胡杏兒新歡曝光 台北街頭激吻度春宵

Dry足3年嘅胡杏兒終於有新歡啦!男主角就係佢。兩個人錫完,嚟個含情回望,再攬攬。呢啲咪叫愛到難捨難離囉!

之前胡杏兒上載一張「我找到了」,掀起全城哄動。好彩係流料,大家都知李思捷幾咁風流成性架喇!而上年年尾杏兒又喺微博晒收花照,仲話收咁多次花,呢次最開心,網民紛紛猜測佢有新歡。

果然估得冇錯,杏兒真係搵到真命天子啦!就係呢位Philip Lee,朋友通常稱呼佢做Phil,係獵頭公司老闆,身高六呎嘅佢同杏兒相當匹配。近期忙緊拍真人騷《奇妙的朋友》嘅杏兒,上個禮拜趁有兩日空檔,就即刻飛去台北會男友。

唔知係咪離開咗香港,杏兒警覺性相當之低,戴咗副超出門嘅佢,由男友送去搭的士。兩個人攬住錫錫,之後嚟多take,又再攬又再錫,最後嚟多個含情回望,杏兒成個少女咁笑晒,二人再攬到實一實。短短十幾步路,三攬兩錫,認真難捨難離。睇嚟呢次杏兒真係「我找到了」!

台北會新歡 胡杏兒街頭嘴攬啜

24小時黐實 杏兒孖男友酒店度春宵

忙緊拍真人騷嘅杏兒,上個禮拜趁有兩日空檔,就即刻飛去台北會男友。24小時杏兒全程黐實男友,出席完婚宴再轉場夜蒲,玩到累齊齊返酒店度春宵!

其實喺呢24小時內,杏兒同男友Phil都離唔開個「錫」字,喺朋友面前錫,婚禮完去等的士,又再錫,有冇再煙韌啲呀?

之後兩個人返酒店換好衫,轉場去夜店再蒲過,全程都係秤不離砣。送走兩個朋友,兩個人仲未捨得走,Phil攬住杏兒條腰,再嚟一招甜蜜箍頸。纏綿完一輪,兩個人差唔到去到天光,先返酒店玩埋下半場。

第二日,兩個人就著住Casual wear行出酒店,個樣好似好累咁喎!鬼咩,兩個人都唞唔夠5個鐘。因為杏兒趕住返廣州開工,男友就送佢搭的士去機場,全程又係一個「錫」字!

胡杏兒新歡曝光 台北街頭激吻

拍拖3個月男友已求婚 胡杏兒閃嫁

胡杏兒同新歡Phil喺台北街頭,錫完又再錫,愛到難捨難離。據知男友已經向杏兒求埋婚添啦!

兩個人雖然只係拍咗短短三個月嘅拖,不過已經火速認定對方係另一半。上個禮拜六(24日),杏兒就陪男友去台灣出席朋友婚禮。兩個人成晚十足十連體嬰,拖實手仔,錫錫面珠仔,再心口貼心口,攬到實一實。又周不時含情脈脈四目交投,甜蜜程度應該拍得住當晚一對新人。

之後Philip又介紹佢啲朋友俾杏兒識,一班friends影完合照,梗係到二人自己影番張相留念啦。情到濃時,二人仲當眾嘴嘴,認真煙韌!

據知40歲嘅Philip已經向杏兒求咗婚,35歲嘅杏兒亦準備好隨時閃婚。娛樂圈好快又多一名靚靚人妻啦!

胡杏兒新歡曝光 台北街頭激吻

被要求絕跡幕前 杏兒唔續約要做媽咪

男友Phil連婚都求埋,隨時閃婚嘅杏兒,仲分分鐘會絕跡於娛樂圈呀!

最近傳出被無綫冷待嘅杏兒,有指約滿之後就會離巢。咁打工呢家嘢,東家唔打打西家啫!非也非也!杏兒同男友Phil有共識準備閃婚,大男人嘅Phil就要求婚後杏兒唔好再做幕前,所以杏兒依家已經暫停晒所有同無綫傾續約嘅事,又冇去敲其他公司門,一心一意準備結婚做人妻。

依家拍緊強國真人騷嘅杏兒,負責幫兩隻猩猩餵奶、換尿布,呢個經驗激發起杏兒潛藏嘅母愛,早前佢就自爆想做人媽媽。嘩!啲timing可以話夾都冇咁啱呀!其實話時話,杏兒都35歲,想生小朋友就真係趁早啦!

胡杏兒新歡曝光 台北街頭激吻

杏兒準老公開公司搞夜場

原來杏兒同新歡Phil係一見鍾情!高高大大嘅Phil,從事金融工作,無論外型定背景,兩個都可以話係十分匹配!

40歲嘅Phil之前喺倫敦從事金融工作,年前先返香港發展,開咗間獵頭公司,亦係夜場Play嘅其中一位投資者,屬於白手興家嘅才俊。

據知情人士透露,Phil近呢一年已經修心養性,家庭觀念越嚟越重,都想結婚安定落嚟。佢同杏兒經朋友介紹認識,一撻即着,友人話以前 Phil拍拖唔會成日將女友個名掛喺口邊,不過呢次就經常喺朋友面前讚杏兒點好點好。出席婚宴又周圍介紹杏兒俾朋友識,人前人後都相當恩愛。

難怪拍拖三個月,男方已經同杏兒求婚,而杏兒亦好冧對方,準備好隨時閃婚。所以話愛情呢架嘢要嚟嘅時候,真係擋都擋唔住呀!

胡杏兒新歡曝光 台北街頭激吻

視頻:胡杏兒新歡曝光 台被街頭激吻

胡杏兒認戀李詩韻舊愛

35歲嘅胡杏兒終於搵到真命天子,同李詩韻舊愛、40歲年輕才俊Phil,兩人經朋友介紹,一見鍾情,拍拖3個幾月,熱戀期難捨難離,一見面即如接吻魚,在台北上演喪啜街頭,旁若無人。

杏兒接受訪問時,亦落落大方承認戀情,佢話:「係呀,係拍拖喇,男朋友好好,唔好嚇走佢呀,而家喺廣州拍緊真人秀,返黎再同大家講啦!!❤️」