港星吸毒實錄

【莫孫毒網之娛圈玩家】莫少聰同孫興喺北京分別涉嫌吸毒及藏毒，被北京警方拘捕，至今兩人已被拘留 10日，呢次京警藉莫、孫兩人祭旗，相信會令中、港、台藝人有好大警惕。

其實娛樂圈毒風唔只單單喺內地演藝界發生，唔少香港歌星同藝人都有吸毒嗜好，例子比比皆是，好似女星 A喺片場飲「毒水」，男歌手 B吸食可卡因搞到成日流鼻血，男歌手 C離譜到將大麻當香用，仲有影帝 D、電視小生 E、同埋明星仔 F，呢 6位藝人到家都仲係沉淪毒海，如果佢哋唔懸崖勒馬，恐怕遲早都會步孫、莫後塵，到時就喊都無謂。

孫興（左圖）和莫少聰因涉毒在本月 15日連環被捕，事件震驚中港台娛樂圈，不少曾有不良嗜好的港星亦人人自危。資料圖片

1〉女星 A：毒水壺隨身寶

 

女星 A係出名毒后，佢誇張到喺片場度，將毒品溝水放入水壺嚟飲，而且男女關係都亂七八糟，當年佢同奀星拍拖，去酒吧貴賓房消遣，撞到女星 A好仰慕嘅當紅男星喺隔籬房，女星 A趁男友行開即刻去搵 high緊大麻同 K仔嘅男星，女星 A唔只食埋一份，仲情不自禁咀起嚟，奀星見到咁情況梗係即場同女星 A分手啦！

2〉男歌手 B：狂索粉流鼻血

 

幾年前有一位花弗男歌手 B本想開演唱會，但結果當個騷樣樣嘢都籌備得七七八八嗰陣，就臨時取消咗，好多人唔明點解個演唱會要取消，但據知情人士爆料，原來取消嘅原因係男歌手 B吸食可卡因過量，令到佢嘅鼻內膜傷晒，成日流鼻血，把聲都唔掂，結果佢公司就只好取消幫佢開演唱會。

3〉男歌手 C：大麻香玩遊戲

 

有位已婚曾紅過嘅男歌手 C，咪睇佢平時唔聲唔聲，真係嚇你一驚，原來佢喺屋企收埋咗好多大麻，有次朋友上佢屋企玩，佢提議玩遊戲，呢個遊戲需要燒香，但佢屋企又冇香男歌手 C竟然攞咗一個大木盒出嚟，裏面裝住成盒大麻，然後用張白紙嚟捲大麻當香用，就係咁佢一晚就燒幾支大麻香。

4〉影帝 D：住家淫亂派對

 

影帝 D上咗毒癮後，佢成日請好多朋友返屋企開毒 P，佢同女友每次都準備大堆大麻、 K仔同開心果去招呼朋友，仲溝埋威士忌一齊 high，次次成班友都嘈到拆天，搞到鄰居怨聲載道，但佢依然懶理，得閒就請埋幾個二、三線明星朋友喺屋企「開飯」，有時神志迷迷糊糊時，仲玩調轉情侶嚟親熱，男女關係搞到一團糟。

5〉電視小生 E：警局附近開餐

 

電視小生 E原來都沉迷毒品，好多圈中人見過佢 high嘢，索 K、冰乜都有，有次佢去公開活動，鼻哥仲留有白色粉末，可想而知佢吸得幾犀利。電視小生 E專去朋友開嘅餐廳私竇 VIP房吸毒，一來有熟人把風，二來呢間餐廳嘅所在地竟然喺正差館附近，人哋話最危險嘅地方就係最安全嘅地方，電視小生都算沙膽啦。

6〉明星仔 F：包酒店開毒 P

 

明星仔 F又係吸毒專家，但佢就唔鍾意喺屋企吸毒，因為佢家教好嚴，唔想畀家人知道佢有不良嗜好，所以明星仔次次都好大手筆，喺酒店 book宴會廳或者包晒成間夜店當私竇開毒 P，約埋班朋友大肆吸毒，隊到 high晒就索性喺酒店過埋夜，一條龍搞掂晒，咁就神不知鬼不覺，瞞天過海呃到屋企人。

王菲與毒后劃清界線

貴為樂壇天后的王菲在微博留言（下圖）叫大家不要稱呼她做天后，擺明要與近來在內地網民亂估的涉毒天后劃清界線。資料圖片

莫少聰和孫興涉毒被捕事件引起軒然大波，盛傳北京警方近日已掌握演藝界的吸毒藝人名單，當中包括天后、影后、影帝和大導演等多人。未知是否「天后」之名敏感，王菲昨日在微博說：「天后最近不是什麼好詞兒。快別這麼叫了。」

孫楠 6年冇見孫興

孫楠強調自己生活健康，連啤酒都不喝，更絕對不會碰毒品。資料圖片

另方面，內地樂壇一哥孫楠近日被牽涉入涉毒名單風波，前日他發出嚴正聲明否認之餘，更接受記者專訪說：「我本人必須親自站出來維護尊嚴，否則有人會說我心裏有鬼。我與孫興至少 6年沒見面，他女朋友是誰我都不知道，連在一起喝杯水的機會都沒有，他吸毒為何把我扯進來？」孫楠強調現時自己生活非常有規律，準時睡覺外，更有跑步踢波。孫楠說：「因為要吃中藥，現在我連啤酒都不喝了，這個習慣我一直堅持，可以說，我與毒品挨不上一點邊。」

莫少聰遭拘留情緒低落

自 15日被捕的莫少聰（小圖），一直被關在設備簡陋的拘留所內。

莫少聰與孫興因涉毒在內地被捕後，有傳會被行政拘留 14日才會被釋放，據悉他們的家人和經理人從一些特別途徑到拘留所探監，據知聰仔情緒頗低落，因不適應拘留所的環境和飲食，加上擔心負面消息會影響事業發展以致失眠。孫興性格雖然比較樂觀，但他都有擔心今次事件會影響在內地發展。
現時在北京發展的中港台吸毒藝人，當然是心驚膽跳，深怕被捲入第二波拉人行動，不過據北京一些親警方人士透露，太紅和知名度很大的名人或明星，警方會有顧忌，不會隨便行動，免得迴響太大，損害國家形象，所以警方拉人也是有技巧的。