最近證實患上「貝塞特氏症」、更一度送入隔離病房嘅黃浩然，今日終於出院喇！下午二時，約40傳媒已於九龍法國醫院等候黃浩然。見佢氣色精神尚算唔錯。之前因患此疾致喉嚨潰瘍，家陣聽番佢把聲，放心，冇事！但塊面就好似腫咗少少。其中《張保仔》劇組仲送咗張巨型慰問卡俾佢添。

問黃浩然係咪已經好番晒？佢就話:「醫生話所有嘅嘢，所有嘅指數都已經check晒，因為呢個病最緊要係除咗令你微絲血管發炎，嚴重嘅可能你心臟血管都會發炎，但依家心肝脾肺腎都check晒喇，冇問題！當然依家身體係會弱啲，我都瘦咗十幾磅。」黃浩然話佢病發時體重跌至136磅，依家已升番到之前140幾磅水平。

黃浩然又話，之前因為最細嗰條微絲血管發炎而致發病，住咗醫院足足兩星期。咁依家好番未？佢笑言：「依家行半個鐘路，湊仔返學放學，行下山都ok，醫生叫我唔好太劇烈，但都需要適量運動。」

黃浩然笑瞇瞇：我嘅生殖器官大家唔使擔心

黃浩然出院，大家除咗關心佢成個人「整體」好番晒未之外，亦都好關心其中一部份……生殖器官。因為之前有報道話，「貝塞特氏症」嘅患者除咗有機會致失明外，亦可能「下延」致生殖器官潰爛。雖然佢太太家嘉同中國星發言人之前已經代佢否認，但今日點都要再關心佢本人嘛……

黃浩然一聽到傳媒咁問，就笑笑口話喇:「大家都好關心呢樣嘢。其實身體任何一條血管都有機會發炎，幸好心臟血管冇發炎，而我嘅生殖器官大家都唔使擔心。」至於要休息幾耐，佢就話視乎康復進度而定。

黃浩然諗起都驚：再遲啲醫就好大麻煩

黃浩然表示自己其實早於上月已經發病，當時係扁桃腺發炎，但捱至本月4號入院，皆因之前要去澳洲登台：「之前嚴重講唔到嘢0架，我係8月26日開始發病，但28號至到9月2號又要去澳洲做騷，喺澳洲嗰陣全程我都講唔夠10句嘢，好辛苦，最嚴重口水吞唔到。」

返港後黃浩然終於頂唔順求醫，佢懷疑可能係自己平時作息同食嘢唔定時有關。捱到4號入院，黃浩然話病情最嚴重嗰陣係食唔到嘢，喉嚨爛晒：「真係好彩心臟血管冇發炎。其實入院第二日用藥已見效，但喉嚨潰瘍惡化，口腔有白色嘢。之前自己食止痛藥見冇反應，都好擔心，話晒自己都好捱得0架嘛!」

今次因為呢個病致推卻新劇《張保仔》，黃浩然話:「好可惜入院第二日已開工，拍唔到，但始終身體緊要，不過就錯失好機會，多謝劇組體諒，祝福拍攝順利。」至於今次因為呢個病帶來多少損失？黃浩然話冇特別去諗:「最重要係身體，如果再遲啲醫，咁就好大麻煩！」

身兼兩職 黃浩然心痛太太被追訪

今日黃浩然出院，太太家嘉(KaKa)一直陪伴在側。黃浩然患病期間，KaKa身兼兩職，又要照顧兩個小朋友，又要照顧老公，搞到成個瘦晒。

黃浩然話:「我真係好多謝我屋企人，同埋好多好多關心我嘅人，電話不停傳來好多人問候嘅message。呢段時間太太好辛苦，佢又俾人跟到飛起，湊仔返學呀，佢都大壓力，始終佢唔係圈內人，又湊住個仔，又擔住把遮啦，啲同事(傳媒)又係咁影佢啦，佢都好辛苦。」

黃浩然屬中國星旗下藝人，佢話向生向太都有傳短訊予以關心。至於向太陳嵐與周星馳之間恩怨，黃浩然話冇留意:「嘩，我呢排仲得閒留意呢啲嘢咩，有時間都多啲休息啦!」做完訪問後，黃浩然更連聲謂「多謝晒！」