向來敢言的黃秋生和杜汶澤，早前因「CY女」（梁齊昕）在網上互片搞到反晒面後，早前阿澤老婆田蕊妮加入戰團，寸英文名「Anthony Wong」秋生應改名為「Anything Wrong」。日前秋生出席電器品牌「AEG」活動後，跟拍檔主持節目《燭光晚餐》的黎芷珊齊齊接受專訪時，談到節目訪問嘉賓，秋生講明會參與意見，更拒絕邀請杜汶澤，因除了「CY女」事件，兩人還有不少私怨，更表明難跟對方再合作拍戲，「唔鍾意個人做咩同佢拍戲！」

當日活動秋生跟芷珊一唱一和相當合拍，他亦承認當日搵芷珊一起做主持，也因為跟對方合得來，以及對方主持經驗豐富，「我係神經刀嚟，突然個腦唔知走咗去邊，講到離天百丈遠。」芷珊補充說：「我可以拉番佢返番嚟。」

似有弦外之音

兩人合作了一段日子，芷珊大爆秋生博學之餘，亦很錫所有受訪嘉賓，「佢真係咩都識，講咩話題佢都搭到咀，佢本身又係藝人，所以特別錫啲藝人，有啲問題會唔想我哋問。」秋生即說：「我唔係藝人，係演員或者藝術工作者，當然你叫我藝術家都會應啦！我唔想問嗰啲問題，只係覺得係禮貌嚟，我係從嗰啲人角度去諗，如果一個人唔喺人哋角度諗嘢，我都唔會理佢啦！」似有弦外之音。

早前節目本安排訪問顏卓靈，臨時改為胡杏兒令秋生不知所措，但原來訪問對象，秋生是有選擇權，「有好多個say no，但唔會呢度講邊啲say no啦！（阿澤呢？）唔好啦！（點解？）都擺明車馬，唔通仲潑婦罵街咩，喺度插嚟插去咩。（合作拍電影呢？）唔會囉！唔鍾意個人，做咩同佢拍戲啫！佢都唔會同我拍啦！大家都交流唔到。我好衰㗎呢個人，好愛恨分明！（同田蕊妮合作呢？）可以，佢咁聰明可愛，但我冇問題啫！人哋唔知會唔會冇問題！」

寸無綫無人情味

此時芷珊即主持上身追問，「你之前同阿澤都熟㗎？」秋生說：「我做佢戥穿石！你話我個人平時點會去做人戥穿石，當然有好多嘢發生，先至會變成o依家咁，唔通我起身無端端撞親個頭咩！（芷珊：你哋私人有好多過節？）梗係啦！」談到經常就社會議題發表意見，但秋生否認有意從政，「我只係有興趣搞藝術，我平日只係以一個普通巿民關心家園態度講嘢，冇攻擊人哋，我個人幾有正義感。（當日幫CY女都係？）係呀！我只係同佢影張合照，根本唔識佢。」

談到老拍檔譚玉瑛本月底約滿不獲續約一事，芷珊無奈表示，「我覺得好可惜，佢係兒童節目Icon，我唔覺得佢貴到要cut佢囉！即係等如汪明荃，佢都係TVB個Icon嚟！」不平則鳴的秋生亦表示：「作為一個機構咁做無可厚非，但係好冇人情味囉！咁你對人哋咁無人情味，都唔好要求人哋對你講人情味，以後公事公辦，我知道呢個世界好殘忍，但大家畀番少少溫暖。」

秋生坦言怕神經刀亂講嘢，所以拖埋芷珊一起主持。

秋生講明難再跟杜汶澤合作，因大家溝通唔到。

Mani望以和為貴

秋生和阿澤同樣是英皇旗下藝人，作為兩人經理人的Mani（霍汶希），對於兩人不和到出面，自然大感無奈，「我又唔會好難做，呢啲人夾人緣，我好尊重秋生。同阿澤合作咗咁多年，喺我心目中佢只係個小朋友嚟，係我痛錫嘅藝人之一，希望佢哋做到朋友，都可以和平相處。（但秋生講明唔會同阿澤合作？）我會尊重兩個藝人決定。」