童話式婚禮變客家式婚禮，咁大變化！就嚟36歲嘅胡杏兒為咗未來老公Philip Lee（李樹華）真係乜都肯制！話晒杏兒同男友拍拖冇耐，已認定對方係結婚對象，去到談婚論嫁嘅階段，亦落力mark實筍盤男友Phil，每次講起男友都流露出甜絲絲嘅樣!

杏兒喺無綫做咗16年，早前離巢去內地發展，更以高價簽咗畀蕭定一發展佢嘅演藝事業，愛情事業兩得意，更屢出婚訊，早前有報導爆杏兒喺今年12月28號喺英國行禮，搞200萬元童話式婚禮!NO!NO!NO!

記者收到消息原來胡杏兒嘅婚禮，唔係喺英國舉行，而係喺香港大搞，所以杏兒同Phil嘅好友都唔使煩要度期飛去英國咁遠，出席佢哋嘅婚禮喇！由於杏兒工作好忙，婚禮就由Phil全權負責，Phil日前出席何猷君手機app搞嘅酒會，見佢個樣有啲殘，又爆瘡，未知係唔係搞婚禮，壓力好大!

點解杏兒突然間由英國變咗香港出嫁，極有可能係因為男友Phil嘅出身背景，據知，喺英國長大嘅Phil原來係沙頭角禾坑村民，禾坑村裡面都係住咗姓李嘅客家人，盛傳因為Phil係屋企長子，必須喺拜祠堂，亦因為Phil係傳統客家男孫，婚事亦要入鄉隨俗，入門前一對新人要喺沙頭角新村李氏宗祠入面拜祠堂同祭祖，求祖先庇祐祈求早日開枝散業。

估計杏兒為男友都會跟足傳統去做，難怪杏兒講明想一次過生3個，原來早已為李家添丁作好準備!相信屆時嘅場面就好似周潤發同鄭裕玲套《我愛扭紋柴》沙頭角圍村類似嘅儀式，好似舞龍舞獅、燒炮仗咁，真係諗起都覺得墟冚，之不過，同之前講話搞個童話式婚禮，真係好大出入囉！唔知杏兒收唔收貨呢？

胡杏兒明生日開訂婚派對

對於再傳出與男友Philip下月在港舉行婚禮，胡杏兒下午回回應說：「多謝大家關心，我講過有好消息一定同大家講，這個消息傳出來我都有啲突然，總之大家唔好心急啦！」

而明天是杏兒的生日，Philip向來識得氹女朋友，當然會花心思為杏兒搞一個甜蜜的生日派對，Philip明晚會為杏兒搞一個生日兼訂婚的驚喜派對，更請來身邊不少好友出席，實行要大家見證二人最甜蜜、開心的一面，更會是二人婚禮的預演。