牙還牙，加倍奉還」正是受屈打工仔心聲！不謀而合，香港的電視霸權正上映中，日前張松枝、郭鋒、陸駿光和高俊文在政總演出港版《半澤直樹》，諷刺政府黑箱作業，大快人心，劇終後全場站立拍掌。本報昨訪問四位港版《半澤》演員，各自道出一闋哀歌，同時對電視霸權作出大控訴！

陸駿光：下一代冇出路

一場港版《半澤直樹》短劇，令在劇中飾演半澤的綠葉演員陸駿光一鳴驚人。演藝學院出身的他，入讀無綫第十八期藝員訓練班，36歲的陸駿光早已學好做演員的上中下路功夫，滿以為入行後有用武之地，可惜在無綫9年來未遇好時機，高層不屑一顧，他毅然過檔港視，竟獲老闆親自鼓勵，奈何公司未獲發牌，本計劃明年結婚的陸駿光惟有將婚期押後，考定健身教練牌，無奈謀定後路，昨日他便向本報記者訴說苦況。

陸駿光（36歲）
年資：11年
曾演劇集：《爭分奪秒》演肥狗、《潛行狙擊》演葉昌
港版半澤直樹角色：半澤直樹

冇錢去飲扮返工

「喺無綫做咗9年，每個月只得7,000蚊人工，雖然夠兩餐，但冇乜娛樂，平時只可以約吓中學同學打籃球、睇戲，飲酒都唔敢去酒吧，最慘收到請帖，o依家公價人情要800，試過一個月收兩張，惟有扮返工唔去，我冇能力食嗰餐飯，連買衫都少，着嚟着去嗰幾件，最慚愧係同屋企人食飯，新年飯千幾二千真係畀唔起，十次有十次都係阿哥畀錢，個心好唔舒服，好在阿媽、兩個阿哥同家姐都支持我。

喺無綫做同樣係演員，但公司較高嘅高層焦點只會喺一、二線或力捧嘅藝員身上，對我哋呢班唔會留意，連傾偈都冇，總之好少理唔係經理人合約藝人，我哋對公司都冇歸屬感，但去到港視唔同，有次慶功宴上，大家都好自由，冇編位，鍾意坐邊就邊，王生（王維基）坐我隔籬，成晚傾偈，好友善，畀好多鼓勵，感覺似中學老師，同成班人打成一片。

■陸駿光與女友原定明年10月結婚，因港視不獲發牌而要擱置。

■陸駿光經常光顧這間滿有人情味的粥店，獲店員叫他要加油。
攝影：陳順禎

我之前向女友求婚成功，婚期原本計劃下年10月，但婚後要置家，又燈油火蠟要食飯，有得做就話同老婆一人一份，o依家要擱置，未婚妻好好，佢同我共患難，對於女友我好慚愧，有次去南丫島，買咗條140蚊嘅鏈畀佢，佢話好開心收到我第一份禮物。

擬考健身教練牌

喺港視工作，好似電影《少林足球》咁，我成日做運動保持最佳狀態工作，點知政府唔發牌，真係好可惜，我會為公義，要爭取，我合約2015年4月約滿港視，仲未諗後路，睇王生點，如佢轉型我全力支持，但如果差唔多約滿佢都未有任何計劃，會考慮轉型，呢年半時間我準備考健身教練牌，或再讀演藝學院戲劇碩士課程，讀書可以教書，不過，教下一代對戲劇有興趣又點吖，都冇出路，叫唔叫佢哋奮鬥好？港視咁努力都唔發牌！所以我希望發牌畀我哋，等演藝工作者有個希望。」

張松枝：無綫12年冇加人工

張松枝（36歲）
年資：19年
曾演劇集：《離島特警》演沈天佑、《回到三國》演趙子龍
港版半澤直樹角色：渡真利忍

有「御用二世祖」之稱的張松枝，在無綫工作了18年，看着一個大家庭因制度變成冰冷沒感情的公司，為追尋夢想，張松枝放棄穩定收入過檔香港電視，得知港視未獲發牌即時失去方向，高呼還我一個電視夢！

「喺無綫18年，後生時好有衝勁，就算有唔開心、困難都好易過，因為有夢想，嗰時公司都似大家庭，但去到中段開始有改變，同同事有啲疏離，感覺有啲鬥爭，做得冇咁開心，去到尾段，政策上改變令我唔係咁接受。
做咗12年都冇加我人工，每次傾續約都話政策係咁，我哋係小演員，根本控制唔到，生活上，人工唔多要慳住用，有時好彩爆到騷，之後幾個月咪可以寬鬆少少，如果冇就要慳，畀埋家用，所剩無幾。

