輕鬆走過烽火、浮華大地，以真人騷形式主持旅遊節目起家的洪永城（Tony），卻因由有線轉到無綫，知名度激增而令步伐變重，幸好Tony一早預計有負面新聞，不但沒被打倒，反而努力儲起知名度，希望能用自身的影響力繼續義工工作，原來，幫助別人才是他要走的大地。

撰文：羅美倫

自從做有線旅遊節目開始，洪永城已奠定乖仔主持形象，但因有線觀眾有限，他的發展亦有限，但自去年簽約無綫，主持《走過烽火大地》後知名度大增，他亦正式感受到電視台的威力，他說：「落到街，師奶又好，普羅大眾又好，都認得我。有次去超市，有師奶係咁摸我對手臂，問我係咪Tony？仲話要影相，哈，係有啲師奶客嘅！」

■Tony坦言現在的最大目標是做更多有助社會公益的事，故他一直努力做義工。
攝影：陳順禎

■曾以全裸示人的洪永城，自言沒底線沒形象，為求好效果，甚麼都樂意試。資料圖片

■洪永城大前年曾夥拍梁詠琪到墨西哥拍攝旅遊節目，當時他已很喜歡扮鬼扮馬。資料圖片

以祖藍為目標

樹大招風，以往做節目只有正評，在無綫終嘗到惡評，《走過烽火大地》曾被指造假，令Tony感受到免費電視的威力，他說：「以前冇人批評，大部份好口碑，到無綫開始有負面嘢，官腔啲係總有進步嘅空間嘅，都預計到有負面反應，呢個電視台由二萬人睇變到二百萬人睇嘅影響，亦都知自己嘅生活從此唔同。」

跳槽無綫，做過主持再試演戲，Tony最近夥拍陳展鵬、陳茵媺及林夏薇主演新劇《單戀雙城》，原來他小時曾想過做演員：「曾經諗過考電視訓練班，不過後尾去咗讀書，兜個圈返嚟。」不過在娛樂圈縱使發展有多好，Tony的真正目標，還是用自己的影響力多做義工幫人，有做義工的他說：「我嘅目標冇變過，做演員係畀我尋找身邊嘢，但出嚟係想做多啲社會公益，好似王祖藍咁，以佢為目標，多做對社會有貢獻嘅嘢。唔係人人對公眾都有正面影響力，??家儲吓能力、粉絲。如果只係睇個人紅唔紅、賺幾多錢，太表面喇！」

■由收費電視跳槽免費電視，令Tony見識到二百萬人睇電視的威力。

■與黃翠如是好拍檔，感動時會攬住對方，但Tony強調只有親人的感覺。
資料圖片

視黃翠如親人

Tony希望對公眾有正面影響力，卻從不顧及自己的形象，之前演《瘋狂歷史補習社》的武大郎，甚至為now拍旅遊特輯以全裸示人，是徹底沒底線，Tony卻不以為然：「做武大郎反應唔錯，一來還騷，件事又好玩，細個都想做清兵、路人?！我嘅好處係冇底線，全裸係噱頭嘢，節目已經冇乜人睇，唔做番啲嘢吸引人睇更加冇人知，開心咪去囉，有好效果就得，只係當時嘅女友有微言。」
成了名，Tony的節目不但被質疑，更加被起底封做媾女王，現時單身的他即提出抗議：「邊有成日媾女呀？冇女友嘅男仔識女仔好正常啫，我都係正常人，都有需要?嘛！」現在媾女，豈不是更麻煩？他笑說：「會?，老實講我都想拍拖，甩拖一年，有愛情會令我更加專注工作，尋找緊，無綫都有好多好女仔。」那緋聞女友黃翠如呢？Tony說：「同佢幾有淵源，算係我生命中幾重要嘅拍檔，不過有啲異性未必想佢做你情侶，感動時都會想攬住佢，不過係親情嗰種攬。」

■洪永城（左二）深受無綫器重，成為新劇《單戀雙城》男主角。資料圖片

螢幕初吻獻村姑

洪永城空降無綫，未做過配角已拍住陳展鵬做《單戀雙城》男主角，惟有事前做足功課，Tony笑言：「睇咗演員自我修養啦，我會拋開壓力專注角色，咁先係真正演員。」他強調自己沒底線、沒形象，試做奸人更好玩，因現實中奸不來。

問到Tony的螢幕初吻獻給劇中前女友陳庭欣還是最後成雙的林夏薇，Tony鬼馬說：「之前幫now拍《食勻全中國》，畀咗個五、六十歲嘅村姑，係佢衝咗出嚟咀落我嘴唇度，叫佢畀番封利是我又唔畀！」
至於真正拍戲的接吻經驗，Tony與陳庭欣在接吻時卻因太多記者在場，十分拘謹，對於30歲才拍劇，是否起步遲？Tony說：「太細冇人生閱歷，啲感覺唔準又未夠味道，而且唔應該有年齡限制幾歲做乜嘢，55歲都可以學打網球、學做導演，喺法國見過白頭髮阿婆攞住手提攝錄機拍嘢，唔使有年齡、性別限幾時要有乜做乜，框框可以闊啲。」

■洪永城笑言是前世積福，才有幸遇上余詠珊。
資料圖片

感激伯樂余詠珊

洪永城在無綫發展不俗，全靠伯樂余詠珊，原來他當日應徵有線旅遊節目主持時，幾近淘汰邊緣，最終因個性配合到節目方向，令他有得留低，兼殺出一條血路，Tony說：「見工時二百幾人，每人派一個籌，分三組，A係機會高嘅靚仔、靚女，B係漏網之魚，C就係準備返屋企嗰啲，我係B，咁啱余詠珊睇呢組，佢就揀咗我。」Tony覺得自己好彩，或是前世積了福，才讓余詠珊出現，看到了他的特質，也相信他能吸引觀眾，Tony不避嫌向恩師擦鞋：「呢啲就係佢嘅實力。」