黃浩獨資二億收購都市日報 組狗仔隊專攻娛樂版

千真萬確,黃浩,亦真係嗰個黃浩——徐淑敏老公,之前同曾志偉單「掌摑風波」搞到滿城風雨,依家兩人都分別願意伸出友誼之手……志偉叫對方「放下」,黃浩就話「可以好friend咁握手」——點解故事咁快發展到黃浩買咗《都市日報》做老闆0架?

黃浩方才接受電話訪問時承認收購《都市日報》一事,作價2億,暫時得佢一個股東,換言之係獨資,7月31日成交。黃浩表示:「暫時係獨資,未來會引入新股東。」

徐淑敏老公黃浩收購都市日報

專攻娛樂版 聘人組狗仔隊

被問到會否有人事變動?甚至報格會否有變?黃浩就話:「暫時人事唔會有變,風格都唔會有有大改變,只會加強。」

咁會加強乜嘢?黃浩就話主力係副刊同娛樂版。「娛樂版嗰度,我哋會加強人手。依家我哋冇自己嘅狗仔隊,所以我哋考慮加狗仔隊。」

成為「傳媒大亨」,黃浩主攻OL同女士最like嘅娛樂版,果然有諗頭。黃浩仲話:「我希望可以多番啲獨家新聞,希望改變吓,我亦會鼓勵旗下記者做獨家新聞。」

眾所周知,黃浩一向最憎就係狗仔隊。試過好幾次,黃浩同徐淑敏出去撐枱腳過二人世界,狗仔隊梗影啦,跟住黃浩就報警,話覺得受滋擾;更有一次同徐淑敏蒲蘭桂坊嗰陣,同記者起衝突,結果黃浩以身「頂」記者之餘更向之吐口水,相當冇品。最後又係報警收場。

依家黃浩做咗「傳媒大亨」喇,就話要發大娛樂版嚟搞,仲話到明要大搞狗仔隊……咁得意?

放眼人民幣? 殺入內地鐵路站派發

家陣《都市日報》主力係喺地鐵沿線派發,立足香港。不過,「未來老闆」黃浩就有新想法,就係擴展內地市場——佢接受訪問時話:「依家喺香港,只係喺地鐵派,我希望可以伸展到大陸嘅地鐵派發。」