■張松枝（右）獲豬肉檔的波哥支持，令他感到很開心。攝影：陳順禎

發唔到牌好灰

喺無綫拍劇好多時廠景接外景，外景接廠景，試過只得15分鐘休息，好彩有兩場冇咪可以瞓耐啲囉，拍《回到三國》最辛苦，天氣熱又要着盔甲，打兩吓已經濕晒，又脫水，冇晒體力，有次差啲休克。

加入港視，老闆王維基同我哋講方向、製作、未來會點，聽到覺得自己有個新希望，家人初時都擔心，如果喺無綫有穩定人工，但我太太講：『如果你唔出去博，你會唔開心。』知道發唔到牌，我可以用震驚嚟形容，好灰，點會咁㗎！可以唔發牌但又冇解釋，個人冇晒方向，乜都可以發生，唔係預計之內，我太太話：『老公，你放心，船到橋頭自然直。』佢安慰番我，家人支持令我冇咁失落。

我仲有8個月就約滿港視，之後條路點行，到時再諗，我會睇王生頭，雖然發牌轉機好渺茫，但我都要講，希望政府可以畀番個夢想我！」

郭鋒：香港變秦始皇時代

郭鋒（61歲）
年資：42年
曾演劇集：《季節》演唐季全、《巾幗梟雄》演王爺
港版半澤直樹角色：大和田

七十年代已效力無綫的「綠葉王」郭鋒，三度離開娘家闖天下，無論在哪個電視台工作，都只想向觀眾提供優質免費娛樂，無奈政府拒發牌給港視，打沉有誠意的電視台，郭鋒認為政府黑箱作業兼不停打壓，感覺猶如進入秦始皇時代。

希望得到真相

「我哋o依家等司法覆核結果，政府唔發牌呢件事，引伸出一個社會問題，政府每日都搬出政策嚟解畫，一籮籮咁搬出嚟，變咗越遮越黑，佢得一個蓋，但整咗咁多桶，點冚呢？我哋最大訴求係希望得到真相，無論為自己、為大眾都好，只求尋找出真理。政府呢次唔單止打沉受害嘅公司，仲打沉全香港真係想有好生活嘅巿民，仲會有連鎖反應，一路落去民生都會有問題，再咁落去香港會變咗秦始皇時代，特首就係秦始皇，香港變得好封建，大家有讀過歷史都知封建嘅苦況，點解會有革命，為咗我哋同下一代嘅將來，我哋要爭取。好多窮苦基層大眾，佢哋冇錢最大娛樂就係睇免費電視，點解呢樣嘢都扼殺佢哋？

我試過三度離開無綫，每次離開都有唔同原因，我覺得無綫十幾年前都有創意，但近年佢哋開始不求變，好公式化，相反我過到嚟港視，覺得台前幕後好積極，工作氣氛好好，大家好認真。王生（王維基）搞得公司好團結，佢有一份凝聚力，有領導人嘅方向。」

高俊文：政府打爛我飯碗

高俊文（55歲）
年資：36年
曾演劇集：《巾幗梟雄之義海豪情》演海吉隆、《雷霆掃毒》演陳堅
港版半澤直樹角色：一男子部長

無綫前藝員高俊文自稱當年與汪明荃拍無綫劇集《我的野蠻奶奶》，飾演皇帝的他首日開工便因NG被阿姐罵，最終更失去該角色。現為港視藝員的高俊文昨受訪時，坦言未放棄發牌希望，對政府的處理手法更是無名火起，並已有心理準備申領綜援。

創業最終係打壓？

「同港視仲有十個月約，我個年紀出面好難請，冇辦法下惟有加入綜援大軍，我都唔想，好肉酸，唔通你叫我去洗碗咩？我都要生活，一家三口，仲有40年捱。我對政府非常失望，唔明運作係點，批兩個牌畀奇妙同now，大家都知有收費電視背景，我哋冇，但未有牌已做好110%準備，一個儍佬大無畏投資大量人力物力金錢，得出咁樣結果，你話畀我聽香港係一個乜嘢社會！失望係對政府。

好多謝公司畀機會我哋做個舞台劇（港版《半澤直樹》），亦多謝政府畀咗呢個機會我哋上台，反映政府所謂要員係點樣，唔好喺鏡頭前先做嘢，你做番你應該做嘅嘢就得！官字兩把口，你同佢講乜都多餘，點解叫我哋創業最終係打壓？理據何在？上法庭講即係做咗擋箭牌，所謂一籃子，我做呢個劇時知道乜嘢意思，係不論有理、無理、不理都好，掉晒落個籃度！未睇就判死刑，冇得上訴，亞視仲話考慮司法覆核，真係離晒大譜。唔好當我儍，我係一個演員，從來唔會拒接通告，o依家佢打爛我飯碗！我哋要keep住團火，唔可以熄，只要公司唔放棄我，我同王生、同事一齊前進，我哋唔會放棄！」