恭喜恭喜！黃長興太太Peggy，今日喺養和醫院剖腹誕下6.3磅B女，榮升爸爸嘅長興難掩喜悅心情，見到B女出生一刻，已經眼泛淚光。

長興接受傳媒訪問時話：「見到佢嗰下真係想喊，但因為見到老婆都冇喊，所以即刻收一收。想喊喺因為見到BB手腳、眼耳口鼻都齊晒，見到咁已經想喊，因為我哥哥個小朋友出世時，眼皮位有胎痣，見到BB白白淨，就已經好開心。」

長興話本來想親手幫囡囡剪臍帶，但因自己當時只係顧住幫BB影相，結果錯失機會：「我帶咗三部相機入去，姑娘問我影完未，我話未影好，但可能影太耐怕BB失温，所以姑娘已經抱走咗佢。」

今次剪唔到，不如再追多個，到時有晒經驗，一定得啦！長興即謂：「會啊，補番剪臍帶，不過等太太養返好身體先，希望可以生個仔，太太自己都話想生三個。」