同闊少男友結婚變分手 33歲胡定欣自爆失戀

一直傳好事近,之前更傳出年底嫁給任職廣告界、開製作公司的闊少男友沈柏淳(Patt)的胡定欣,今日出席新劇《名門暗戰》宣傳活動時,突然宣佈分手。兩人拍拖未夠一年已經同居,如今竟毫無先兆話分手,令人錯愕。

定欣說:「係近日嘅事,一齊兩年幾,分手都覺得可惜,之前有唔開心,依家OK。」是否已達談婚論嫁階段?她說:「雜誌寫,冇呢回事。」

定欣又強調兩人再見亦是朋友,但係問到點解忽然分手?她說:「好難用性格不合嚟形容一段關係,相愛先拍拖,總之我哋知咩事就可以,唔想交代咁多。」

好姊妹胡杏兒同黃宗澤分手時,定欣一直陪同在側予以支持;如今定欣甩拖,亦幸好有一班姊妹陪伴。問到班姊妹有冇介紹男友俾佢?她說:「之前為療情傷放咗4、5個月假,依家專心工作。」

33歲胡定欣 宣佈同闊少男友分手
兩人拍拖未夠一年已經同居,如今竟毫無先兆話分手。據知Patt為「hivemind」廣告有限公司創作總監。

年初被揭偷食 求婚補鑊 胡定欣曾離港療情傷

2011年,定欣同馬國明分手,當時負面新聞一直纏著定欣不放。及後認識Patt,火速打得火熱,拍拖一年即共賦同居。惟今年年初Patt被踢爆偷食,男方被爆於除夕派對同一女子突然雙雙「失蹤」,激嬲定欣,定欣更嬲到單拖去紐約旅行散心。為挽回女友對自己的信心,Patt隨即向定欣求婚,二人更定下婚期為明年初,趕得到就今年尾。

據知Patt為「hivemind」廣告有限公司創作總監,甚多圈中好友如關智斌、胡蓓蔚同單立文十分熟絡,常約飯局開P,亦因而認識定欣,2012年拍拖,不時大晒恩愛,胡更火速進駐男友於渣甸山愛巢,一於同居試婚。

向來戀愛大過天嘅定欣已經三字頭,一心希望35歲前出嫁。喺爆出男友偷食之前,據知佢已經疊埋心水等嫁,仲搵定好友張敬軒和胡杏兒做伴郎伴娘,諗住拍完同黃宗澤合演劇集《點金勝手》之後就籌備婚事,豈料未幾就爆出方才提到嘅除夕偷食事件,Patt急急箍煲,之後更出動求婚一招,定欣予以原諒,更有周刊報道指定欣向公司申請半年大假,待7月初新劇煞科即全力搞婚事,點知結婚變成分手。

吳浩康最霉時不離不棄 胡定欣為冧馬明去到盡

再受情傷嘅胡定欣,曾分別戀上吳浩康同馬國明。同吳浩康04年拍拖,06年公開,當年吳浩康曾有藏毒和打人前科,外間不予睇好,但定欣卻不離不棄,直至08年男方搭上莊思敏才分手收場。當時還流傳一則「都市傳說」,指莊思敏同定欣同lift,有人寸爆對方「着舊鞋」。定欣否認。

至於同馬國明一段戀情,始於08年合作《舞動奇跡2》撻着,拍拖兩年,有傳馬明難頂女友公主病,最終於年前提出分手。但就傳定欣一直勁冧被視為圈中筍盤2號嘅馬明,故一直未願放手,努力箍煲,除不願搬離跟馬明只係一街之隔嘅太古城屋苑外,又對馬明孝順性格行「奶奶」政策博好感,兼夾甘願降呢為馬明與楊怡主演嘅《On Call36小時》充當老臨、過鏡6秒,愛得癡纏。可惜馬明分手意決,定欣終決定放手,更搬離太古城。

娛圈不能說的詛咒 慧敏詩韻豪門夢碎

如果娛樂圈有一個不能說的詛咒,就是事先講自己準備結婚!如果不是,也不會頻頻有「臨門撻Q事件簿」!

去年3月陸詩韻,被發現和一個男士,同遊汶萊及馬來西亞,回來香港馬上開記者會,澄清那位是未婚夫Jeffery。二人拍拖4年,戀情公開後,在同年9月就分手了,還因為做過未婚夫公司借貸擔保人,被追數71萬元。

09年朱慧敏高調宣佈,與台灣搞 IT生意的億萬闊少Rick Chang拍拖,透露隨時出嫁,誰知男友被拍到攬啜辣妹,更傳男方悔婚,臨門分手。

不過她們都不及組合農夫的C君傷,事關數年前原本他打鑼打鼓訂好酒席準備做老襯,點知慘遭女友Gloria悔婚,有指因為C君患有先天性地中海貧血,恐防遺傳下一代,故忽然拒嫁…但冇耐Gloria就被揭同C君老死撻着,令C君傷上加傷。